ദ്രാവിഡക്കോട്ട ഭദ്രം; ബി.ജെ.പിക്കും അണ്ണാമലൈയ്ക്കുംഇനിയും കാത്തിരിപ്പിന്റെ കാലം

മോദി നേരിട്ട് പ്രചാരണത്തിനിറങ്ങിയ കന്യാകുമാരി

കോയമ്പത്തൂരിന് ശേഷം ബി.ജെ.പി ഏറെ പ്രതീക്ഷ വച്ച മണ്ഡലങ്ങളിലൊന്നായിരുന്നു കന്യാകുമാരി. പ്രധാനമന്ത്രി നരേന്ദ്രമോദിയും ആഭ്യന്തരമന്ത്രി അമിത് ഷായും മണ്ഡലത്തിൽ നേരിട്ട് പ്രചാരണത്തിനിറങ്ങി. 1999-ലും 2014-ലും കന്യാകുമാരിയിൽ നിന്ന് ബിജെപി ടിക്കറ്റിൽ ലോക്‌സഭയിലേക്കെത്തിയ പൊൻ രാധാകൃഷ്ണനെ തന്നെ ഇത്തവണയും പാർട്ടി രംഗത്തിറക്കി. എന്നാൽ, കണക്കുകൂട്ടലുകൾ പിഴച്ചു. മണ്ഡലത്തിൽ നിന്നും ഒരു ലക്ഷത്തിലധികം വോട്ടുകളുടെ ഭൂരിപക്ഷത്തിന് പൊൻ രാധാകൃഷ്ണനെ പരാജയപ്പെടുത്തി കോൺ​ഗ്രസിന്റെ വിജയകുമാർ കന്യാകുമാരി സ്വന്തമാക്കി. 

തമിഴിസൈയുടെ തുടർതോൽവി

തെലങ്കാന മുൻ ഗവർണർ തമിഴിസൈ സൗന്ദർരാജനെയാണ് സൗത്ത് ചെന്നൈ മണ്ഡലത്തിൽ ബി.ജെ.പി രംഗത്തിറക്കിയത്. 2019-ൽ തൂത്തുക്കുടിയിൽ കനിമൊഴിക്കു മുന്നിൽ വൻപരാജയം ഏറ്റുവാങ്ങിയ തമിഴിസൈയ്ക്ക് ഇത്തവണയും രക്ഷയില്ല. ഡി.എം.കെ.യുടെ തമിഴച്ചി തങ്കപാണ്ഡ്യൻ തമിഴിസൈയെ 225945 വോട്ടുകൾക്ക് പരാജയപ്പെടുത്തി മണ്ഡലത്തിൽ നിന്നും വിജയിച്ചുകയറി. 

കണക്കുകൾ പരിശോധിക്കുമ്പോഴും ബി.ജെ.പിയെ സംബന്ധിച്ച വലിയ സാധ്യതയൊന്നും ഇല്ലാത്ത മണ്ഡലം പക്ഷേ തമിഴിസൈ രംഗത്തെത്തിയതോടെയാണ് ഇരുപാർട്ടികളുടേയും അഭിമാനപ്പോരാട്ടമായി മാറുന്നത്. 1991 മുതൽ ബി.ജെ.പി സ്ഥിരമായി സ്ഥാനാർഥികളെ നിർത്തുന്നുണ്ടെങ്കിലും മണ്ഡലത്തിൽ 2014-ൽ നേടിയ 24.57 ശതമാനം വോട്ടുകൾ മാത്രമാണ് ഇതുവരെയുണ്ടായിട്ടുള്ള ഏക മുന്നേറ്റം.

തിരഞ്ഞെടുപ്പിന് മുമ്പ് ഏറെ ചർച്ചയായ മണ്ഡലമായിരുന്നു രാമനാഥപുരം. പ്രധാനമന്ത്രി വാരാണസിക്ക് പുറമെ ദക്ഷിണേന്ത്യയിൽ ഒരു മണ്ഡലത്തിൽകൂടെ ജനവിധി തേടിയേക്കുമെന്ന റിപ്പോർട്ടുകൾ പുറത്തുവന്നതോടെ ജനങ്ങൾ രാമനാഥപുരത്തേക്ക് ഉറ്റുനോക്കി. എന്നാൽ, പ്രതീക്ഷിച്ച മാറ്റങ്ങളൊന്നും സംഭവിച്ചില്ല. മണ്ഡലത്തെ പ്രവർത്തകരുടെ ചൂട് ഒറ്റയടിക്ക് താഴ്ത്തിക്കൊണ്ട് ബി.ജെ.പി സ്വതന്ത്രൻ മുൻ മുഖ്യമന്ത്രി ഒ. പനീർസെൽവത്തിന് പിന്തുണ പ്രഖ്യാപിച്ചു. മണ്ഡലത്തിലെ ഫലം പുറത്തുവരുമ്പോൾ രാമനാഥപുരത്തും ബി.ജെ.പിക്ക് കാലിടറി. ഒരു ലക്ഷത്തിലധികം വോട്ടുകൾക്ക് മുസ്ലിം ലീഗിന്റെ നവാസ് കനി വിജയിച്ചു. 

ഏശാതെ പോയ ചെങ്കോലും തമിഴകത്തെ തൊടാത്ത സനാതനവും

കർണാടക നിയമസഭാ തിരഞ്ഞെടുപ്പിൽകൂടി പരാജയപ്പെട്ടതോടെ ദക്ഷിണേന്ത്യൻ സംസ്ഥാനങ്ങളിലെ അധികാരരാഷ്ട്രീയത്തിൽ നിന്നും ഏറെക്കുറേ തൂത്തെറിയപ്പെട്ട നിലയിലായിരുന്നു ബി.ജെ.പി. ഇതോടെയാണ്, പൊതുതിരഞ്ഞെടുപ്പിലേക്കുള്ള തന്ത്രങ്ങൾ മെനയാൻ ബി.ജെ.പി ആരംഭിക്കുന്നത്. കേരളത്തിൽ നിന്നും തമിഴ്​നാട്ടിൽ നിന്നും ലഭിക്കുന്നതെന്തും ബി.ജെ.പിയെ സംബന്ധിച്ച് ബോണസാണ്. ഈ അവസരത്തിലാണ് തമിഴകത്തെ മനസ്സിൽ വച്ചുകൊണ്ട് പുതിയ പാർലമെന്റ് മന്ദിരയിൽ ചെങ്കോൽ പ്രതിഷ്ഠിച്ച് ബി.ജെ.പി പുതിയ തന്ത്രം  ഇറക്കുന്നത്.

ചെങ്കോലിന് രാഷ്ട്രീയവുമായി ബന്ധമില്ലെന്നും സർക്കാർ നീതിയോടെയും ന്യായത്തോടെയും പ്രവർത്തിക്കണമെന്നാണ് ഇത് സൂചിപ്പിക്കുന്നതെന്നുമായിരുന്നു ബി.ജെ.പി നേതാക്കൾ പ്രതികരിച്ചത്. എന്നാൽ, അത്ര നിസ്സാരമല്ലായിരുന്നു കാര്യങ്ങൾ. 20 അധീനങ്ങളുടെ മേധാവിമാരുമായി കൂടിയാലോചിച്ചുള്ള പദ്ധതി ഡി.എം.കെ. സർക്കാരിനെ ലക്ഷ്യംവച്ചുകൊണ്ടായിരുന്നുവെന്നാണ് വിലയിരുത്തൽ. ആചാരങ്ങൾക്ക് ഡി.എം.കെ സർക്കാർ തടസ്സം സൃഷ്ടിക്കുന്നുവെന്ന് ആരോപിച്ച് മുഖംതിരിച്ച് നിൽക്കുന്നവരാണ് ഈ അധീനങ്ങൾ. ഇവർക്ക് നേരിട്ട് നൽകുന്ന പിന്തുണ വഴി ഹിന്ദു വോട്ടുകളെ ബി.ജെ.പി ബാലറ്റിലാക്കാനാകുമെന്നായിരുന്നു ബി.ജെ.പി സ്വപ്നം.

തിരഞ്ഞെടുപ്പ് പ്രഖ്യാപനത്തിന് മുമ്പേ ഇന്ത്യൻ രാഷ്ട്രീയത്തിൽ കോളിളക്കം സൃഷ്ടിച്ച വിഷയമായിരുന്നു ഡി.എം.കെ. നേതാവും തമിഴ്‌നാട്ടിലെ മന്ത്രിയുമായ ഉദയനിധി സ്റ്റാലിന്റെ സനാതന ധർമത്തെക്കുറിച്ചുള്ള അഭിപ്രായ പ്രകടനം. പ്രധാനമന്ത്രി നരേന്ദ്രമോദിയും ആഭ്യമന്തരമന്ത്രി അമിത് ഷായും ഉൾപ്പെടെയുള്ളവർ ഉദയനിധിക്കെതിരേ രൂക്ഷവിമർശനവുമായി രംഗത്തെത്തി. മറുഭാഗത്ത്, വിവാദങ്ങളിൽ നിന്നും അദ്ദേഹത്തെ സംരക്ഷിക്കുന്നതിൽ പ്രതിപക്ഷ സഖ്യത്തിനായില്ല. ഇന്ത്യ സഖ്യത്തിലെ പ്രമുഖരിൽ പലരും ഉദയനിധി സ്റ്റാലിനെ കൈയ്യൊഴിഞ്ഞു.

സനാതന ധർമം കേവലം എതിർക്കപ്പെടേണ്ടതല്ല, പൂർണമായും തുടച്ചുനീക്കപ്പെടേണ്ടതാണെന്നായിരുന്നു ഉദയനിധിയുടെ അന്നത്തെ പരാമർശം. തമിഴ്നാട്ടിലും ദക്ഷിണേന്ത്യയിലും അങ്ങിങ്ങായി ചില പ്രതിഷേധപ്രകടനങ്ങളിൽ ഒതുങ്ങുമായിരുന്ന വിഷയം പക്ഷേ ഉത്തരേന്ത്യയിൽ തങ്ങൾക്ക് നേടിത്തന്നേക്കാവുന്ന മൈലേജിനെക്കുറിച്ച് നല്ല ബോധ്യമുണ്ടായിരുന്നു ബി.ജെ.പിക്ക്. മോദിയെ തന്നെ അവർ രംഗത്തിറക്കി. സനാതനത്തെ മഹാമാരികളായി അധിക്ഷേപിച്ചുവെന്ന് മോദി പറഞ്ഞു. കൂട്ടത്തിൽ അവരോടൊപ്പം സഖ്യം ചേർന്ന് നിൽക്കുന്ന താക്കറെ വിഭാഗം ശിവസേനയേയും മോദി ഒന്ന് കുത്തി. ബാലാസഹേബ് താക്കറെയുടെ ആത്മാവ് വേദനിക്കുന്നുണ്ടാവുമെന്നുവരെ പറ‍ഞ്ഞ മോദി പ്രതിപക്ഷം ദക്ഷിണേന്ത്യയെ പ്രത്യേക രാഷ്ട്രമാക്കുമെന്നുവരെ അന്ന് പറഞ്ഞുവെച്ചു.

ഏറ്റവുമൊടുവിൽ കച്ചത്തീവായിരുന്നു ബി.ജെ.പി മുന്നോട്ട് വെച്ച മറ്റൊരു പ്രധാന വിഷയം. പ്രത്യേകിച്ച് തമിഴ്നാടിനെ പ്രത്യക്ഷത്തിൽ ബാധിക്കുന്ന വിഷയങ്ങളൊന്നും ഉന്നയിക്കാതെ പൊതുതിരഞ്ഞെടുപ്പ് പ്രചരണം മുന്നോട്ട് പോകുന്നതിനിടെയായിരുന്നു മോദി കച്ചത്തീവ് എടുത്ത് ചർച്ചയ്ക്കിടുന്നത്. തുടർന്ന്, വിഷയം സജീവമാക്കി നിർത്താനുള്ള സർവതന്ത്രവും ബി.ജെ.പി പയറ്റി. കച്ചത്തീവിനെ കോൺഗ്രസ് നിസ്സാരമായി വിട്ടുൽകിയെന്ന് ആരോപിച്ച മോദി പതുക്കെ വിഷയം ഡി.എം.കെ.ക്കെതിരേയും തിരിച്ചു. തമിഴ്‌നാട്ടിൽ പ്രതിപക്ഷവോട്ടുകളിൽ വൈകാരികവിഷയങ്ങളുന്നയിച്ച് ഭിന്നിപ്പുണ്ടാക്കാനുള്ള തന്ത്രപരമായ ശ്രമമായിരുന്നു നീക്കത്തിന് പിന്നിൽ.

ഒഴിച്ചുകൂടാനാകാത്ത നേതൃപാടവം

ദ്രാവിഡരാഷ്ട്രീയത്തിന്റെ അഭിമാനത്തിന് ക്ഷതമേൽക്കുന്ന ഒരു രാഷ്ട്രീയത്തിനും ഇടംനൽകുന്നതല്ല തമിഴകത്തിന്റെ ചരിത്രം. ഇതേ രാഷ്ട്രീയവും ഭരണഘടനയും ഉയർത്തിക്കാണിച്ച് രാജ്യത്തിന്റെ ഫെ‍ഡറൽ സംവിധാനം മോദിക്കുകീഴിൽ ഏതെല്ലാം രീതിയിലാണ് അപകടത്തിലാകുന്നതെന്ന് വ്യക്തമായി പറഞ്ഞുവയ്ക്കുന്നുണ്ട് സ്റ്റാലിൻ. കേന്ദ്രസർക്കാർ എന്ന വാക്ക് പോലും അദ്ദേഹം ഉപയോഗിക്കാറില്ല. സംസ്ഥാനങ്ങളുടെ യൂണിയൻ എന്ന അർഥത്തിൽ യൂണിയൻ സർക്കാരെന്നാണ് സ്റ്റാലിൻ പതിവായി ഉപയോഗിക്കാറുള്ളത്.

ബി.ജെ.പിയുടെ ഹിന്ദുത്വത്തേയും കേന്ദ്രസർക്കാരിന്റെ ഏകാധിപത്യ പ്രവണതകളേയും എതിർക്കേണ്ടിടത്തെല്ലാം വിട്ടുവീഴ്ചയില്ലാതെെ നിലപാട് സ്വീകരിക്കുന്നതിൽ പ്രധാനിയാണ് സ്റ്റാലിൻ. ഇന്ത്യ സഖ്യം രൂപീകൃതമാകുന്നതിന് മുമ്പേ ദേശീയ ഫെ‍റേഷൻ എന്ന ആശയം മുന്നോട്ട് വച്ച പ്രതിപക്ഷനിരയിലെ പ്രമുഖൻ. കേരള മുഖ്യമന്ത്രി പിണറായി വിജയനുൾപ്പെടെ പ്രതിപക്ഷത്തെ പ്രധാനികളെയെല്ലാം സഖ്യത്തിന്റെ ആവശ്യകത സ്റ്റാലിൻ ബോധിപ്പിച്ചു. ബി.ജെ.പിയുടെ മുന്നേറ്റത്തിന് മുന്നിൽ പകച്ചുനിന്ന് ഹിന്ദി ഹൃദയഭൂമിയിലെ ചില പ്രധാനികൾ ചേർന്ന് കാര്യങ്ങൾ തീരുമാനിക്കേണ്ടതല്ല ദേശീയരാഷ്ട്രീയമെന്ന കൃത്യമായ ബോധ്യമുണ്ട് സ്റ്റാലിന്. പ്രാദേശികരാഷ്ട്രീയത്തിനും ദക്ഷിണേന്ത്യയ്ക്കും രാജ്യത്തിന്റെ ഗതി നിർണയിക്കാനാകുമെന്നുകൂടെ വ്യക്തമാക്കുന്നുണ്ട് മുത്തുേവൽ കരുണാനിധി സ്റ്റാലിനും ഡി.എം.കെയുടെ രാഷ്ട്രീയവും.