വരണ്ട ചര്‍മവും മുടി കൊഴിച്ചിലും ; ഡയറ്റില്‍ വേണ്ടത് വിറ്റാമിന്‍ ഇ അടങ്ങിയ ഭക്ഷണങ്ങള്‍

ചര്‍മപ്രശ്നങ്ങളും മുടികൊഴിച്ചിലുമെല്ലാം നമ്മളില്‍ പലരേയും അലട്ടുന്ന പ്രശ്നമാണ്. ശരീരത്തിന്റെ ആരോഗ്യത്തിനും ചര്‍മത്തിന്റെ ആരോഗ്യത്തിനും ഒരുപോലെ വേണ്ട ഒന്നാണ് വിറ്റാമിന്‍ 'ഇ'. തലമുടിയുടെ ആരോഗ്യത്തിനും വിറ്റാമിന്‍-ഇ വളരെ പ്രധാനപ്പെട്ടതാണ്. വിറ്റാമിന്‍ ഇ കുറഞ്ഞാല്‍ പല പ്രശ്നങ്ങളും ഉണ്ടാകും. 

വിറ്റാമിന്‍ ഇ-യുടെ കുറവു മുടികൊഴിച്ചില്‍, വരണ്ട ചര്‍മം എന്നിവയ്ക്കും കാരണമാകും.  വിറ്റാമിന്‍ ഇ-യില്‍ അടങ്ങിയിരിക്കുന്ന ആന്റി ഓക്സിഡന്റുകളാണ് ചര്‍മസംരക്ഷണത്തിന് ഗുണം ചെയ്യുന്നത്. സൂര്യപ്രകാശം മൂലമുണ്ടാകുന്ന ചര്‍മപ്രശ്നങ്ങളില്‍ നിന്ന് സംരക്ഷിക്കാനും ഇവയ്ക്ക് കഴിവുണ്ട്. വിറ്റാമിന്‍ 'ഇ' അടങ്ങിയ ചില ഭക്ഷണങ്ങള്‍ അറിഞ്ഞിരിക്കാം

ബദാം വിറ്റാമിന്‍ ഇ-യുടെ നല്ലൊരു ഉറവിടമാണ്. മഗ്നീഷ്യം, അയണ്‍, നാരുകള്‍ തുടങ്ങിയവ അടങ്ങിയ ബദാം കഴിക്കുന്നത് കൊളസ്ട്രോള്‍ കുറയ്ക്കാനും ഹൃദയാരോഗ്യം സംരക്ഷിക്കാനും ഗുണകരമാണ്. കൂടാതെ ചര്‍മത്തിന്റെയും തലമുടിയുടെയും ആരോഗ്യത്തിനും ഇവ കഴിക്കുന്നത് വളരെ നല്ലതാണ്.

പപ്പായയിലും  വിറ്റാമിന്‍ ഇ-യും സി-യും ധാരാളം അടങ്ങിയിട്ടുണ്ട്. അതിനാല്‍ ഇവ ഡയറ്റില്‍ ഉള്‍പ്പെടുത്തുന്നതും ചര്‍മത്തിന്റെയും തലമുടിയുടെയും  ആരോഗ്യത്തിന് വളരേയേറെ ഗുണം ചെയ്യും.

ഫൈബറും മഗ്നീഷ്യവും വിറ്റാമിന്‍ ഇ-യും അടങ്ങിയ സൂര്യകാന്തി വിത്തുകളും ഡയറ്റില്‍ പതിവാക്കാം. ഉയര്‍ന്ന രക്തസമ്മര്‍ദ്ദത്തെ കുറയ്ക്കാന്‍ ഇത് ഗുണം ചെയ്യും. ഹൃദയാരോഗ്യം സംരക്ഷിക്കാനും രോഗ പ്രതിരോധശേഷി കൂട്ടാനും ഇവ ഗുണം ചെയ്യും.

വിറ്റാമിന്‍ ഇ-യും സി-യും മഗ്നീഷ്യവും ഫോളേറ്റും മറ്റ് പോഷകങ്ങളും അടങ്ങിയ ചീര നിര്‍ബന്ധമായും ഡയറ്റില്‍ വേണ്ട ഭക്ഷണമാണ്. ചര്‍മത്തിന്റെ ആരോഗ്യം സംരംക്ഷിക്കുന്നതില്‍ ഇതിന് വലിയ പങ്കുണ്ട്. ചീര ശരീരത്തിന്റെ മൊത്തത്തിലുള്ള ആരോഗ്യത്തിനും ഗുണം ചെയ്യും.

വിറ്റാമിന്‍ ഇ കൊണ്ട് സമ്പന്നമായ ഭക്ഷണമാണ് നിലക്കടല. ഇതില്‍ മറ്റ് പോഷകങ്ങളും അടങ്ങിയിട്ടുണ്ട്. നിലക്കടല ഡയറ്റില്‍ ഉള്‍പ്പെടുത്തുന്നതും
ചര്‍മത്തിന്റെ ആരോഗ്യ സംരംക്ഷണത്തിന് വലിയ ഗുണം ചെയ്യും.

(ശ്രദ്ധിക്കുക: ആരോഗ്യ വിദഗ്ധന്റെയോ ന്യൂട്രീഷനിസ്റ്റിന്റെയോ ഉപദേശം തേടിയ ശേഷം മാത്രം ഭക്ഷണക്രമത്തില്‍ മാറ്റം വരുത്തുക)