ഉണർന്നാലുടൻ കുടിക്കുന്ന കാപ്പി മുതൽ ശീതള പാനീയങ്ങളിലും ജങ്ക് ഫുഡുകളിലും പാക്കേജ് ഫുഡുകളിലും പഞ്ചസാരയുണ്ട്. സർവവ്യാപിയാണ് ഈ വൈറ്റ് പോയ്‌സൺ. അമിതമായി പഞ്ചസാര കഴിക്കുന്നത് രക്തത്തിലെ പഞ്ചസാരയുടെ നിയന്ത്രണം, ഇൻസുലിൻ പ്രതിരോധം, കരളിന്റെ ആരോഗ്യം, വിശപ്പ്, ദീർഘകാല മെറ്റബോളിക് ആരോഗ്യം എന്നിവയെ ബാധിക്കാം. അത്രമേൽ അപകടകാരിയാണോ പഞ്ചസാര? വല്ലപ്പോഴും മധുരം കഴിക്കുന്നതിൽ തെറ്റില്ല എന്നാൽ പഞ്ചസാര ചേർത്ത പാനീയങ്ങളിലൂടെയും അതിവേഗം സംസ്‌കരിച്ച ഭക്ഷണങ്ങളിലൂടെയും വലിയ അളവിൽ പഞ്ചസാര തുടർച്ചയായി ശരീരത്തിലെത്തുകയാണെങ്കിൽ അതല്പം അപകടം തന്നെയാണെന്ന് വിദഗ്ധരുടെ അഭിപ്രായം. അതായത് പഞ്ചസാരയേക്കാൾ അത് കഴിക്കുന്ന രീതിയാണ് അപകടം വരുത്തിവയ്ക്കുന്നത്.

To advertise here,

ശരീരത്തിന് ഊർജ്ജം നൽകുന്ന പ്രധാന സ്രോതസ്സാണ് ഗ്ലൂക്കോസ്. നാരുകളും പോഷകങ്ങളും അടങ്ങിയ സമീകൃതാഹാരം ഇല്ലാതെ വലിയ അളവിൽ പഞ്ചസാര ഇടയ്ക്കിടെ കഴിക്കുമ്പോഴാണ് പ്രശ്‌നം ഉണ്ടാകുന്നത്. പഞ്ചസാര ചേർത്ത പാനീയം, മധുരമുള്ള കാപ്പി അല്ലെങ്കിൽ പാക്കേജ് ചെയ്ത ജ്യൂസ് എന്നിവ മിനിറ്റുകൾക്കുള്ളിൽ രക്തത്തിലെ പഞ്ചസാര ഉയർത്തും. ഇത് പാൻക്രിയാസിനെ ഇൻസുലിൻ പുറത്തുവിടാൻ പ്രേരിപ്പിക്കും. ക്രമേണ ഇത് ആവർത്തിക്കുമ്പോൾ, ശരീരം ഇൻസുലിനോട് പ്രതികരിക്കുന്നത് കുറയും. ഇൻസുലിൻ പ്രതിരോധം കുറയുന്നത് ടൈപ്പ് ടു ഡയബറ്റിസിലേക്ക് നയിക്കും.

പഞ്ചസാര കരളിനെ ബാധിക്കുമോ?

പഞ്ചസാര രക്തത്തിലെ ഗ്ലൂക്കോസിനെ മാത്രമല്ല ബാധിക്കുന്നത്. അമിതമായ അളവിലുള്ള ഉപയോഗം, പ്രത്യേകിച്ച് പഞ്ചസാര ചേർത്ത പാനീയങ്ങൾ കരളിന് ആയാസമുണ്ടാക്കും. ഫ്രക്ടോസ് പ്രധാനമായും കരളാണ് സംസ്‌കരിക്കുന്നത്. ഇത് അമിതമായി ശരീരത്തിലെത്തിയാൽ കൊഴുപ്പായി മാറാം. സ്ഥിരമായി ഉയർന്ന അളവിൽ ശരീരത്തിലെത്തിയാൽ കരളിലെ കൊഴുപ്പ് വർദ്ധിപ്പിക്കാനും ട്രൈഗ്ലിസറൈഡ് അളവ് കൂടാനും വയറിലെ

അമിതവണ്ണത്തിനും ഇത് കാരണമായേക്കാം. അമിതമായ പഞ്ചസാര ഉപഭോഗവും ഫാറ്റി ലിവർ രോഗം പോലുള്ള മെറ്റബോളിക് അവസ്ഥകളും തമ്മിലുള്ള ബന്ധത്തെക്കുറിച്ചുള്ള ആശങ്കകൾ ഉയരുന്നത് ഇവിടെയാണ്.

