'എനിക്കൊരു സ്‌ട്രോങ് ചായ, എനിക്ക് മീഡിയം, എനിക്ക് പാൽ കുറച്ച്, എനിക്ക് തേയില കൂട്ടി, ഒരു വിത്ത്ഔട്ട്, വെള്ളം കുറച്ച് പാല് കൂട്ടി മീഡിയം മധുരത്തില്‍ നല്ല സ്‌ട്രോങ്ങില്‍ അടിക്കാതൊരു ചായ, എനിക്ക് പാല് കൂട്ടി പഞ്ചസാര കുറച്ച്, വെള്ളം കൂട്ടി കടുപ്പം കുറച്ച്, ഒരു വെറുംചായ'... സ്വന്തം ലേഖകന്‍ ( സ്വ.ലേ) എന്ന ചിത്രത്തില്‍ ചായക്കാരൻ ഗോവിന്ദൻ (ജഗതി ശ്രീകുമാർ) ഇതുകേട്ട് ഞെട്ടുന്ന രംഗം ഓര്‍ക്കാത്തവര്‍ വിരളമാണ്.
ഏതാണ് നല്ല ചായ എന്ന ചോദ്യത്തിനുത്തരം പലതാണെങ്കിലും ചായ കുടിക്കാന്‍ പോകാം എന്ന ചോദ്യത്തിന് ചായ പ്രേമികള്‍ക്ക് ഒരുത്തരമേ ഉണ്ടാകു. ഔദ്യോഗികമല്ലെങ്കിലും ഇന്ത്യയുടെ ദേശീയപാനീയമായാണ് ചായയെ കണക്കാക്കുന്നത്. ലോകത്ത് ഏറ്റവും അധികം ആളുകള്‍ കുടിക്കുന്ന പാനീയം എന്ന ഖ്യാതിയും ചായയ്ക്കു തന്നെ. ലോക ഭക്ഷ്യ കാര്‍ഷിക സംഘടന മെയ് 21-നാണ് ലോക ചായ ദിനമായി ആചരിക്കുന്നത്.
തെക്കന്‍ ചൈന, ചൈനയിലെ യുനാന്‍ പ്രവിശ്യ, ഇന്ത്യയിലെ അസം എന്നീ പ്രദേശങ്ങള്‍ കേന്ദ്രീകരിച്ചാണ് തേയിലയുടെ ഉത്പത്തിയെന്നാണ് ശാസ്ത്രീയ പഠനങ്ങൾ പറയുന്നത്. 5000 വര്‍ഷങ്ങളോളം മുമ്പ് ചൈനയില്‍ ഔഷധമായും പാനീയമായും തേയില ഉപയോഗിച്ചിരുന്നതായാണ് ചരിത്രരേഖകള്‍ പറയുന്നത്.
വീണ്ടും വീണ്ടും ചായ കുടിക്കാന്‍ തോന്നുന്നതിനുമുണ്ടൊരു ശാസ്ത്രം
Camellia Senesis എന്നാണ് തേയിലച്ചെടിയുടെ ശാസ്ത്രീയനാമം. തേയില ഇലയില്‍ ഒട്ടേറെ ഘടകങ്ങളുണ്ട്. അവയാണ് ചായയ്ക്ക് മണവും രുചിയും ഉന്മേഷദായകശേഷിയുമൊക്കെ നല്‍കുന്നത്. 'പോളിഫീനോളുകള്‍' എന്ന ഔഷധഗുണമുള്ള ഘടകങ്ങള്‍ തേയിലയില്‍ കാണപ്പെടുന്നു. തേയിലയിലുള്ള 'മീതൈല്‍ സാന്തീന്‍' എന്ന വിഭാഗത്തില്‍പ്പെടുന്ന 'കഫീ'നാണ് തലച്ചോറി നെയും നാഡീവ്യവസ്ഥയെയും ഉത്തേജിപ്പിക്കുന്നത്.
ഇവകൂടാതെ 'ക്ലോറോഫില്‍' ഉള്‍പ്പെടെയുള്ള വര്‍ണകങ്ങള്‍, എന്‍സൈമുകള്‍, ബാഷ്പീകരണ ശേഷിയുള്ള എണ്ണകള്‍, വിറ്റാമിനുകള്‍, ധാതുക്കള്‍ എന്നിവയൊക്കെ തേയിലയിലുണ്ട്. തേയിലയില, സംസ്‌കരണത്തിന്റെ പല ഘട്ടങ്ങള്‍ പിന്നിട്ടാണ് ഗ്രീന്‍ ടീ, ബ്ലാക്ക് ടീ, വൈറ്റ് ടീ, ഊലോങ് ടീ തുടങ്ങിയ പലതരം തേയിലകളായി മാറുന്നത്.
ഇന്ത്യ ചായഭൂപടത്തില്‍
ബ്രിട്ടീഷ് അധിനിവേശക്കാലത്താണ് ഇന്ത്യയില്‍ തേയിലത്തോട്ടങ്ങള്‍ വ്യാപകമാകുന്നത്. ചൈനയെ ആശ്രയിക്കാതെ തേയില സ്വയം വിളയിക്കുക എന്ന ലക്ഷ്യമായിരുന്നു ബ്രിട്ടീഷുകാര്‍ക്ക്. സിങ്‌ഫോ ഗോത്രജനങ്ങള്‍ വളര്‍ത്തിയിരുന്ന 'അസം തേയില' അവര്‍ പരീക്ഷണാടിസ്ഥാനത്തില്‍ നട്ടുപിടിപ്പിച്ചു. 1837-ല്‍ അതിന്റെ പരീക്ഷണക്കൃഷി വിജയിച്ച തോടെ അസമില്‍ തേയില എസ്റ്റേറ്റുകള്‍ ഒന്നൊ ന്നായി നിലവില്‍വന്നു. തമിഴ്നാട്ടിലെ നീലഗിരി, ഹിമാചല്‍പ്രദേശിലെ കാംഗ്ര തുടങ്ങി പലയിടങ്ങളിലേക്ക് തേയില എസ്റ്റേറ്റുകള്‍ വ്യാപിച്ചു.
ചീനരുടെ ചായ നമ്മുടെ ചായ
ലോകത്തെ തേയില ഉത്പാദകരില്‍ ഇന്ത്യ രണ്ടാമതാണ്. ചൈനയാണ് ഒന്നാമത്.. ചാ എന്നാണ് ചൈനയിലെ ചായയുടെ അപരനാമം. നമ്മുടെ ചായയും ഹിന്ദിയിലെ ചായ്‌യുമൊക്കെ ഈ വാക്കില്‍ നിന്നുണ്ടായതാണ്
Content Highlights: Discover the history, science, and cultural significance of tea, the world`s most popular beverage
Published: 21 May 2025, 11:43 am IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented