തീരദേശത്തെ കടലാക്രമണം: ഒരു ജനതയുടെ അതിജീവന പോരാട്ടം

ഒരു ജനതയുടെ കൂട്ടായ ശ്രമം

 ഞാൻ പതിയെ കടപ്പുറത്തെ ഈ വീടുകളെ ചിത്രീകരിക്കാൻ നടന്നു. റോഡിൽ നിന്ന് നൂറോ ഇരുന്നൂറോ മീറ്റർ അകലെയാണ് ഈ കോളനി. അടുത്തടുത്തായി സ്ഥിതിചെയ്യുന്ന മത്സ്യത്തൊഴിലാളി കുടുംബങ്ങളുടെ വീടുകൾ. കടലിന് അഭിമുഖമായി ഇരിക്കുന്ന വീടുകളുടെ മുറ്റത്തേക്കും ആർത്തിരമ്പി കടൽ കയറി വരുന്നുണ്ടായിരുന്നു. അവിടെയാകെ പണ്ട് കുറച്ചകലെ സ്ഥാപിച്ചിരുന്ന കൽഭിത്തികൾ തകർന്ന് കിടപ്പുണ്ട്. പല വീടുകളുടെയും ചുമരുകൾക്ക് മുന്നിൽ മണൽ നിറച്ച ചാക്കുകൾ അടുക്കി വെച്ചിരിക്കുന്നു. ഓഖിക്കു ശേഷം വന്ന കടൽക്ഷോഭങ്ങളിൽ കടലെടുത്ത വീടുകളുടെ അവശിഷ്ടങ്ങളും അവിടെ കാണാം.
 
ഉപരോധത്തിന് കൊണ്ടുപോയ ലോറൻസിൻ്റെ പഴയൊരു വള്ളം ആളുകൾ കൈവണ്ടിയിൽ തള്ളി കൊണ്ടുവന്ന് തീരത്തേക്ക് ഇറക്കുന്നത് കണ്ടു. അപ്പോഴേക്കും മണ്ണുമായി ഒരു ടിപ്പർ ലോറി വന്നു. ഈ വള്ളം കയറുകെട്ടി തീരത്തേക്ക് ഇറക്കുന്നത് കണ്ടപ്പോൾ ഈ കടൽക്ഷോഭ സമയത്ത് എന്തിനാണ് വള്ളത്തിനെ കടലിലേക്ക് കെട്ടിയിറക്കുന്നതെന്ന് എനിക്ക് മനസ്സിലായില്ല. കുറച്ചുനേരം ഞാൻ അവരുടെ പ്രവർത്തികൾ പകർത്തിക്കൊണ്ടിരുന്നു. ലോറൻസിന്റെ വീടിൻ്റെ തുമ്പത്ത് കുറച്ചു താഴ്ചയിലുള്ള തീരത്താണ് ഈ വള്ളം കെട്ടി വെക്കുന്നത്. അപ്പോഴേക്കും മണ്ണ് നിറയ്ക്കാനുള്ള വലിയ കുറച്ച് ചാക്കുകളുമായി പോലീസിൻ്റെ വാഹനം വന്നു. ഈ വലിയ ചാക്കുകളിലാണ് മണ്ണ് നിറച്ച് കടലിൻ്റെ തീരത്ത് വെക്കാൻ പോകുന്നത്. ആ വള്ളം അവിടെ കെട്ടി നിർത്തിയിരിക്കുന്നത് ഈ ചാക്കുകൾ വെക്കാൻ ഒരു പ്ലാറ്റ്ഫോം ഒരുക്കാനാണെന്ന് അപ്പോഴാണ് എനിക്ക് മനസ്സിലായത്. ലക്ഷക്കണക്കിന് രൂപ മുടക്കി നിർമ്മിച്ച വള്ളമാണ് ഇപ്പോൾ കടലിൽ കൊണ്ടുപോകാൻ കഴിയാത്ത അവസ്ഥയിലായിരിക്കുന്നത്. പൊളിച്ച് വിറ്റാൽ പോലും പതിനായിരം രൂപയിൽ കൂടുതൽ ലഭിക്കില്ലെന്ന് ഒരാൾ പറഞ്ഞു.

