ജീവിതശൈലീ രോഗങ്ങളുടെ ഭാഗമായി വൃക്കയിലെ കല്ലു മൂലമുള്ള കഠിനവേദന അനുഭവിക്കുന്നവരുടെ എണ്ണം വർധിക്കുകയാണ്. വൃക്കയ്ക്കുള്ളിൽ രൂപം കൊള്ളുന്ന ക്രിസ്റ്റൽ രൂപത്തിലുള്ള ധാതുനിക്ഷേപങ്ങളാണ് വൃക്കയിലെ കല്ലുകൾ. മൂത്രനാളത്തിലൂടെ സഞ്ചരിക്കുമ്പോൾ അവ തീവ്രവേദനയ്ക്ക് കാരണമാകും. പ്രത്യേകിച്ച്, ചൂടുള്ള കാലാവസ്ഥയിലും വെള്ളം കുടി കുറവുള്ളവരുടെ കാര്യത്തിലും ഈ അവസ്ഥ സാധാരണമാണ്. 

To advertise here,

വിവിധ വലുപ്പത്തിലുള്ള വൃക്കയിലെ കല്ലുകൾ കൈകാര്യം ചെയ്യുന്നതിനുള്ള നൂതനമായ മാർ​ഗം ലേസർ അധിഷ്ഠിത ചികിത്സകളാണ്. ഇതിൽത്തന്നെ ഏറ്റവും നൂതനം ടുലിയം ഫൈബർ ലേസർ (TFL) ആണ്. കുറഞ്ഞ അസ്വസ്ഥത മാത്രം സൃഷ്ടിച്ചുകൊണ്ട് ഇത് കല്ലുകളെ സൂക്ഷ്മമായ പൊടിയാക്കി മാറ്റുന്നു. പഴയ ഹോൾമിയം ലേസറുകളേക്കാൾ വേഗതയേറിയതും കൃത്യവുമാണ് TFL. ഇത് കല്ല് അവശേഷിക്കാനുള്ള സാധ്യതയും കല്ല് ആവർത്തിച്ചു രൂപപ്പെടാനുള്ള  സാധ്യതയും കുറയ്ക്കുന്നു.

വലിയ കല്ലുകൾക്ക് മിനി-പിസിഎൻഎൽ (മിനി പെർക്യുട്ടേനിയസ് നെഫ്രോലിത്തോട്ടമി) വ്യാപകമായി ഉപയോഗിക്കുന്നു. കല്ലുകൾ നേരിട്ട് കൈകാര്യം ചെയ്യുന്നതിനും നീക്കം ചെയ്യുന്നതിനും ഈ സാങ്കേതികത ഉപയോഗിക്കാം.  ചെറിയ മുറിവ് മാത്രം വരുത്തിയാണ്‌ ഈ നടപടിക്രമം ചെയ്യുന്നത്.  പരമ്പരാഗത ശസ്ത്രക്രിയയുമായി താരതമ്യപ്പെടുത്തുമ്പോൾ, മിനി-പിസിഎൻഎൽ രക്തസ്രാവം കുറയ്ക്കുകയും വേഗത്തിൽ സുഖം പ്രാപിക്കാൻ സഹായിക്കുകയും ചെയ്യുന്നു. മൂത്രനാളിയിലോ വൃക്കയിലോ സ്ഥിതി ചെയ്യുന്ന കല്ലുകൾക്ക്, യുറിറ്ററോസ്കോപ്പി (യുആർഎസ്) ആണ് ഇപ്പോഴും കൂടുതലായി ഉപയോഗിക്കുന്നത്. മുറിവുകളില്ലാതെ കല്ലുകൾ പൊടിക്കുന്നതിന് ലേസർ ഊർജ്ജവും ഉപയോഗിക്കുന്നു.

ഇന്ന്, ആശുപത്രികൾ ഒറ്റത്തവണ ഉപയോഗിക്കാവുന്ന ഡിജിറ്റൽ യൂറിറ്ററോസ്കോപ്പുകളും സ്വീകരിക്കുന്നുണ്ട്. ഇത് കാഴ്ച മെച്ചപ്പെടുത്തുകയും അണുബാധയ്ക്കുള്ള സാധ്യത കുറയ്ക്കുകയും ചെയ്യുന്നു. ശസ്ത്രക്രിയയ്ക്കിടെ നടപടിക്രമങ്ങൾ നന്നായി ആസൂത്രണം ചെയ്യുന്നതിനും കല്ല് കഷണങ്ങൾ ട്രാക്ക് ചെയ്യുന്നതിനും AI- സഹായത്തോടെയുള്ള ഇമേജിംഗും പരിശോധിക്കുന്നു.

ചികിത്സിക്കുന്നതിനോടൊപ്പം തന്നെ പ്രധാനമാണ് ധാരാളം വെള്ളം കുടിക്കുക എന്നത്. ഉപ്പ്, മൃഗ പ്രോട്ടീൻ എന്നിവയുടെ അളവ് കുറയ്ക്കുക, പൊണ്ണത്തടി, പ്രമേഹം തുടങ്ങിയവ കുറയ്ക്കുന്നത്‌ അപകടസാധ്യത ഗണ്യമായി ഇല്ലാതാക്കും.

(കോഴിക്കോട് സ്റ്റാർകെയർ ആശുപത്രിയിലെ യൂറോളജി സ്പെഷലിസ്റ്റ് ആണ് ലേഖകൻ)