മനുഷ്യന് ആദ്യമായി മെരുക്കി വളര്ത്തിയ മൃഗമായ നായ, കറപുരളാത്ത യജമാനസ്നേഹത്തിന്റേയും അചഞ്ചലമായ വിശ്വസ്തതയുടേയും കാലാതിവര്ത്തിയായ പ്രതീകങ്ങളായാണ് കണക്കാക്കപ്പെടുന്നത്. കുറുക്കനും കുറുനരിയും ചെന്നായയുമുള്പ്പെടുന്ന കുടുംബത്തിലാണ് നായയുടെ സ്ഥാനം. ചെന്നായ്ക്കളാണ് ഇവരുടെ പൂര്വ്വികരെന്നാണ് പ്രബലമായ വാദം. കാട്ടില് നിന്നും നാട്ടിലേക്കും നഗരത്തിലേക്കും മനുഷ്യര് വളര്ന്നപ്പോള് ചിരകാലബന്ധത്തിന്റെ കാണാച്ചരടാല് ബന്ധിക്കപ്പെട്ട് നായ്ക്കളും ഒപ്പം സഹയാത്രികരായുണ്ടായിരുന്നു. പുതിയ ഭൂപ്രകൃതികളിലേക്കും ജീവിത സാഹചര്യങ്ങളിലേക്കും ചേക്കേറി മനുഷ്യവംശം വളര്ന്നതിനൊപ്പം നായ്ക്കള്ക്കും രൂപഭാവങ്ങളിലും സ്വഭാവ വിശേഷങ്ങളിലും ജനിതകഘടനയിലും പരിണാമമുണ്ടായി ഓരോ ദേശത്തിന്റേയും കാലാവസ്ഥയും ഭൂമിശാസ്ത്രവുമനുസരിച്ച് പ്രകൃതി വരുത്തിയ മാറ്റങ്ങള്ക്കൊപ്പം പ്രത്യേക ആവശ്യങ്ങള്ക്കായി തെരഞ്ഞെടുത്ത് പ്രജനനം നടത്തിയത് മനുഷ്യന്റെ ഇടപെടലും സമാന സ്വഭാവങ്ങളുള്ള ജനുസുകള് (Breeds) ഉരുത്തിരിയാന് കാരണമായി. ആവശ്യം സൃഷ്ടിയുടെ മാതാവായപ്പോള് ചിലയിനങ്ങള് കന്നുകാലികളുടെ സംരക്ഷകരായി. മറ്റു ചിലര് വേട്ടക്കാരായി. ഒടുവില് അരുമകളും വിനോദോപാധിയും പ്രദര്ശന വസ്തുക്കളുമായി കേവലം ഒരു കിലോഗ്രാം ശരീരഭാരവും പതിനഞ്ചു സെന്റീമീറ്റര് ഉയരവുമുള്ള ഷിവാവ മുതല് നൂറു കിലോഗ്രാമിനടുത്ത് ശരീരഭാരം വരുന്ന സെന്റ്ബര്ണാഡും ഒരു മീറ്ററോളം ഉയരത്തിലെത്തുന്ന ഐറിഷ് റൂള്ഫ് ഹൗണ്ട് വരെയുള്ള ജനുസ്സുകള് പിറവികൊണ്ടു. പൂര്ണ്ണമായി ഒരു വളര്ത്തു മൃഗമായി പരിണമിച്ച് മനുഷ്യവാസത്തിന്റെ അന്ത:പുരങ്ങളില് വാഴുമ്പോഴും പഴയ വനസ്ഥലിയുടെ ആവാസ ചിഹ്നങ്ങള് ദൂര്ബലമായെങ്കിലും അവയുടെ ജനിതക രേഖയില് അവശേഷിക്കുന്നുണ്ട്. പ്രത്യേക സ്ഥലങ്ങളില് മൂത്രമൊഴിച്ച് അതിര്ത്തി രേഖകള് തീര്ക്കുമ്പോഴും ഓരിയിട്ട് ആശയ സംവാദം നടത്തുമ്പോഴും എല്ലും ഭക്ഷണവും കുഴിച്ചിടുമ്പോഴും കിടക്കുന്നതിന് മുമ്പ് ഇലകള്കൊണ്ട് കിടക്കയുണ്ടാക്കുന്ന വിധം വട്ടം കറങ്ങുമ്പോഴുമൊക്കെ നമുക്ക് ദര്ശിക്കാവുന്നത് തനതു സ്വഭാവത്തിന്റെ ഓര്മ്മക്കുറിപ്പുകള് തന്നെ.