കൊച്ചുകുട്ടികളും മുതിർന്നവരും സ്ത്രീകളും പുരുഷന്മാരും രോഗികളുമടങ്ങുന്ന എല്ലാവരും ഒരുമിച്ച് അവരിലൊരാളുടെ വീടിനെ സംരക്ഷിക്കാനുള്ള ദൗത്യം ആരംഭിക്കുകയാണ് ഇവിടെ. ഇത് പൂർത്തിയാക്കിയിട്ട് വേണം അടുത്തുള്ള മറ്റ് ചില വീടുകൾക്കും സുരക്ഷാ ഭിത്തി നിർമ്മിക്കാൻ. എല്ലാവരും ഒരേ മനസ്സോടെ പലരുടെയും വീടുകളിൽ നിന്ന് കൊണ്ടുവന്ന പാത്രങ്ങളുമായി മണ്ണ് കോരിയെടുത്ത് ചാക്കുകളിൽ നിറയ്ക്കാൻ തുടങ്ങി. അപ്പോഴാണ് വലിയ ചാക്കുകളിൽ മണ്ണ് നിറച്ച് താഴെ വള്ളത്തിലേക്കും അതിൻ്റെ സൈഡിലേക്കും ഈ ചാക്കുകൾ മാറ്റാൻ പ്രയാസമാകുമെന്ന് മനസ്സിലാക്കി ചിലർ വള്ളത്തിൽ ചാക്കുമായി ഇറങ്ങി മണ്ണ് ചട്ടികളിൽ കോരി കൊടുത്ത് സഞ്ചിയിൽ നിറയ്ക്കാൻ തുടങ്ങിയത്. പക്ഷേ, വിചാരിച്ചതുപോലെ അത്ര എളുപ്പമുള്ള ജോലിയായിരുന്നില്ല അത്. ശക്തിയായി ആഞ്ഞടിക്കുന്ന തിരമാലകൾ കെട്ടിവെച്ച വള്ളത്തെ ആട്ടിഉലച്ചുകൊണ്ടിരുന്നു. വള്ളത്തിനു മുകളിൽ നിന്ന് ചാക്കിലേക്ക് മണ്ണ് നിറയ്ക്കൽ പലപ്പോഴും സാഹസികമായിരുന്നു. ശക്തിയായ തിരമാലകൾ വരുന്നത് കണ്ട് നിർദ്ദേശം നൽകാൻ തീരത്ത് നിൽക്കുന്നവർ ശ്രദ്ധിക്കാറുണ്ടെങ്കിലും, പലപ്പോഴും ശക്തമായ തിരമാലകൾ ഇവരുടെ പ്രവർത്തനങ്ങൾക്ക് വലിയ വെല്ലുവിളിയുയർത്തി.

 അതിജീവനത്തിനായുള്ള ഒരു ജനതയുടെ ഈ പോരാട്ടത്തിന് സാക്ഷ്യം വഹിക്കാൻ കഴിഞ്ഞത് അവരുടെ ജീവിതത്തെക്കുറിച്ചുള്ള ഒരു നേർചിത്രമാണ് എനിക്ക് നൽകിയത്. മറ്റൊരു വഴിയിലൂടെ സെൻ്റ് ആൻഡ്രൂസിലേക്ക് പോകാൻ തീരുമാനിച്ച ഞാൻ ഇന്ന് ഇതുവഴി വന്നത് ഒരുപക്ഷേ ഈ കാഴ്ചയ്ക്ക് സാക്ഷ്യം വഹിക്കാൻ കൂടിയായിരിക്കാം. അരമണിക്കൂർ മുൻപോ അരമണിക്കൂർ ശേഷമോ അതുവഴി പോയിരുന്നെങ്കിൽ ഈ കാര്യങ്ങൾ എൻ്റെ ശ്രദ്ധയിൽ പെടില്ലായിരുന്നു. നാളെയോ മറ്റന്നാളോ അതുവഴി ഒന്നുകൂടി പോകണം, അവരുടെ അധ്വാനത്തിൻ്റെ ഫലം എന്തായി എന്നറിയാൻ.

കടൽ എന്നും നമ്മളെപ്പോലുള്ളവർക്ക് ഒരു കൗതുകവും അത്ഭുതവുമാണ്. അത് കണ്ട് ആസ്വദിച്ചു നിൽക്കാൻ എല്ലാവർക്കും വളരെ ഇഷ്ടവുമാണ്. കാരണം നമ്മളും കടലും തമ്മിൽ വേർപിരിയാനാവാത്ത ഒരു ബന്ധമുണ്ട്; നമ്മുടെ ശരീരത്തിൽ ഭൂരിഭാഗവും ജലമാണ്, അതുപോലെ ഭൂമിയിലെ ഭൂരിഭാഗവും കടലാണ്. ജീവൻ്റെ ഉത്പത്തിയും കടലിൽ നിന്നാണല്ലോ. എന്നാൽ നാം ഒട്ടുമിക്കവരും കാണാത്ത ഒരു ലോകമുണ്ട്. കടലുമായി മല്ലിട്ട് ജീവിക്കുന്ന ഒരു ജനതയുടെ അതിജീവനത്തിൻ്റെ കഥകൾ.

(പ്രകൃതി വന്യജീവി ഫോട്ടോ​ഗ്രാഫറാണ് ലേഖകൻ)