തിരുവനന്തപുരം: ജീവിതശൈലീരോഗം നിയന്ത്രിക്കുന്നതിന്റെ ഭാഗമായി ആരോഗ്യവകുപ്പ് നടപ്പാക്കുന്ന ‘ആർദ്രം ആരോഗ്യം ജീവിതശൈലീ രോഗനിർണയം’ രണ്ടാംഘട്ടത്തിന്റെ ഭാഗമായി 50 ലക്ഷത്തോളം പേരുടെ പരിശോധന പൂർത്തിയായി.

To advertise here,

ആദ്യഘട്ടത്തിൽ 30 വയസ്സിനുമുകളിലുള്ള 1.54 കോടിയിലധികം പേരുടെ സ്‌ക്രീനിങ് നടത്തി തുടർചികിത്സ ഉറപ്പാക്കിയിരുന്നു. രണ്ടാംഘട്ടത്തിൽ ജീവിതശൈലീ രോഗങ്ങൾക്കൊപ്പം കുഷ്ഠരോഗം, മാനസികാരോഗ്യം, കാഴ്ചപ്രശ്നം, കേൾവിപ്രശ്നം, വയോജന ആരോഗ്യം എന്നിവയും പരിശോധിക്കുന്നുണ്ട്. രോഗസാധ്യതയുണ്ടെന്ന് കണ്ടെത്തുന്നവരെ വിദഗ്ധ പരിശോധനയ്ക്ക് വിധേയമാക്കി ചികിത്സ ഉറപ്പാക്കും.

50 ലക്ഷംപേരെ പരിശോധിച്ചതിൽ 46.7 ശതമാനം പേർക്ക് (23,21,315) ജീവിതശൈലീ രോഗസാധ്യതയുള്ളതായി കണ്ടെത്തി. രക്താതിമർദം മാത്രമുള്ള 6,53,541 (13.15 ശതമാനം) പേരുടെയും പ്രമേഹം മാത്രമുള്ള 4,31,448 (8.68 ശതമാനം) പേരുടെയും ഇവരണ്ടുമുള്ള 2,71,144 പേരുടേയും ആരോഗ്യ സംബന്ധമായ വിവരങ്ങൾ രേഖപ്പെടുത്തി.

കാൻസർ സാധ്യതയുള്ള 1,10,781 പേരെ കണ്ടെത്തി തുടർ പരിശോധനയ്ക്ക് അയച്ചു. 1,45,867 പേരെ ക്ഷയരോഗ പരിശോധനയ്ക്കായും 2,10,641 പേരെ ശ്വാസകോശ സംബന്ധമായ പരിശോധനയ്ക്കായും നിർദേശിച്ചു. 54,772 കിടപ്പ് രോഗികളെയും പരസഹായം ആവശ്യമുള്ള 85,551 പേരെയും 16,31,932 വയോജനങ്ങളെയും സന്ദർശിച്ച് തുടർ സേവനങ്ങൾ ഉറപ്പാക്കുന്നുണ്ട്.

പുതുതായി ഉൾപ്പെടുത്തിയവയിൽ 1,45,622 പേരെ കുഷ്ഠരോഗ പരിശോധനയ്ക്കായും 15,94,587 പേരെ കാഴ്ച പരിശോധനയ്ക്കായും 2,29,936 പേരെ കേൾവി പരിശോധനയ്ക്കായും നിർദേശിച്ചു. 1,24,138 വയോജനങ്ങൾക്ക് ആരോഗ്യ പ്രശ്നങ്ങളുള്ളതായി കണ്ടെത്തി. 71,759 പേരെ മാനസികാരോഗ്യ പരിശോധനയ്ക്ക് അയച്ചു.

നവകേരളം കർമപദ്ധതി ആർദ്രം രണ്ടിന്റെ ഭാഗമായി സംസ്ഥാനത്തെ 30 വയസ്സിനുമുകളിലുള്ള എല്ലാവരെയും സ്‌ക്രീൻ ചെയ്യും. ശൈലി ആപ്പിന്റെ സഹായത്തോടെ ആശാ പ്രവർത്തകർ നേരിട്ട് വീടുകളിലെത്തിയാണ് സ്‌ക്രീനിങ്‌ നടത്തുന്നത്.