മനുഷ്യന്റെ ശ്രദ്ധാപൂര്വ്വമായ തിരഞ്ഞെടുപ്പും പ്രജനനവും കാരണം സമാന രൂപഭാവങ്ങള് പ്രാപിച്ച, അത് തലമുറകളിലേക്ക് ശുദ്ധ രൂപത്തില് കൈമാറുന്നവയാണ് ഇത്തരം ജനുസ്സുകള്. പൊതു സ്വഭാവങ്ങളുടെയും ശാരീരിക പ്രത്യേകതകളുടെയും അടിസ്ഥാനത്തില് ഇവയെ വിവിധ വിഭാഗങ്ങളായും തിരിക്കാം. ശ്വാന പ്രദര്ശനങ്ങള്ക്കും മറ്റും ഇത്തരത്തിലുള്ള വര്ഗ്ഗീകരണം സഹായിക്കുന്നു. ലോകത്തിലാകമാനം രണ്ടായിരത്തിലധികം ജനുസ്സുകള് ഉണ്ടായിരുന്നത്രേ, ഇന്നത് നാനൂറിനടുത്ത് വരും. ഇവയില് നൂറോളം ജനുസ്സുകള് ഇന്ത്യയില് ലഭ്യമാണ്. നായ ജനുസ്സുകളെയും അവയുടെ ഗ്രൂപ്പുകളെയും കുറിച്ചുള്ള അറിവ് നമുക്ക് ഇണങ്ങിയ ബ്രീഡിനെ തിരഞ്ഞെടുക്കാന് സഹായിക്കുന്നു. ഇതിനായി നായജനുസ്സുകളിലെ പ്രധാന ഗ്രൂപ്പുകളെ ആദ്യം പരിചയപ്പെടാം.
നായ ജനുസ്സുകളെ ഗ്രൂപ്പുകളായി തിരിച്ചിരിക്കുന്നത് ഏത് ഉദ്ദേശത്തോടെയാണ് മനുഷ്യന് ആ ബ്രീഡിനെ മനുഷ്യന് ഉരുത്തിരിച്ചെടുത്തത് എന്നതിന്റെ അടിസ്ഥാനത്തിലാണ്. ഈ ഉപയോഗം ഇന്നുണ്ടായിരിക്കണമെന്നില്ല. ഇപ്പോള് എല്ലാത്തരം ഇനങ്ങളെയും മനുഷ്യന് ഓമനിച്ചു വളര്ത്താറുണ്ട്. നായയുടെ ചില അടിസ്ഥാന സ്വഭാവങ്ങള് മനസിലാക്കാന് അവയുടെ യഥാര്ത്ഥ ഉപയോഗമെന്തായിരുന്നു എന്നറിയുന്നതില് നിന്നു മനസിലാക്കാം.
ഓമന നായ്ക്കള് (Toy Breeds)
ഓമനത്വം നിറയുന്ന കുഞ്ഞന് നായകളാണ് ഈ വിഭാഗത്തില്പ്പെടുന്ന ജനുസ്സുകള്. യജമാനന്റെ മടിയിലും ഹൃദയത്തിലും സ്ഥാനം പിടിക്കാന് കഴിവുള്ളവര്. ഉറ്റ ചങ്ങാതിമാരാകാനും കുട്ടികള്ക്ക് പ്രിയപ്പെട്ട കളിക്കൂട്ടുകാരാകാനും ഇവര്ക്ക് കഴിയും. കൂടുതല് സമയവും വീട്ടിനുള്ളില് വസിക്കാന് ഇവര് ഇഷ്ടപ്പെടുന്നു. പല ലോകപ്രസിദ്ധ വ്യക്തികളുടെയും, റാണിമാരുടെയും ഇഷ്ട തോഴരായി ചരിത്രത്തില് ഇടംപിടിച്ചവരാണ് ഇവരില് പലരും. ഉടമയുമായി സ്ഥാപിച്ചെടുക്കുന്ന അതിവൈകാരികമായ ഹൃദയ ബന്ധമാണ് ഇവരെ വാത്സല്യത്തിന്റെ കൈക്കുമ്പിളിലിരുത്തുന്നത്. ഷിവാവ, പഗ്ഗ്, പൊമറേനിയന്, പെക്കിന്ഗീസ്, മാള്ട്ടീസ്, മിനിയേച്ചര്, പിന്ഷര് കിങ്ങ്, ചാള്സ് സ്പാനിയേല് തുടങ്ങിയവയാണ് ഈ വിഭാഗത്തിലെ പ്രധാന ഇനങ്ങള്.
