ബെംഗളൂരു: ഏഴ് പതിറ്റാണ്ടുകൾക്ക് ശേഷം കർണാടകയുടെ മണ്ണിലേക്ക് ചീറ്റപ്പുലികൾ മടങ്ങിയെത്തുന്നു. വംശനാശത്തെത്തുടർന്ന് 1952-ൽ ഇന്ത്യയിൽ ഇല്ലാതായ ചീറ്റകളെ തിരിച്ചുകൊണ്ടുവരാനുള്ള കേന്ദ്ര സർക്കാരിന്റെ പദ്ധതിയായ 'പ്രൊജക്ട് ചീറ്റ'യുടെ ഭാഗമായി ദക്ഷിണാഫ്രിക്കയിൽനിന്ന് കൊണ്ടുവന്ന നാല് ചീറ്റകളെ ശനിയാഴ്ച ബെംഗളൂരുവിലെത്തിച്ചു.

To advertise here,

രണ്ട് ആൺ ചീറ്റകളും രണ്ട് പെൺ ചീറ്റകളുമാണ് ഈ സംഘത്തിലുള്ളത്. വെറ്ററിനറി വിദഗ്ധരുടെയും വനംവകുപ്പ് ഉദ്യോഗസ്ഥരുടെയും മേൽനോട്ടത്തിലാണ് ഇവയെ ഇന്ത്യയിലേക്ക് എത്തിച്ചത്. ബെംഗളൂരുവിനടുത്തുള്ള ബന്നാർഗട്ട നാഷണൽ പാർക്കിലേക്കാണ് ഈ ചീറ്റകളെ മാറ്റുന്നത്.

പുതിയ സാഹചര്യങ്ങളുമായും കാലാവസ്ഥയുമായും പൊരുത്തപ്പെടുന്നതിനായി ചീറ്റകളെ 30 ദിവസത്തെ ക്വാറന്റൈൻ കാലാവധിയിൽ നിരീക്ഷിക്കും. ഈ കാലയളവിൽ അവയുടെ ആരോഗ്യനില കൃത്യമായി പരിശോധിക്കുമെന്നും നിർദ്ദിഷ്ട ആഹാരക്രമം പിന്തുടരുമെന്നും കർണാടക വനം-പരിസ്ഥിതി മന്ത്രി ഈശ്വർ ബി. ഖന്ദ്രെ അറിയിച്ചു.

അണുബാധകളൊന്നുമില്ലെന്ന് ഉറപ്പുവരുത്തിയ ശേഷമായിരിക്കും ഇവയെ സുരക്ഷിതമായി ബന്നാർഗട്ടയിലേക്ക് മാറ്റുക. ചീറ്റകൾക്ക് യാതൊരുവിധ പ്രയാസങ്ങളും ഉണ്ടാകില്ലെന്ന് ഉറപ്പുവരുത്താൻ ഉദ്യോഗസ്ഥർക്ക് നിർദേശം നൽകിയിട്ടുണ്ടെന്നും അദ്ദേഹം കൂട്ടിച്ചേർത്തു.

2022-ൽ ആരംഭിച്ച പ്രൊജക്ട് ചീറ്റയുടെ ഭാഗമായി നേരത്തെ നമീബിയയിൽനിന്ന് എട്ട് ചീറ്റകളെ മധ്യപ്രദേശിലെ കുനോ നാഷണൽ പാർക്കിൽ എത്തിച്ചിരുന്നു. നിലവിൽ ഇന്ത്യയിലെ ആകെ ചീറ്റകളുടെ എണ്ണം 57 ആയി ഉയർന്നിട്ടുണ്ട്. പുതിയ സ്ഥലങ്ങളിലേക്ക് ചീറ്റകളെ എത്തിക്കുന്നതിനും ജനിതക വൈവിധ്യം ഉറപ്പാക്കുന്നതിനും ഓരോ വർഷവും 10-12 ചീറ്റകളെ ഇന്ത്യയിലെത്തിക്കാനാണ് പദ്ധതി ലക്ഷ്യമിടുന്നത്.