വിക്ടോറിയാസ് സീക്രട്ടിന്റെ 50 മില്യൺ ഡോളറിന്റെ 'ഫാന്റസി ബ്രാ' അണിഞ്ഞ് കൈലി ജെന്നർ റൺവേയിലെത്തിയതിനു പിന്നാലെ സമൂഹമാധ്യമങ്ങളിൽ ചർച്ചയാകുന്നത് മറ്റൊരു താരത്തിന്റെ പഴയകാല വേഷമാണ്. 1978-ൽ പുറത്തിറങ്ങിയ സത്യം ശിവം സുന്ദരം എന്ന ചിത്രത്തിൽ സീനത്ത്‌ അമൻ അണിഞ്ഞ ആഭരണങ്ങൾ പതിച്ച വസ്ത്രങ്ങളാണ് ഇപ്പോൾ വീണ്ടും ശ്രദ്ധ നേടുന്നത്. പതിറ്റാണ്ടുകൾക്കു മുൻപേ ഇത്രയും വ്യത്യസ്തവും ആകർഷകവുമായ രൂപങ്ങൾ ഇന്ത്യൻ സിനിമയിൽ അവതരിപ്പിച്ചിരുന്നുവെന്ന ഓർമപ്പെടുത്തൽ കൂടിയാകുകയാണ് ഈ ചിത്രങ്ങൾ.

To advertise here,

കൈലിയുടെ ഫാന്റസി ബ്രായും പഴയകാല ബോളിവുഡ് ലുക്കും

ഒക്ടോബർ 18-ന് നടന്ന വിക്ടോറിയാസ് സീക്രട്ടിന്റെ ഫാഷൻ ഷോയിൽ കൈലി ജെന്നർ അണിഞ്ഞ വേഷമാണ് പുതിയ ചർച്ചകൾക്ക് തുടക്കമിട്ടത്. 2018-നുശേഷം വീണ്ടും ശ്രദ്ധ നേടിയ 'ഫാന്റസി ബ്രാ'യിൽ 4,410 വജ്രങ്ങളുണ്ടായിരുന്നുവെന്നും അതിന്റെ മൂല്യം 50 മില്യൺ ഡോളറാണെന്നുമാണ് റിപ്പോർട്ടുകൾ. വജ്രങ്ങൾ പതിച്ച വസ്ത്രത്തിനൊപ്പം വെളുത്ത തൂവലുകൾ കൊണ്ടുള്ള വലിയ ചിറകുകളും മിനി സ്‌കർട്ടും കൈലിയുടെ ലുക്കിന് കൂടുതൽ ശ്രദ്ധ നേടിക്കൊടുത്തു. എന്നാൽ, ഇതിനു സമാനമായ ആഭരണങ്ങളാൽ അലങ്കരിച്ച വസ്ത്രങ്ങൾ പതിറ്റാണ്ടുകൾക്കു മുൻപേ ഇന്ത്യൻ സിനിമയിൽ പ്രത്യക്ഷപ്പെട്ടിരുന്നു. സീനത്ത്‌ അമന്റെ പഴയ ചിത്രങ്ങളാണ് ഈ താരതമ്യത്തിന് വഴിയൊരുക്കിയത്.

ആഭരണങ്ങൾ നിറഞ്ഞ വേഷത്തിൽ സെനത്ത് അമൻ

രാജ് കപൂർ സംവിധാനം ചെയ്ത സത്യം ശിവം സുന്ദരം എന്ന ചിത്രത്തിൽ ശശി കപൂറിനൊപ്പമാണ് സീനത്ത്‌ അമൻ അഭിനയിച്ചത്. ചിത്രത്തിലെ സ്വപ്നരംഗങ്ങളിൽ അവർ അണിഞ്ഞ വസ്ത്രങ്ങൾ ഇന്നത്തെ ഫാഷൻ റൺവേകളിലും ശ്രദ്ധ നേടാൻ കഴിയുന്ന തരത്തിലുള്ളവയായിരുന്നു. മുത്തുകളും തിളങ്ങുന്ന കല്ലുകളും പതിച്ച ബ്രാലറ്റ് ടൈപ്പ് ടോപ്പ്, അതിനൊപ്പം ചേരുന്ന തൂവൽ പോലെയുള്ള അലങ്കാരങ്ങൾ, കഴുത്തിലുള്ള ആഭരണം, വസ്ത്രത്തിലെ ഫാൻസി ചെയിനുകൾ, തലമുടിയിലെ അലങ്കാരങ്ങൾ എന്നിവയായിരുന്നു വേഷത്തിന്റെ പ്രത്യേകത.

സിൽവർ,ഗോൾഡൻ നിറങ്ങളിൽ മുത്തുകളും അലങ്കാരങ്ങളും ചേർത്ത വസ്ത്രങ്ങളും മുത്തുകൾ ശരീരത്തിലൂടെ ഒഴുകുന്നതുപോലെ തോന്നിക്കുന്ന വെളുത്ത വേഷവും ഏറെ ശ്രദ്ധേയമായിരുന്നു.  സാമൂഹികമാധ്യമങ്ങളിൽ സീനത്ത്‌ അമനെ വിശേഷിപ്പിച്ചത് 'ഒറിജിനൽ ദിവ' എന്നായിരുന്നു. പഴയകാല വസ്ത്രങ്ങൾ ഇന്നും പുതുമയോടെ തോന്നുന്നതാണ് സാമൂഹികമാധ്യമങ്ങളിലെ ചർച്ചകളുടെ പ്രധാന കാരണം.

