കാലാവസ്ഥയിൽ വരുന്ന മാറ്റത്തിനനുസരിച്ച് പനി ബാധിക്കുന്നവരുടെ എണ്ണവും ശ്വാസകോശ സംബന്ധമായ അണുബാധകളും വീണ്ടും വർധിക്കുന്നതായി കാണുന്നു. ഇവയിൽ പലതും ഇൻഫ്ലുവൻസ വൈറസുകൾ (ടൈപ്പ് A, B) മൂലമാണ് ഉണ്ടാകുന്നത്. എന്നാൽ, ആർ‌എസ്‌വി, റൈനോവൈറസ്, അഡെനോവൈറസ്, പാര ഇൻഫ്ലുവൻസ തുടങ്ങിയ മറ്റ് വൈറസ് ബാധകളും സമാനമായ രോഗലക്ഷണങ്ങൾക്കും കാരണമാകാം.

To advertise here,

പല അണുബാധകളും സാധാരണയായി ഗൗരവമുള്ളതല്ലെങ്കിലും, ചിലപ്പോഴൊക്കെ അവ ഗുരുതരമായി മാറാൻ സാധ്യതയുണ്ട്. ചെറിയ കുട്ടികൾ, പ്രായമായവർ, ഗർഭിണികൾ, പ്രമേഹം, ഹൃദ്രോഗം അല്ലെങ്കിൽ ശ്വാസകോശ സംബന്ധമായ രോഗങ്ങളുള്ളവർ എന്നിവർ പ്രത്യേകം ശ്രദ്ധിക്കണം.

ലക്ഷണങ്ങൾ

  • പെട്ടെന്നുള്ള പനിയും കൂടെ കടുത്ത വിറയലും അനുഭവപ്പെടാം.
  • വരണ്ട ചുമയും തൊണ്ടവേദനയും
  • മൂക്കൊലിപ്പ് അല്ലെങ്കിൽ മൂക്കടപ്പ്
  • തലവേദന, ശരീരവേദന, കടുത്ത ക്ഷീണം
  • വിശപ്പില്ലായ്മ അല്ലെങ്കിൽ ഓക്കാനം, പ്രത്യേകിച്ച് കുട്ടികളിൽ

എങ്ങനെ പടരുന്നു

രോഗബാധിതനായ ഒരാൾ ചുമയ്ക്കുകയോ തുമ്മുകയോ സംസാരിക്കുകയോ ചെയ്യുമ്പോഴാണ് പ്രധാനമായും പനി പടരാനിടവരുന്നത്. മലിനമായ പ്രതലങ്ങളിൽ സ്പർശിച്ച ശേഷം മുഖം, മൂക്ക് അല്ലെങ്കിൽ വായ എന്നിവ സ്പർശിക്കുന്നതിലൂടെയും രോഗം പടരാം. തിരക്കേറിയതും അടഞ്ഞതും വായുസഞ്ചാരം കുറഞ്ഞതുമായ സ്ഥലങ്ങൾ അസുഖം പകരാനുള്ള സാധ്യത വർധിപ്പിക്കുന്നു.

സ്വയരക്ഷ എങ്ങനെ

  • എല്ലാ വർഷവും വാക്സിനേഷൻ എടുക്കുക. ഇൻഫ്ലുവൻസ തടയാനുള്ള ഏറ്റവും നല്ല മാർഗമാണിത്.
  • സോപ്പും വെള്ളവും ഉപയോഗിച്ച് പതിവായി കൈകൾ കഴുകുക, അല്ലെങ്കിൽ ഹാൻഡ് സാനിറ്റൈസർ ഉപയോഗിക്കുക.
  • രോഗലക്ഷണങ്ങൾ ഉണ്ടെങ്കിൽ മാസ്ക് ധരിക്കുക, മറ്റുള്ളവരുമായി ഇടപഴകുന്നത് ഒഴിവാക്കുക.
  • ചുമയ്ക്കുമ്പോഴോ തുമ്മുമ്പോഴോ വായും മൂക്കും മൂടുക.
  • മുറികൾ നല്ലവണ്ണം വായുസഞ്ചാരമുള്ളതാക്കുക, അത്യാവശ്യമില്ലാത്ത സന്ദർശകരെ ഒഴിവാക്കുക.
  • നന്നായി വെള്ളം കുടിക്കുകയും, ആരോഗ്യകരമായ ഭക്ഷണശീലങ്ങൾ പതിവാക്കുകയും ചെയ്യുക. പ്രതിരോധശേഷി നിലനിർത്താൻ മതിയായ വിശ്രമവും ഉറപ്പുവരുത്തുക.

ഇക്കാര്യങ്ങൾ ശ്രദ്ധിക്കാം

  • പനി വന്നാൽ നന്നായി വിശ്രമിക്കുകയും ചുക്കുകാപ്പി പോലുള്ള നാടൻ പരിഹാരങ്ങൾ തേടുകയും ചെയ്യാം.
  • ചെറുചൂടുള്ള വെള്ളം, സൂപ്പ് അല്ലെങ്കിൽ ഹെർബൽ ടീ പോലുള്ള ധാരാളം ദ്രാവകങ്ങൾ കുടിക്കുക.
  • പനിയും ശരീരവേദനയും കുറയ്ക്കാൻ ഒരു ഡോക്ടറുടെ നിർദേശത്തോടെ പാരസെറ്റമോൾ ഉപയോഗിക്കുക.
  • മൂക്കിലും തൊണ്ടയിലും ഉണ്ടാകുന്ന അസ്വസ്ഥതയ്ക്ക് ആവി കൊള്ളുകയും ഉപ്പുവെള്ളത്തിൽ വായ കഴുകുകയും ചെയ്യുക.
  • ലഘുവായതും പോഷകസമൃദ്ധവുമായ ഭക്ഷണം കഴിക്കുക.

എപ്പോഴാണ് വൈദ്യസഹായം തേടേണ്ടത്

  • ശ്വാസതടസ്സം അല്ലെങ്കിൽ നെഞ്ചുവേദനയുണ്ടെങ്കിൽ
  • മൂന്ന് ദിവസത്തിൽ കൂടുതൽ നീണ്ടുനിൽക്കുന്ന സ്ഥിരമായ ഉയർന്ന പനി
  • മയക്കം അല്ലെങ്കിൽ തളർച്ച അനുഭവപ്പെടുന്നുണ്ടെങ്കിൽ
  • ഭക്ഷണം കഴിക്കാൻ കഴിയുന്നില്ലെങ്കിൽ, അല്ലെങ്കിൽ നിർജ്ജലീകരണം സംഭവിച്ചാൽ
  • രക്തം കലർന്ന കഫത്തോടുകൂടിയ ചുമ
  • കുട്ടികളിൽ: വേഗത്തിലുള്ള ശ്വാസോച്ഛ്വാസം, ഭക്ഷണം കഴിക്കാൻ വിസമ്മതിക്കുക, അല്ലെങ്കിൽ അമിതമായ ഉറക്കം
  • പ്രായമായവരിലോ ഗർഭിണികളിലോ: പെട്ടെന്ന് വഷളാകുന്ന ഏതെങ്കിലും ലക്ഷണം

 

(കാലിക്കറ്റ് ഹോസ്പിറ്റൽ ആന്റ് നഴ്സിങ് ഹോമിലെ ജനറൽ മെഡിസിൻ വിഭാഗം സീനിയർ കൺസൾട്ടന്റ് ആണ് ലേഖകൻ)