ടെറിയറുകള് (Terrier Group)
ടെറിയര് വിഭാഗത്തിലെ ബ്രീഡുകള് ധീരതയുടെ പര്യായങ്ങളാണ്. വേട്ടയ്ക്കൊരുങ്ങുമ്പോള് മാളത്തില് ഒളിച്ചിരിക്കുന്ന ചെറു ജീവികളെ പിടിക്കുവാന് ഉപയോഗപ്പെടുത്തിയിരുന്നവയാണ് ഇവര്. ശരീര വലിപ്പത്തേക്കാള് ശരീരബലവും, നിര്ഭയത്വവുമാണ് ഇവരുടെ ആയുധം. ചെറിയ ശരീരം, പരന്ന തല, നീളമുള്ള മൂക്ക്, ഉയര്ന്ന വാല്, ഘ്രാണശക്തി എന്നിവ പൊതുവായ പ്രത്യേകതകളാണ്. അജഞ്ചലമായ കൂറ് സ്വന്തമായുള്ള ജാഗരൂകരാണ് ഇവര്. യോര്ക്ക് ഷെയര് ടെറിയര്, ബുള് ടെറിയര്, ഫോക്സ്, ടെറിയര്, ജാക്ക് റസല് ടെറിയര് എന്നിവരാണ് ടെറിയര് വിഭാഗത്തിലെ പ്രധാനികള്.
വേട്ട നായ്ക്കള് (Gun Dogs)
വെടിയേറ്റു വീഴുന്ന ഇരയെ വേട്ടക്കാരന്റെ അടുത്ത് എത്തിക്കുവാനും, ഇരകളെ ഒളിച്ചിരിക്കുന്ന സ്ഥലങ്ങളില് നിന്ന് പുറത്തു ചാടിക്കാനും ഉപയോഗിച്ചിരുന്ന നായ്ക്കളാണ് ഈ വിഭാഗത്തിലുള്ളത്. സ്നേഹവും ബുദ്ധി ശക്തിയും ശാന്തശീലവുമുള്ള മികച്ച കാവല് നായ്ക്കളാണ് ഇവര്. നല്ല രീതിയില് ഭക്ഷണവും, വ്യായാമവും ഇവര്ക്കാവശ്യമാണ്. ലാബ്രഡോര് റിട്രീവര്, ഗോള്ഡന് റിട്രീവര്, ഐറിഷ് സെറ്റര്, കോക്കര് സ്പാനിയല്, പോയിന്റര്, വീമാരനര് എന്നീ ജനുസ്സുകളാണ് ഈ ഗ്രൂപ്പിലെ പ്രമുഖര്.
ജോലി നായ്ക്കള് (Working Dogs)
വളര്ത്തുമൃഗങ്ങളുടെ പ്രത്യേകിച്ച് ചെമ്മരിയാട്ടിന് പറ്റങ്ങളുടെ സുരക്ഷകരാണിവര്. സംരക്ഷണമാണ് ഇവരുടെ ജന്മ സ്വഭാവം. ഉയര്ന്ന ശരീരഭാരം, ഉത്സാഹം, ചുറുചുറുക്ക്, സൗന്ദര്യം തുടങ്ങിയ സദ്ഗുണ സമ്പന്നര്. കാവലിനും കായികാഭ്യാസങ്ങള്ക്കും യോജിച്ചവ. ജര്മ്മന് ഷപ്പേര്ഡ് (അല്സേഷ്യന്), ഡോബര്മാന്, ബോക്സര്, കോളി, ഗ്രൈറ്റ് ഡാന്, ബുള് മാസ്റ്റിഫ്, റോട്ട്വീലര്, നിയോ പൊളിറ്റന് മാസ്റ്റിഫ്, സെയ്ന്റ് ബെര്ണാഡ്, സൈബീരിയന് ഹസ്ക്കി തുടങ്ങി ജനപ്രിയ ഇനങ്ങള് ഈ വിഭാഗത്തിലാണ്.