വസ്ത്രങ്ങൾക്ക് പിന്നിൽ ഭാനു അത്തയ്യ

കൈലി ജെന്നറിന്റെ വേഷം വിലയേറിയ വജ്രങ്ങൾ കൊണ്ടാണ് ശ്രദ്ധ നേടുന്നതെങ്കിൽ സീനത്ത്‌ അമന്റെ വസ്ത്രങ്ങളുടെ പ്രത്യേകത അവയുടെ രൂപകൽപ്പനയും കലാപരമായ മികവുമാണ്. ഇന്ത്യയുടെ ആദ്യ ഓസ്‌കർ ജേതാവായ വസ്ത്രാലങ്കാര വിദഗ്ധ ഭാനു അത്തയ്യയാണ് ചിത്രത്തിലെ സീനത്തിന്റെ വസ്ത്രങ്ങൾ രൂപകൽപ്പന ചെയ്തത്. പുരാതന ഇന്ത്യൻ ക്ഷേത്രങ്ങളിലെ ശിൽപങ്ങൾ, പരമ്പരാഗത ആഭരണങ്ങൾ, തുണിത്തരങ്ങൾ എന്നിവയിൽനിന്നുള്ള പ്രചോദനമാണ് ഈ വസ്ത്രങ്ങളിൽ കാണാനാകുന്നത്.

വെറുമൊരു ആധുനിക വസ്ത്രരൂപം സൃഷ്ടിക്കുന്നതിനു പകരം ഇന്ത്യൻ കലാപാരമ്പര്യത്തിലെ ഘടകങ്ങളെ സിനിമയുടെ ഭാവനാലോകവുമായി ചേർത്തുവെന്നതാണ് ഭാനു അത്തയ്യയുടെ സൃഷ്ടികളുടെ പ്രത്യേകത. ഭാനുവിനെക്കുറിച്ച് സീനത്ത്‌ അമൻ പറഞ്ഞ വാക്കുകളും ദ ജഗ്ഗർനട്ട് പങ്കുവച്ചിരുന്നു. തന്റെ ജീവിതത്തിൽ കണ്ട മറ്റ് വസ്ത്രാലങ്കാര വിദഗ്ധർക്കൊന്നും ഭാനുവിനെപ്പോലെ ഒരേസമയം സുഖകരവും ആകർഷകവുമായ വസ്ത്രങ്ങൾ ഒരുക്കാൻ കഴിഞ്ഞിട്ടില്ലെന്നായിരുന്നു സീനത്തിന്റെ അഭിപ്രായം.

ഇന്നും പ്രസക്തമായ ഫാഷൻ സങ്കൽപ്പങ്ങൾ

സീനത്ത്‌ അമന്റെ പഴയകാല ചിത്രങ്ങൾ പുറത്തുവന്നതോടെ സമൂഹമാധ്യമങ്ങളിൽ നിരവധി പേരാണ് വസ്ത്രങ്ങളുടെ രൂപകൽപ്പനയെ പ്രശംസിച്ചത്. പുരാതന ഇന്ത്യൻ ക്ഷേത്രശിൽപങ്ങളിൽ സമാനമായ അലങ്കാരശൈലികൾ ഉണ്ടായിരുന്നുവെന്ന് ചിലർ ചൂണ്ടിക്കാട്ടി. പതിറ്റാണ്ടുകൾ പഴക്കമുള്ള വസ്ത്രങ്ങൾ ഇന്നും ഫാഷനായി തോന്നുന്നുവെന്നായിരുന്നു മറ്റുചിലരുടെ പ്രതികരണം. കൈലി ജെന്നറിന്റെ വജ്രങ്ങൾ പതിച്ച ഫാന്റസി ബ്രായും സീനത്ത്‌ അമന്റെ വേഷങ്ങളും തമ്മിൽ താരതമ്യം ചെയ്യുമ്പോൾ ശ്രദ്ധിക്കേണ്ടത് അവയുടെ കാലവും സാംസ്‌കാരിക പശ്ചാത്തലവുമാണ്. വിലയേറിയ ആഭരണങ്ങളിലൂടെ ആഡംബരം പ്രകടിപ്പിക്കുന്ന ആധുനിക ഫാഷൻ അവതരണത്തിനപ്പുറം, ഇന്ത്യൻ ശിൽപകലയുടെയും ആഭരണപാരമ്പര്യത്തിന്റെയും സ്വാധീനം സിനിമാ വസ്ത്രങ്ങളിൽ എങ്ങനെ ഉപയോഗിക്കാമെന്ന് ഭാനു അത്തയ്യയുടെ സൃഷ്ടികൾ കാണിച്ചുതരുന്നു.