ദ് ബിഎംജെയിൽ പ്രസിദ്ധീകരിക്കപ്പെട്ട ഒരു പഠനത്തിൽ ഉയർന്ന പഞ്ചസാര ഉപഭോഗം ശരീരഭാരം വർധിക്കുന്നതിനും ഹൃദയ സംബന്ധമായ അപകടസാധ്യതതകൾക്കും സാധ്യത ഉയർത്തുന്നതായി പറയുന്നുണ്ട്. എന്നാൽ പഞ്ചസാര ചേർത്ത പാനീയങ്ങളെയാണ് പഠനം പ്രധാനമായും ലക്ഷ്യം വയ്ക്കുന്നത്. അതായത് പഞ്ചസാര അടങ്ങിയ എല്ലാ ഭക്ഷണ പദാർഥങ്ങളെയും സമാന രീതിയിൽ പരിഗണിക്കേണ്ടതില്ലെന്ന് അർഥം.

പഴങ്ങളിൽ സ്വാഭാവികമായി പഞ്ചസാര അടങ്ങിയിട്ടുണ്ടെങ്കിലും, അവ ഫൈബർ, വെള്ളം, വിറ്റാമിനുകൾ, ധാതുക്കൾ, ആന്റിഓക്‌സിഡന്റുകൾ എന്നിവയും നൽകുന്നുണ്ട്. എന്നാൽ പഴച്ചാറ് വ്യത്യസ്തമാണ്. ചേർക്കാത്ത പഞ്ചസാര അടങ്ങിയിട്ടുണ്ടെങ്കിൽ പോലും, ജ്യൂസ് ചെയ്യുമ്പോൾ പഴത്തിന്റെ ഭൂരിഭാഗം ഭൗതിക ഘടനയും നഷ്ടപ്പെടും സ്വാഭാവികമായും വലിയ അളവിൽ പഞ്ചസാര ശരീരത്തിലെത്തുന്നതിന് ഇത് കാരണമാവുകയും ചെയ്യും.

ശർക്കര പഞ്ചസാരയേക്കാൾ ആരോഗ്യകരമാണോ?

സംസ്‌കരിച്ച വെളുത്ത പഞ്ചസാരയ്ക്ക് പകരമായുള്ള ആരോഗ്യകരമായ ബദലായാണ് ശർക്കര, തേൻ, ബ്രൗൺ ഷുഗർ എന്നിവ വിൽക്കപ്പെടുന്നത്.ഈ ഉൽപ്പന്നങ്ങളിൽ ചിലതിൽ ചെറിയ അളവിൽ ധാതുക്കളോ മറ്റ് സംയുക്തങ്ങളോ അടങ്ങിയിരിക്കാമെങ്കിലും, അവ പ്രധാനമായും പഞ്ചസാരയുടെ ഉറവിടങ്ങളാണ്. അതായത് 'പ്രകൃതിദത്തം' എന്നതുകൊണ്ട് അത് ദോഷകരമല്ലെന്നല്ല അർഥമാക്കുന്നത്. വെളുത്ത പഞ്ചസാരയ്ക്ക് പകരം കൂടുതൽ അളവിൽ ശർക്കര ഉപയോഗിച്ചാൽ അത് ഗുണം ചെയ്യില്ലെന്ന് അർഥം. മധുരമുള്ള പാനീയങ്ങൾ, പാക്കേജ്ഡ് ജ്യൂസുകൾ, ബിസ്‌കറ്റുകൾ, പ്രഭാത ഭക്ഷണ ധാന്യങ്ങൾ, സോസുകൾ, ഫ്‌ലേവേർഡ് പാലുല്പ്പന്നങ്ങൾ, മറ്റ് സംസ്‌കരിച്ച ലഘുഭക്ഷണങ്ങൾ എന്നിവയുൾപ്പെടെ സാധാരണയായി കഴിക്കുന്ന ഭക്ഷണപാനീയങ്ങളിൽ നിന്നെല്ലാം ശരീരത്തിൽ പഞ്ചസാരയെത്തും.

പഞ്ചസാര പൂർണമായും ഒഴിവാക്കേണ്ടതുണ്ടോ?

എല്ലാവരും പഞ്ചസാര പൂർണമായി ഒഴിവാക്കേണ്ടതില്ല. അമിതമായ ഉപഭോഗം കുറയ്ക്കുന്നതിലാണ് ശ്രദ്ധിക്കേണ്ടത്. പഞ്ചസാര പാനീയങ്ങൾ കുറയ്ക്കുക, ജ്യൂസിന് പകരം പഴങ്ങൾ കഴിക്കുക. കുറഞ്ഞ അളവിൽ സംസ്‌കരിച്ച ഭക്ഷണങ്ങൾ കഴിക്കുക എന്നിവയാണ് പ്രധാനം.ആരോഗ്യകരമായ ഭക്ഷണം എന്നതിന്റെ അർഥം മധുരം കഴിക്കരുതെന്നല്ല. ആഡഡ് ഷുഗർ വിഭവങ്ങൾ എന്നും ശീലമാക്കാതെ വല്ലപ്പോഴും ശരീരത്തിന് നൽകുന്ന റിവാർഡ് ആക്കി നിർത്തുക. മറിച്ച് ദൈനംദിന ശീലത്തിന്റെ ഭാഗമാകുകയാണെങ്കിൽ അത് ഒരു വലിയ ആരോഗ്യപ്രശ്‌നമായേക്കാം.