ബ്രേക്ക്ഫാസ്റ്റിനെന്താ?; സമയമില്ലെന്ന ആധി വേണ്ട, പോഷകപ്രദമായ എഗ്ഗ് ബൈറ്റുകൾ തയ്യാറാക്കാം

തിരക്കേറിയ സമയങ്ങളിൽ പെട്ടെന്ന് പാകംചെയ്ത് കഴിക്കാമെന്നതാണ് മുട്ടകൊണ്ടുള്ള വിഭവങ്ങൾ ജനപ്രിയമാകുന്നതിനുള്ള ഒരു കാരണം. പല രുചികളുമായി യോജിക്കുകയും ചെറിയ അളവിൽ പോലും നല്ല പോഷകങ്ങൾ നൽകുന്നുവെന്നതും ഭക്ഷണത്തിൽ മുട്ട ഉൾപ്പെടുത്താനുള്ള മറ്റ് കാരണങ്ങളാണ്.

ഓംലെറ്റുകൾ, മുട്ട തോരൻ, ബേക്ക് ചെയ്ത കസ്റ്റാർഡുകൾ തുടങ്ങി നമുക്ക് സുപരിചിതമായ മുട്ട അടിസ്ഥാനമാക്കിയുള്ള വിഭവങ്ങൾ ഒരുപാടുണ്ട്. അതിലൊന്നാണ് എഗ്ഗ് ബൈറ്റുകൾ. 

മുട്ടകളിൽ കൂടുതൽ പ്രോട്ടീൻ ഉള്ളതിനാൽ പേശീബലത്തെ പിന്തുണയ്ക്കുകയും വിശപ്പ് നിയന്ത്രിക്കാൻ സഹായിക്കുകയും ചെയ്യുന്നു. തലച്ചോറിന്റെ പ്രവർത്തനത്തെയും ഊർജ ഉപാപചയത്തെയും പിന്തുണയ്ക്കുന്ന കോളിൻ, വിറ്റാമിൻ ബി12 പോലുള്ള അവശ്യ പോഷകങ്ങളും അവയിൽ അടങ്ങിയിട്ടുണ്ട്. അതുകൊണ്ടുതന്നെ പ്രഭാതഭക്ഷണമായി എഗ്ഗ് ബൈറ്റുകൾ തിരഞ്ഞെടുക്കാം.

പച്ചക്കറികൾ, മിതമായ അളവിൽ സുഗന്ധവ്യഞ്ജനങ്ങൾ തുടങ്ങി ലളിതമായ ചേരുവകളോടൊപ്പം ഇത് പാചകംചെയ്യാം. ശരീരഭാരം നിയന്ത്രിക്കുന്നവർക്കും കലോറി ഉപഭോഗത്തിൽ ശ്രദ്ധിക്കുന്നവർക്കുമെല്ലാം എഗ്ഗ് ബൈറ്റ് ഉപകാരപ്രദമാണ്. പ്രോട്ടീൻ നിറഞ്ഞ പലഹാരമാണ് എഗ്ഗ് ബൈറ്റുകൾ. ഇവ കഴിച്ചാൽ കൂടുതൽ നേരം വയറുനിറഞ്ഞതായി അനുഭവപ്പെടുന്നു. ചെറിയ എഗ്ഗ് ബൈറ്റുകൾ സൂക്ഷിക്കാനും വീണ്ടും ചൂടാക്കാനും യാത്രയ്ക്കിടയിൽ കഴിക്കാനും സൗകര്യപ്രദമാണ്.

എഗ്ഗ് ബൈറ്റുകൾ തയ്യാറാക്കുന്ന വിധം 
എട്ട് എഗ്ഗ് ബൈറ്റുകൾ തയ്യാറാക്കാൻ ആവശ്യമായ ചേരുവകൾ എന്തെല്ലാമാണെന്ന് നോക്കാം.
മുട്ട - 6 എണ്ണം
പാൽ അല്ലെങ്കിൽ തൈര് - ¼ കപ്പ്
ഉള്ളി, ചെറുതായി അരിഞ്ഞത് - 2 ടേബിൾസ്പൂൺ
ക്യാപ്‌സിക്കം അല്ലെങ്കിൽ ചീര, ചെറുതായി അരിഞ്ഞത് - 2 ടേബിൾസ്പൂൺ
പുഴുങ്ങിയ ചോളം അല്ലെങ്കിൽ ഗ്രേറ്റ് ചെയ്ത കാരറ്റ് - 2 ടേബിൾസ്പൂൺ
കുരുമുളക് പൊടി - ¼ ടീസ്പൂൺ
ഉപ്പ് - ആവശ്യത്തിന്
എണ്ണ അല്ലെങ്കിൽ നെയ്യ് - 1 ടീസ്പൂൺ

തയ്യാറാക്കുന്ന വിധം 
ഓവൻ 180°C ൽ പ്രീഹീറ്റ് ചെയ്യുക, മഫിൻ ട്രേകളിൽ എണ്ണ പുരട്ടുക. ഒരു പാത്രത്തിൽ മുട്ട പൊട്ടിച്ച് പാൽ അല്ലെങ്കിൽ തൈര് ചേർത്ത് നന്നായി അടിച്ചെടുക്കുക. ശേഷം അരിഞ്ഞ പച്ചക്കറികൾ, ഉപ്പ്, കുരുമുളക് എന്നിവ ചേർത്ത് അത് നന്നായി യോജിപ്പിക്കുക. എണ്ണ പുരട്ടിയ മൗൾഡുകളിൽ മിശ്രിതം ഒഴിക്കുക. ഓരോന്നും ഏകദേശം ¾ ഭാഗം നിറയ്ക്കുക. ട്രേ ഓവനിൽ വെച്ച് 15-18 മിനിറ്റ് നേരം ബേക്ക് ചെയ്യുക.

പുറത്തെടുത്ത് ചെറുതായി തണുത്ത ശേഷം മൗൾഡിൽ നിന്ന് മാറ്റുക. പാകമായ വിഭവം വായു കടക്കാത്ത പാത്രത്തിൽ സൂക്ഷിക്കുകയും ആവശ്യമെങ്കിൽ വീണ്ടും ചൂടാക്കി ഉപയോഗിക്കുകയും ചെയ്യാം.