എട്ട് വര്‍ഷം 40,000 മരങ്ങള്‍; തരിശ്ഭൂമിയെ നിബിഡ വനമാക്കിയ 'കാടച്ഛന്‍'

ഇതിനായി ഒരുപാട് തൈകള്‍ നടുകയും അവ നനച്ച് പരിപാലിക്കുകയുമാണ് ആദ്യം ചെയ്തത്. തരിശുഭൂമിക്കും കാടായി മാറാന്‍ സാധിക്കുമെന്ന് അവര്‍ തന്റെ പ്രവൃത്തിയിലൂടെ തെളിയിക്കുകയായിരുന്നു. എഴുപത്തിനാല് വയസ്സുള്ള ഡോ. ഗാര്‍ഗ് നാരകം, ആര്യവേപ്പ്, അരയാല്‍ എല്ലാം നട്ടുവളര്‍ത്തി. പതിയെ പതിയെ മരങ്ങളുടെ എണ്ണം വര്‍ധിച്ചുവന്നു. 2016 മുതല്‍ 2024 വരെ എത്തിയപ്പോഴേക്കും 500-ല്‍ അധികം സ്പീഷിസുകളില്‍പെട്ട 40,000 മരങ്ങളാണ് അവിടെയുണ്ടായത്. അങ്ങനെ ശങ്കര്‍ലാല്‍ ഇന്‍ഡോറിന്റെ കാടച്ഛനായി. തെങ്ങ്, ആപ്പിള്‍, രുദ്രാക്ഷം, ഒലീവ്, ലിച്ചി, കുങ്കുമപ്പൂവ്, അമേരിക്കന്‍ ടുലിപ്സ്, ഏലക്കായ തുടങ്ങി നിരവധി മരങ്ങളും ചെടികളും അതിലുള്‍പ്പെടുന്നു. 

തേക്ക്, ചന്ദനം, മഹാഗണി, ദേവദാരു, പൈന്‍, സില്‍വര്‍ ഓക്ക് തുടങ്ങി 12 ഫീറ്റിലധികം ഉയരമുള്ള 15,000 മരങ്ങളും ഇവിടെയുണ്ട്. ഇവയ്ക്കൊന്നും അധികമായി വളമോ മറ്റോ ചേര്‍ക്കുന്നില്ല. മഴവെള്ളത്തിലെ സള്‍ഫറും നൈട്രജനുമാണ് ഈ വനത്തിലെ ചെടികള്‍ക്കും മരങ്ങള്‍ക്കും കരുത്ത് പകരുന്നതെന്നാണ് ഡോ. ഗാര്‍ഗ് പറയുന്നത്.

കുങ്കുമപ്പൂവില്‍ നിന്നുമാണ് കേശര്‍ പര്‍വത് എന്ന പേര് വന്നത്. 2021-ല്‍ 25 കുങ്കുമപ്പൂക്കളായിരുന്നു ഈ വനത്തിലുണ്ടായിരുന്നത്. അത് 2022-ല്‍ നൂറും തൊട്ടടുത്ത വര്‍ഷം അഞ്ച് മടങ്ങുമായി വര്‍ധിച്ചു. എന്നാല്‍ കടുത്ത വരള്‍ച്ച നേരിട്ട സാഹചര്യവുമുണ്ടായിരുന്നു. ഇത് പരിഹരിക്കാനായി 600 ഫീറ്റില്‍ ഭൂമി കുഴിച്ചെങ്കിലും നിരാശയായിരുന്നു ഫലം. തുടര്‍ന്ന് വെള്ളം ടാങ്കില്‍ കൊണ്ടുവന്ന് നനയ്ക്കുകയായിരുന്നു. പിന്നീട് ജലസംഭരണത്തിനായി ഒരു കുളം കുഴിച്ചു. ഡ്രിപ്പ് ഇറിഗേഷന്‍ വഴി ചെടികള്‍ക്കും ഇതേ വെള്ളമാണ് ഉപയോഗിച്ച് വരുന്നത്.

സസ്യജാലങ്ങള്‍ ജന്തുജാലങ്ങളെ ആകര്‍ഷിച്ചതിനാല്‍ ഇവിടെ മുപ്പതിലധികം കിളികളും 25 തരം പൂമ്പാറ്റകളും മുയല്‍, തോള്‍, കാട്ടുപന്നികള്‍, കുറുനരികള്‍, നീലക്കാളകള്‍, കഴുതപ്പുലി എന്നിവയുമുണ്ട്.കേശര്‍ പര്‍വതിലേക്കുള്ള പ്രവേശനം സൗജന്യമാണ്. മെഡിറ്റേഷനും ഒത്തുചേരലുകള്‍ക്കും എല്ലാമായി ആളുകളിവിടെ വരുന്നു. ശാരീരികവൈകല്യങ്ങളുള്ളവര്‍ക്ക് ക്രിക്കറ്റ്ഗ്രൗണ്ടും സെന്‍സറി ഗാര്‍ഡനും ഇവിടെ ഒരുക്കിയിട്ടുണ്ട്.

അമ്പതിനായിരം മരങ്ങള്‍ നട്ടുപിടിപ്പിക്കാനാണ് കേശര്‍ പര്‍വത് ലക്ഷ്യമിടുന്നത്. അതിനുവേണ്ടിയുള്ള ശ്രമത്തിലാണ് ഡോ. ഗാര്‍ഗും സംഘവും.