പ്രത്യേക ജോലിക്കാര് (utility Breeds)
ഏതെങ്കിലും ഒരു പ്രത്യേക ആവശ്യത്തിനായി ഉരുത്തിരിച്ചെടുത്തവയാണ് ഇവര്. സ്നേഹവും ആത്മാര്ത്ഥതയുള്ള ഇവര് വീടിനുള്ളില് കഴിയാനും സുഹൃദ്ബന്ധം സ്ഥാപിക്കാനും ഇഷ്ടപ്പെടുന്നു. ബുള്ഡോഗ്, ഡാല്മേഷന് സ്പിറ്റ്സ്, പുഡില്, ലാസാപ്സോ തുടങ്ങിയ ജനുസ്സുകള് ഈ വിഭാഗത്തിലാണ്.
നാടന് നായ്കളുടെ ഗരിമ
നാടന് നായ്ക്കള് വെള്ളി വെളിച്ചത്തിലേക്ക് തിരികെയെത്തുകയാണ്. ഓരോ ദേശത്തും അവരുടെ സ്വന്തം നായ താരമാകുന്ന കാഴ്ചയാണ് പുതിയ ട്രെന്ഡ്. ഇന്ത്യന് ജനുസ്സുകളെ ഹൗണ്ട്സ് വിഭാഗത്തില് ഉള്പ്പെടുത്താം. ഓരോ നാടിന്റെയും കാലാവസ്ഥ, ഭൂപ്രകൃതി, ജീവിതരീതി, ജനങ്ങളുടെ അഭിരുചി എന്നിവയനുസരിച്ച് ഉരുത്തിരിഞ്ഞു വന്നവയാണ് ഇവ. വിദേശ ജനങ്ങള്ക്ക് ലഭിക്കുന്ന ഫൈവ്സ്റ്റാര് സൗകര്യങ്ങള് ഇവര് ആശ്യപ്പെടുന്നില്ല. എന്നിരുന്നാലും കരുത്തിലും, വേഗത്തിലും, ബുദ്ധിയിലും ഇവര് മുമ്പിലാണ്. നാടും വീടും രാപ്പകല് കാക്കുന്ന ഇവയുടെ സംരക്ഷണം നാടിന്റെ ആവശ്യമാണ്. രാജപാളയം, ചിപ്പിപ്പാറ, കന്നി, മലയ്പട്ടി, മുദോള് ഹൗണ്ട്, രാംപൂര് ഹൗണ്ട്, കോമ്പായ് തുടങ്ങിയവ ഇന്ത്യയുടെ വിവിധ ദേശങ്ങളിലെ പെരുമ പേറുന്നവരാണ്.
നിങ്ങള്ക്കിണങ്ങിയ നായയേത് ?
വേട്ട നായ്ക്കള് (Hound), നായാട്ടുകാര് (Gundogs), ടെറിയറുകള് (Terriers), കാവല്ക്കാര് (Working dogs), ആവശ്യത്തിനുള്ളവര് (Utility group), കളിക്കൂട്ടുകാര് (Toy dogs) തുടങ്ങി വിവിധ വിഭാഗങ്ങളിലായി നാനൂറോളം നായ ജനുസ്സുകള് ലോകത്തിലുണ്ട്. ഇവയില് നൂറിലധികം ഇനങ്ങള് ഇന്ത്യയിലുണ്ട്. ഇവയോരോന്നിനും പ്രത്യേക സ്വഭാവ സവിശേഷതകളും തനതായ ആവശ്യങ്ങളുമുണ്ട്. നമ്മുടെ ആവശ്യത്തിന് അനുയോജ്യമായ ഒരു ഇനത്തെ തെരഞ്ഞെടുക്കാന് ഇവയെ സംബന്ധിച്ച വിവരങ്ങള് കൃത്യമായി ശേഖരിക്കണം. ചിത്രങ്ങള്, വീഡിയോ, ശ്വാനപ്രദര്ശനങ്ങള്, കെന്നലുകള് ഇവയിലൂടെ കൂടുതല് അറിവുകള് നേടാം. തെരഞ്ഞെടുക്കപ്പെടുന്ന ഇനത്തിനനുസരിച്ചുള്ള സൗകര്യങ്ങള് നല്കാനുള്ള നമ്മുടെ കഴിവും പരിശോധിക്കണം. സാമ്പത്തികഭദ്രത പ്രധാന കാര്യം