തൊണ്ണൂറുകളിലും രണ്ടായിരത്തിന്റെ തുടക്കത്തിലും തലമുടി മധ്യത്തില്നിന്ന് വകഞ്ഞെടുത്തുള്ള ഹെയര്സ്റ്റൈല് സാധാരണമായിരുന്നു. കുട്ടിക്കാലത്ത് പലപ്പോഴും അമ്മ മുടി കെട്ടിത്തരാറുള്ളതും അങ്ങനെയായിരുന്നു. എന്നാല് കാലങ്ങള് പിന്നിട്ടപ്പോള് ഹെയര്സ്റ്റൈലുകള് മാറിമറഞ്ഞു. മധ്യത്തില് നിന്ന് വകഞ്ഞെടുത്ത് മുടി കെട്ടുന്നത് പഴങ്കഥയുമായി.
എന്നാലിപ്പോള് ആ സ്റ്റൈല് തിരിച്ചുവന്നിരിക്കുകയാണ്. സെലിബ്രിറ്റികള് മുതല് ഫാഷന് ഇന്ഫ്ളുവന്സര്മാരെ 'മിഡില് പാര്ട്ട് ഹെയര് സ്റ്റൈലി'ന് പിന്നാലെയാണ്. പലര്ക്കും ഇതില്ലാതെ പറ്റില്ലെന്നായി. അതുകൊണ്ടുതന്നെ സോഷ്യല് മീഡിയ ഈ 'അഡിക്ഷ'ന് ഒരു പേരും നല്കിയിട്ടുണ്ട്. 'മിഡില് പാര്ട്ട് ഹെയര്സ്റ്റൈല് സിന്ഡ്രോം' എന്നാണത്.
കഴിഞ്ഞ ദിവസം പാരിസ് ഫാഷന് വീക്കിന്റെ വേദിയില് ചുവടു വെച്ചപ്പോള് ലോകസുന്ദരി ഐശ്വര്യ റായിയും ഇതേ ഹെയര്സ്റ്റൈലാണ് പരീക്ഷിച്ചത്. ബോളിവുഡ് താരങ്ങളായ തമന്ന ഭാട്ടിയ, അനന്യ പാണ്ഡെ, കൃതി സനണ്, ശ്രദ്ധ കപൂര് എന്നിവരെല്ലാം ഈ ഹെയര്സ്റ്റൈലിന്റെ ആരാധകരാണ്. അമേരിക്കന് ടെലിവിഷന് താരവും സോഷ്യല് മീഡിയ ഇന്ഫ്ളുവന്സറുമായ കിം കര്ദാഷിയാന് വരെ മുടി മധ്യത്തില് നിന്ന് വകഞ്ഞെടുത്ത സ്റ്റൈല് പരീക്ഷിച്ചിരുന്നു. ഫെമിന മാസികയുടെ കവര് ചിത്രമായി വന്നപ്പോള് ശ്രദ്ധ കപൂറും ഈ സ്റ്റൈലില് തന്നെയായിരുന്നു. അവരും മിഡില് പാര്ട്ട് ഹെയര്സ്റ്റൈല് സിന്ഡ്രോം എന്ന കെണിയില് അകപ്പെട്ടു എന്നാണ് ഇതിന് താഴെ കമന്റുകള് വന്നത്.
എന്നാല് ഈ ഹെയര്സ്റ്റൈലിനെ അഭിനന്ദിച്ചും നിരവധി പോസ്റ്റുകള് സോഷ്യല് മീഡിയയില് വന്നിട്ടുണ്ട്. പുരുഷന്മാര്ക്കും സ്ത്രീകള്ക്കും ഒരുപോലെ പരീക്ഷിക്കാന് കഴിയുന്ന ഹെയര്സ്റ്റൈലാണ് ഇതെന്നും നടുവില് നിന്ന് വകഞ്ഞെടുക്കുന്ന മുടി പല രീതിയില് സ്റ്റൈല് ചെയ്യാമെന്നും ആളുകള് സോഷ്യല് മീഡിയയില് പറയുന്നു. സാരി ഉള്പ്പെടെയുള്ള ട്രഡീഷണല് വസ്ത്രങ്ങള്ക്കൊപ്പവും മോഡേണ് വസ്ത്രങ്ങള്ക്കൊപ്പവും ഈ ഹെയര്സ്റ്റൈല് ചേര്ന്നുപോകുമെന്നും പോണിടെയ്ല് കെട്ടിയാലും ബണ് രീതിയിലായാലും സാധാരണപോലെ അഴിച്ചിട്ടാലും ഈ സ്റ്റൈല് മനോഹരമായ ലുക്ക് നല്കുന്നുവെന്നും ആളുകള് പറയുന്നു. മുഖത്തിന് നല്കുന്ന നീണ്ട ലുക്കിനൊപ്പം ക്ലാസിക് ലുക്ക് കൂടി ചേരുന്നതാണ് ഈ ഹെയര്സ്റ്റൈലെന്നും അഭിപ്രായമുണ്ട്.
Content Highlights: what Is the middle part hairstyle syndrome that people are trapped in
Published: 26 Sept 2024, 02:19 pm IST
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented