ഒരിടവേളയ്ക്ക് ശേഷം സംസ്ഥാനത്തെ മലയോര മേഖല വലിയൊരു സമരമുഖത്താണ്. ഇക്കോളജിക്കല്‍ സെന്‍സിറ്റീവ് സോണ്‍ (പരിസ്ഥിതിലോല) നിര്‍ണയവുമായി ബന്ധപ്പെട്ട് കഴിഞ്ഞ ദിവസം വന്ന സുപ്രീംകോടതി ഉത്തരവാണ് ഇവിടെയുള്ള ജനങ്ങളെ ആശങ്കയിലാക്കിയിരിക്കുന്നത്. എന്താണ് ഇ.എസ്.സെഡ് വിജ്ഞാപനം ഇത് എങ്ങനെയാണ് ജനങ്ങളെ ബാധിക്കുന്നത്.
പാരിസ്ഥിതികമായി പ്രാധാന്യം നല്‍കേണ്ടതായി കേന്ദ്ര സർക്കാർ നിശ്ചയിച്ച ജൈവ മേഖലകളാണ് പരിസ്ഥിതിലോല പ്രദേശം അല്ലെങ്കില്‍ പരിസ്ഥിതി ദുര്‍ബലമായ പ്രദേശങ്ങള്‍. ഇതില്‍ വന്യജീവി സങ്കേതങ്ങള്‍ക്ക് ചുറ്റുമുള്ള പ്രദേശങ്ങള്‍, ദേശീയ പാര്‍ക്കുകള്‍ ഇതെല്ലാം ഉള്‍പ്പെടും. ഇവിടങ്ങളിലെ ജൈവ വൈവിധ്യങ്ങള്‍, സസ്യങ്ങളുടേയും ജന്തുക്കളുടേയും സംരക്ഷണം, ഭൂമിശാസ്ത്ര പരമായ പ്രത്യേകത എന്നിവയെല്ലാം കണക്കാക്കിയാണ് പരിസ്ഥിതി ലോല പ്രദേശങ്ങള്‍ നിര്‍ണയിക്കുന്നതിലൂടെ ലക്ഷ്യമിടുന്നത്.
ലോകത്ത് എല്ലായിടത്തും പരിസ്ഥിതിയെ സംരക്ഷിക്കാനായി ഇങ്ങനെ നിരവധി പ്രവര്‍ത്തനങ്ങള്‍ നടത്തുന്നതിന്റെ ഭാഗമായിട്ടാണ് രാജ്യത്തും ഇത്തരം നടപടികള്‍ സ്വീകരിച്ചതെങ്കിലും ജനവാസ മേഖല ഏറെയുള്ള കേരളം പോലുള്ള സംസ്ഥാനത്തെ മലയോരത്തെയാണ് നിയമം വലിയ രീതിയില്‍ ബാധിക്കുക. ജനവാസ മേഖലകളെ ഒഴിവാക്കി ഇ.എസ്.സെഡ് നിര്‍ണയം നടത്തണമെന്ന് കേന്ദ്രത്തോട് നിരവധി തവണ ആവശ്യപ്പെട്ടിട്ടും അത് അംഗീകരിക്കാന്‍ തയ്യാറാവാതിരിക്കുകയോ അല്ലെങ്കില്‍ വൈകിപ്പിക്കുകയോ ചെയ്തു. ഇതിന്റെ തുടര്‍ച്ചയാണ് ഇപ്പോഴുള്ള സുപ്രീം കോടതി വിധി.
സുപ്രീം കോടതി ഉത്തരവില്‍ പറയുന്നത്
സംരക്ഷിത വനത്തിന് ഒരു കിലോമീറ്ററില്‍ പരിസ്ഥിതി ലോല മേഖല നിര്‍ബന്ധമാക്കണമെന്നാണ് സുപ്രീംകോടതി നിര്‍ദേശിച്ചിരിക്കുന്നത്. ഉത്തരവ് നടപ്പായാല്‍ ഈ മേഖലയ്ക്കുള്ളിലെ വലിയ വികസന, നിര്‍മാണ പ്രവര്‍ത്തനങ്ങള്‍ക്ക് പൂര്‍ണ നിരോധനമുണ്ടാവും.
വീടുകളുടെ അറ്റകുറ്റപണികള്‍ക്ക് പോലും തടസ്സമുണ്ടാവാനുള്ള സാധ്യതയുണ്ടെന്ന ആശങ്കയുമുണ്ട്. ക്വാറികള്‍ക്കും വാണിജ്യ സ്ഥാപനങ്ങളുടെ നടത്തിപ്പിനും തടസ്സമുണ്ടാവും. ഇതോടെ ഈ മേഖലയിലെ ജനങ്ങളുടെ ഉപജീവന മാര്‍ഗങ്ങള്‍ പോലും മുടങ്ങുമോയെന്നുള്ള ആശങ്കയിലാണ് ജനങ്ങള്‍ സമരമുഖത്തേക്കിറങ്ങിയിരിക്കുന്നത്. കേരളത്തെ സംബന്ധിച്ചിടത്തോളം മലയോര ഹൈവയടക്കമുള്ളവയുടെ പണികള്‍ പലയിടങ്ങളിലും പുരോഗമിച്ച് കൊണ്ടിരിക്കുന്നുണ്ട്. ഇതിനെയെല്ലാം പുതിയ ഉത്തരവ് ബാധിക്കുമോയെന്നാണ് കണ്ടറിയേണ്ടത്.
കേരളത്തില്‍ 24 സംരക്ഷിത കേന്ദ്രങ്ങളാണുള്ളത്. ഇതില്‍ 21 ഇടങ്ങളില്‍ കരട് വിജ്ഞാപനം വന്നിട്ടുണ്ട്. ഇതില്‍ ആക്ഷേപങ്ങളും അഭിപ്രായം അറിയിക്കാനും നിരവധി തവണ സംസ്ഥാന സര്‍ക്കാരിനോട് കേന്ദ്രം ആവശ്യപ്പെട്ടതുമാണ്. വിജ്ഞാപനത്തിന്റെ മലയാളം പതിപ്പ് പോലും പ്രസിദ്ധീകരിച്ചിട്ടും കാര്യമായ ഇടപെടലുണ്ടായില്ല എന്നു മാത്രമല്ല കാലതാമസമുണ്ടാക്കുകയും ചെയ്തു. മേല്‍പ്പറഞ്ഞ കരട് വിജ്ഞാപനത്തില്‍ ഓരോന്നിന്റേയും അന്തിമ വിജ്ഞാപനം വരാന്‍ കാത്തിരിക്കാന്‍ പറ്റാത്തതുകൊണ്ടാണ് ഒരു കിലോമീറ്റര്‍ പരിധിയിട്ട് ഇപ്പോള്‍ സുപ്രീംകോടതി ഉത്തരവ് വന്നിരിക്കുന്നത്.
ലോലമേഖലകള്‍ സംബന്ധിച്ച സംവാദങ്ങള്‍ ഗാഡ്ഗില്‍-കസ്തൂരിരംഗന്‍ സമിതികളുടെ ശുപാര്‍ശകളുമായി ബന്ധപ്പെട്ട് തുടങ്ങിയതാണ്. 2014-ല്‍ ഉമ്മന്‍ചാണ്ടി സര്‍ക്കാരിന്റെ കാലത്ത് 121 വില്ലേജുകളില്‍ വിദഗ്ധസമിതി പഠനം നടത്തി കേന്ദ്രത്തിന് റിപ്പോര്‍ട്ട് നല്‍കിയിരുന്നു. ഇത് മാറ്റി ഇടതുസര്‍ക്കാര്‍ 2018-ല്‍ പി.എച്ച്. കുര്യന്‍ സമിതിയെ നിയോഗിച്ച് പുതിയൊരു റിപ്പോര്‍ട്ട് സമര്‍പ്പിച്ചു.
32 വില്ലേജുകളെ ഒഴിവാക്കിയാണ് റിപ്പോര്‍ട്ട് നല്‍കിയത്. ഇതില്‍ ലോലമേഖലയില്‍ 1307 ചതുരശ്ര കിലോമീറ്റര്‍ വിസ്തൃതി കുറവായിരുന്നു. 9107 ചതുരശ്ര കിലോമീറ്ററാണ് കേരളത്തിന്റെ വനവിസ്തൃതി. ജനവാസമേഖലകള്‍ ഒഴിവാക്കിയുള്ള കേരളത്തിന്റെ നിര്‍ദേശം അംഗീകരിക്കപ്പെടുമെന്ന നിലയാണുണ്ടായിരുന്നത്. എന്നാല്‍, പുതിയ വിധിയോടെ ഇതിന്‍മേലുള്ള അന്തിമവിജ്ഞാപനവും വൈകിയേക്കും.
ഉത്തരവ് നടപ്പായാല്‍ ഇത് ഏറ്റവും കൂടുതല്‍ ബാധിക്കുക വയനാട് ജില്ലയെ ആയിരിക്കും. 344.44 സ്‌ക്വയര്‍ കിലോമീറ്ററാണ് വയനാട് വന്യജിവി സങ്കേതം. മുത്തങ്ങ, സുല്‍ത്താന്‍ബത്തേരി, തോല്‍പ്പെട്ടി, കുറിച്ച്യാട് റേഞ്ചുകള്‍ ഉള്‍പ്പെടുന്നതാണിത്. മാനന്തവാടി, സുല്‍ത്താന്‍ ബത്തേരി താലൂക്കുകളിലെ ആറ് വില്ലേജുകളില്‍ പരിസ്ഥിതിലോല പ്രദേശം വരും. തിരുനെല്ലി, തൃശിലേരി, പുല്‍പ്പള്ളി, ഇരുളം, നൂല്‍പ്പുഴ പഞ്ചായത്തുകള്‍ ഇതിന്റെ പരിധിയില്‍ വരും. മലബാര്‍ വന്യജീവി സങ്കേതവും ആറളം വന്യജീവി സങ്കേതവും വയനാടുമായി പങ്കിടുന്നതാണ്. ഇതിന്റെ രണ്ടിന്റേയും ബഫര്‍സോണ്‍ പരിധിയിലും വയനാട്ടിലെ പ്രദേശങ്ങള്‍ ഉള്‍പ്പെടുന്നുണ്ട്. അതുകൊണ്ടു തന്നെ ഏറ്റവും കൂടുതല്‍ പ്രതിഷേധം നടക്കുന്നതും വയനാട് ജില്ലയിലണ്.
ഇടുക്കിയും വയനാടും പോലുള്ള ജില്ലകളിലെ സംരക്ഷണ കേന്ദ്രങ്ങള്‍ ജനവാസ മേഖലയുമായി അടുത്ത് കിടക്കുന്നതാണ്. ഇവിടങ്ങളില്‍ വ്യാപാരം, വിനോദസഞ്ചാരം, ജനവാസം എന്നിവയ്ക്ക് സംരക്ഷണം കൊടുക്കുന്നതുമായി ബന്ധപ്പെട്ടുവേണം സംസ്ഥാനത്തിന് തീരുമാനമെടുക്കാന്‍. അതിനാലാണ് വിവരംനല്‍കല്‍ വൈകിയതെന്ന് കേരളം പറയുന്നു.
ഏറ്റവും പ്രധാന ആശങ്ക ഈ മേഖലയിലെ വികസന പ്രവര്‍ത്തനങ്ങള്‍ക്കെല്ലാം തടസ്സമാകുമോയെന്നതാണ്. ഏറെ പ്രതീക്ഷയോടെ കാത്തിരിക്കുന്ന മലയോര ഹൈവേ നിര്‍മാണങ്ങളെ നിയന്ത്രണങ്ങള്‍ ബാധിച്ചേക്കാം. പതിറ്റാണ്ടുകളായി മലയോരങ്ങളില്‍ താമസിച്ച് വരുന്ന ജനങ്ങള്‍ വലിയ രീതിയിലുള്ള കുടിയൊഴുപ്പിക്കലിന് പുതിയ നിര്‍ദേശം വഴിവെക്കും. ഇതിന് പുറമെ ഭൂമിവില്‍പ്പന പോലുള്ള കാര്യങ്ങളും നിശ്ചലമാക്കും.ജനവാസമേഖലയെ ഒഴിവാക്കി കൊണ്ട് പരിസ്ഥിതി ലോല നിര്‍ണയം നടത്തണമെന്ന് കേന്ദ്രത്തോട് ആവശ്യപ്പെടുമെന്നാണ് സുപ്രീംകോടതി ഉത്തരവ് വന്ന ശേഷം സംസ്ഥാന സര്‍ക്കാര്‍ ഇപ്പോള്‍ പറയുന്നതെങ്കിലും സുപ്രീംകോടതി ഇതിനെ ഇനി എങ്ങനെ പരിഗണിക്കുമെന്നാണ് കണ്ടറിയേണ്ടത്.