തന്നെയാണ്. ഇത്രയും ജനുസ്സുകളില് നിന്ന് ഒരെണ്ണത്തിനെ സ്വന്തമാക്കാന് പരിഗണിക്കേണ്ട നിരവധി ഘടകങ്ങളുണ്ട്. ശുദ്ധ ജനുസ്സ് അല്ലെങ്കില് സങ്കരയിനമാണോ എന്നത് തീരുമാനിക്കണം. നായയെ വളര്ത്തുന്നതിന്റെ കൃത്യമായ ഉദ്ദേശം കണക്കാക്കണം. ഒരു കാവല്നായ അഥവാ സംരക്ഷകന് എന്ന നിലയിലാണോ അതോ ഓമനിക്കാനാണോ ലക്ഷ്യമെന്നത് തീരുമാനിക്കണം. പ്രജനനമോ ശ്വാനപ്രദര്ശനമോ ലക്ഷ്യമാണോയെന്നതും പ്രധാനം. വീട്ടിലെ മറ്റ് അംഗങ്ങളുടെ താല്പര്യം പരിഗണിക്കണം.
നായ ജനുസ്സുകളെ തിരഞ്ഞെടുക്കാനായി പരിഗണിക്കേണ്ട ഘടകങ്ങള് താഴെ പറയുന്നു.
നായയുടെ വലിപ്പം, രോമത്തിന്റെ സ്വഭാവം, ഉടമയുമായുള്ള ബന്ധത്തിലെ പ്രതീക്ഷ, താമസസ്ഥലത്തിന്റെ സ്വഭാവം (വീട്, ഫ്ളാറ്റ്), നഗരത്തിലാണോ ഗ്രാമത്തിലാണോ താമസം, പരിശീലന സൗകര്യം, നായവളര്ത്തലിലെ മുന്പരിചയം, അലര്ജി, മറ്റു മൃഗങ്ങളുടെ സാന്നിധ്യം, ജനപ്രിയത, ലഭ്യത തുടങ്ങിയവയാണവ. പല ജനുസ്സുകള്ക്കും കൃത്യമായ വ്യായാമം ആവശ്യമാണ്. ഇതിനായി സമയം ചിലവഴിക്കാന് കഴിയുമോയെന്ന് ചിന്തിക്കണം. ശ്രദ്ധിക്കാനാളില്ലാതെ ഒരു സ്ഥലത്ത് മുഴുവന് സമയവും കെട്ടിയിടപ്പെടാന് നായ വിധിക്കപ്പെടരുത്. ഉടമയുടെ ജീവിതശൈലിക്കിണങ്ങിയ വിധം ഊര്ജ്ജസ്വലതയുള്ള നായകളാണ് അനുയോജ്യം. ആണ് നായയോ, പെണ്ണോ എന്നുള്ളതും, നായ്ക്കുട്ടിയോ, വലിപ്പമുള്ളതോ എന്നതും സാഹചര്യങ്ങള്ക്കനുസരിച്ച് തീരുമാനിക്കണം. വീട്ടിലെ കുട്ടികളുടെ പ്രായവും, മനോഭാവവും പരിഗണിക്കണം.
ഇഷ്ടപ്പെട്ട നായ ഇനത്തെ തിരഞ്ഞെടുക്കാന് സഹായിക്കുന്ന നിരവധി ചോദ്യാവലികള് ഇന്റര്നെറ്റില് ലഭ്യമാണ്. Dog breed selector എന്ന് തെരഞ്ഞാല് ചോദ്യാവലികള് ലഭിക്കും. ഇവ ഒരു വഴികാട്ടിയായി ഉപയോഗിക്കാമെങ്കിലും അവസാന വാക്കല്ലെന്ന് ഓര്ക്കണം. കൃത്യമായ പഠനങ്ങളും നിരീക്ഷണങ്ങളും വഴിയേ നല്ലൊരു ചങ്ങാതി വീട്ടിലെത്തുകയുള്ളൂ എന്നത് മറക്കരുത്.
Content Highlights: How to Choose a Dog: Tips and Guidelines
Published: 06 Feb 2024, 03:31 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented