നിലവാരമില്ലെന്നു കണ്ടെത്തിയതിനേത്തുടർന്ന് സൺ ഫാർമയുടെ ഐ ഡ്രോപ്പുകൾ ഇന്ത്യയിൽ പിൻവലിച്ചു. ഇതുസംബന്ധിച്ച് സൺ ഫാർമ ഡിസ്ട്രിബ്യൂട്ടേഴ്‌സ് ലിമിറ്റഡ് ജൂലൈ 17-ന് വിതരണക്കാർക്ക് നൽകിയ രഹസ്യ കത്തിന്റെ പകർപ്പ് ലഭിച്ചുവെന്ന് വാർത്താ ഏജൻസിയായ എഎൻഐ റിപ്പോർട്ട് ചെയ്തു.

To advertise here,

Depopred2ML, Brinolar (BKC FREE), Brinzotim Eye Drops 5ML BKC FREE, Lotepred-5ML, Lotepred 1% Eye Drops SML, Lotepred LS 0.2%E/D5ML, Lotepred T, Nepalact OD Eye Drops 3ML, Nepalact-Z, Toba-F & Nepalact E/D 5ML തുടങ്ങിയ ഐഡ്രോപ്പുകളുടെ വിതരണം അവസാനിപ്പിക്കാനും വിപണിയിൽനിന്നു പിൻവലിക്കാനുമാണ് സൺ ഫാർമ ഡിസ്ട്രിബ്യൂട്ടേഴ്‌സ് ലിമിറ്റഡ് കത്തയച്ചിരിക്കുന്നത്.

മേൽപ്പറഞ്ഞ ഉത്പന്നങ്ങളുടെ സ്റ്റോക്കുകൾ തിരിച്ചയക്കാനും കമ്പനി ആവശ്യപ്പെട്ടിട്ടുണ്ട്. രോഗികളുടെ സുരക്ഷ മുൻനിർത്തിയാണ് നടപടിയെന്ന് സൺ ഫാർമ വക്താവ് എഎൻഐയോടു പറഞ്ഞു. ഈ ഉത്പ്പന്നങ്ങൾ വീണ്ടും ലഭ്യമാക്കാൻ സൺഫാർമ പ്രവർത്തിക്കുന്നുണ്ടെന്നും അതുവഴി രോഗികൾക്ക് ചികിത്സ തടസ്സപ്പെടാതിരിക്കുമെന്നും വക്താവ് പറഞ്ഞു.

നേത്ര ശസ്ത്രക്രിയയിൽനിന്ന് സുഖം പ്രാപിക്കുന്ന രോഗികൾക്കോ ഗ്ലോക്കോമ, അണുബാധ, അലർജി, കണ്ണ് വീക്കം തുടങ്ങിയ വിട്ടുമാറാത്ത അവസ്ഥകൾ കൈകാര്യം ചെയ്യുന്നവർക്കോ ആണ് ഇത്തരം ഐഡ്രോപ്പുകൾ പൊതുവെ നിർദേശിക്കുക. നിർമ്മാണ കേന്ദ്രത്തിൽ മലിനീകരണം സംശയിക്കപ്പെടുന്നതുപോലും രോഗികളുടെ സുരക്ഷയ്ക്ക് ഗുരുതരമായ ഭീഷണിയാകും. ഗുണനിലവാരമില്ലാത്ത മരുന്നുകളുടെ ഉപയോഗം ഉടനടി നിർത്തുന്നതിനൊപ്പം നേത്രവിദഗ്ധനെ കണ്ട് തുടർചികിത്സ തേടണമെന്നും വിദഗ്ധർ മുന്നറിയിപ്പു നൽകുന്നു.