കേരള സര്‍ക്കാരിന് ഇപ്പോഴും നടപടി സ്വീകരിക്കാം- കിഫ
വന്യജീവി സംരക്ഷണ നിയമം സെക്ഷന്‍ 18 മുതല്‍ 36 വരെയുള്ള സെക്ഷനുകള്‍ അനുസരിച്ചാണ് പുതിയ വന്യജീവി സങ്കേതങ്ങളെ സൃഷ്ടിക്കുന്നത്. എന്നാല്‍ കേരളത്തിലെ എല്ലാ വന്യജീവിസങ്കേതങ്ങളുടെയും കാര്യത്തില്‍ സെക്ഷന്‍ 18 അനുസരിച്ചുള്ള വന്യജീവിസങ്കേതമായി പ്രഖ്യാപിക്കാനുള്ള പ്രൊപ്പോസല്‍ മാത്രമേ പുറപ്പെടുവിച്ചിട്ടുള്ളൂ,ഫൈനല്‍ നോട്ടിഫിക്കേഷന്‍ ഇറങ്ങിയിട്ടില്ല. എന്നുവച്ചാല്‍ ഈ വന്യജീവി സങ്കേതങ്ങളുടെ അതിര്‍ത്തി പുനര്‍ നിര്‍ണയിക്കാനും വേണമെങ്കില്‍ ഈ വന്യജീവിസങ്കേതങ്ങള്‍ തന്നെ റദ്ദ് ചെയ്യാനുള്ള അവകാശവും ഇപ്പോഴും കേരള സര്‍ക്കാരിന് ഉണ്ട് എന്നര്‍ഥം. ഈ അധികാരം ഉപയോഗിച്ചുകൊണ്ട് രണ്ട് കാര്യങ്ങള്‍ കേരള സര്‍ക്കാരിന് ചെയ്യാം
കിഫ (കേരള ഇന്‍ഡിപെന്‍ഡന്റ് ഫാര്‍മേഴ്സ് അസോസിയേഷന്‍) നിര്‍ദേശിക്കുന്ന പരിഹാര മാര്‍ഗങ്ങള്‍
- കേരളത്തിലെ എല്ലാ വന്യജീവി സങ്കേതങ്ങളുടെയും നാഷണല്‍ പാര്‍ക്കുകളുടെയും നിലവിലെ അതിര്‍ത്തികള്‍ രണ്ട് കിലോമീറ്റര്‍ വനത്തിന് ഉള്ളിലേക്ക് മാറ്റി സ്ഥാപിച്ചുകൊണ്ട് ആ രണ്ട് കിലോമീറ്റര്‍ ബഫര്‍ സോണ്‍ ആക്കി മാറ്റുക
- കേരളത്തിലെ സവിശേഷമായ സാഹചര്യത്തില്‍ ബഫര്‍ സോണിനു ഇളവ് അനുവദിക്കുന്നില്ലെങ്കില്‍ കേരളത്തില്‍ നിലവിലുള്ള എല്ലാ വന്യജീവി സങ്കേതങ്ങളുടെയും സെക്ഷന്‍ 18 പ്രകാരമുള്ള നോട്ടിഫിക്കേഷന്‍ പിന്‍വലിച്ചു അത്തരം സങ്കേതങ്ങള്‍ റദ്ദ് ചെയ്യുമെന്നും ഇനി കേരളത്തില്‍ പുതിയ വന്യ ജീവി സങ്കേധങ്ങള്‍ തുടങ്ങുകയില്ല എന്നും നയപരമായ തീരുമാനം കേരള സര്‍ക്കാര്‍ എടുക്കുക
- ഇതെല്ലാം മറികടന്നുകൊണ്ട് ഇ.എസ്.സെഡ് പ്രഖ്യാപിക്കുകയാണെങ്കില്‍ കുറഞ്ഞത് സെന്റിന് ഒരു ലക്ഷം രൂപ തോതില്‍ ഇ.എസ്.സെഡിനുള്ളില്‍ വരുന്ന മുഴുവന്‍ സ്വകാര്യ ഭൂമികളും സര്‍ക്കാര്‍ ഏറ്റെടുക്കുകയും പുനരധിവാസത്തിനു പ്രത്യേകം വേറെ തുക നല്‍കുകയും ചെയ്യുക.
- നിയന്ത്രണങ്ങളെച്ചൊല്ലി ആശങ്ക.
കര്‍ഷകരുടെ ഭൂമി എടുക്കണമെന്ന് നിര്‍ബന്ധമുള്ളപോലെ-ജോയ് കണ്ണഞ്ചിറ (വിഫാം)
കര്‍ഷകരുടെ ഭൂമി എടുത്തേ മതിയാവൂ എന്ന നിര്‍ബന്ധം പോലെയാണ് പുതിയ ഉത്തരവ് വന്നിരിക്കുന്നത്. ഇതിനെല്ലാം കാരണം ഇവിടെയുള്ള ഭരണ കര്‍ത്താക്കളാണ്.നമ്മള്‍ നിർദേശിക്കുന്ന തരത്തിലാണ് കേന്ദ്രത്തില്‍ നിന്നും ഉത്തരവ് വരിക എന്നിരിക്കേ മിണ്ടാതിരുന്നതിന്റെ ഫലമാണ് അനുഭവിക്കുന്നത്.ബഫര്‍സോണ്‍ വേണ്ടെന്ന് ആരും പറയുന്നില്ല. പക്ഷെ അത് ജനവാസ കേന്ദ്രങ്ങളിൽ നിന്ന് മാറിയാവണം. പുതിയ ഉത്തരവിനെതിരേ ഹരജി ഫയല്‍ ചെയ്യണം. പാര്‍ലമെന്റില്‍ നിയമ നിര്‍മാണം നടത്തണം.
വിധി സ്വാഗതാര്‍ഹം-വയനാട് പ്രകൃതി സംരക്ഷണ സമിതി
സംരക്ഷിതവനങ്ങളുടെ ഒരു കിലോമീറ്റര്‍ വീതിയില്‍ പരിസ്ഥിതിലോലമേഖലയായി പ്രഖ്യാപിച്ച സുപ്രീംകോടതിവിധി സ്വാഗതാര്‍ഹമാണെന്ന് വയനാട് പ്രകൃതിസംരക്ഷണസമിതി. വനപരിസരങ്ങളിലും വനത്തിനുള്ളിലും താമസിക്കുന്ന വനാശ്രിത പരമ്പരാഗതസമൂഹങ്ങള്‍, ആദിവാസികള്‍, കര്‍ഷകര്‍ എന്നിവരുടെ ഉപജീവനത്തെയോ, കാര്‍ഷികവൃത്തിയെയോ, സുസ്ഥിരമായ വികസനത്തേയോ ഒരുവിധത്തിലും പ്രതികൂലമായി ബാധിക്കാത്തതും അവര്‍ക്ക് സുരക്ഷയും സമാധാനവും ഉറപ്പുവരുത്തുന്നതുമാണ് ഈ വിധി.
ഇതിനെതിരേ തെറ്റിദ്ധാരണകള്‍ പ്രചരിപ്പിക്കുന്നത് ക്വാറി-ഖനന മാഫിയകളുടെയും ടൂറിസം-നിര്‍മാണ ലോബിയുടെയും ആളുകളാണ്. പരിസ്ഥിതിലോല മേഖലയില്‍ ഖനനം, ക്വാറികള്‍, വന്‍കിട അണക്കെട്ടുകള്‍, ചുവപ്പുപട്ടികയില്‍പ്പെട്ട രാസവ്യവസായങ്ങള്‍, മരമില്ലുകള്‍ എന്നിവ മാത്രമേ നിരോധിച്ചിട്ടുള്ളൂ. മറ്റെല്ലാം നിയന്ത്രിക്കുക മാത്രമാണ് ചെയ്തത്.
സംസ്ഥാനത്തെ ഒരു സംരക്ഷിതവനത്തിന്റെയും പരിസ്ഥിതിലോലമേഖല പ്രഖ്യാപിക്കാത്തതിനാല്‍ 2011 മുതല്‍ അവയുടെയെല്ലാം 10 കിലോമീറ്റര്‍ ദൂരം പരിസ്ഥിതിലോലമേഖലയായി ഇപ്പോഴും നിലനില്‍ക്കുകയാണ്. ഭീതി പരത്തുന്നവര്‍ പ്രചരിപ്പിക്കുന്നതുപോലെ ഇവിടങ്ങളില്‍ ജനം ഒരു ബുദ്ധിമുട്ടും അനുഭവിക്കുന്നില്ല. ജില്ലയുടെ അടുത്തുള്ള ബന്ദിപ്പുര്‍ കടുവസങ്കേതത്തില്‍ 10 കിലോമീറ്റര്‍ പരിസ്ഥിതിലോലമേഖലയായിട്ട് 12 വര്‍ഷം തികഞ്ഞു. അവിടത്തെ നൂറുകണക്കിന് ഗ്രാമങ്ങള്‍ക്ക് ഒരു ബുദ്ധിമുട്ടും ഉണ്ടായിട്ടില്ല.
Content Highlights: Ecological sensitive zone and Supreme court verdict environment famers
Published: 10 Jun 2022, 02:40 pm IST
ABOUT THE AUTHOR
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented