പവാർഫുൾ പൊളിറ്റിക്സ്; പിളർത്തിയവർക്കുള്ള പ്രഹരം

ചാരത്തിൽ നിന്നുയർത്തെണീറ്റ ഫീനിക്‌സ് പക്ഷിയെന്ന് പറഞ്ഞാൽ ശരദ്പവാറിനത് ഒട്ടും ഓവർറേറ്റഡ് ആവില്ല. പാർട്ടിയും ചിഹ്നവും നഷ്ടമായിടത്ത് നിന്ന് മഹാരാഷ്ട്രയിൽ മത്സരിച്ച 10 സീറ്റുകളിൽ എട്ടിലും ജയിച്ചു കയറി ഇനിയുമൊരങ്കത്തിന് ബാല്യമുണ്ടെന്ന് അയാൾ തെളിയിച്ചിരിക്കുന്നു. അനന്തിരവൻ അജിത് പവാറടക്കം മനസാക്ഷി സൂക്ഷിപ്പുകാരെല്ലാം ശത്രുപക്ഷത്ത് അണിനിരന്ന് നിന്നപ്പോൾ അയാൾ നെഞ്ച് വിരിച്ച് നിന്നു. പെരുമഴയത്ത് നനഞ്ഞൊലിച്ച് പണ്ടയാൾ നടത്തിയ പ്രസംഗം പോലെ ഒറ്റയ്‌ക്കൊരു പോരാളിയായി. 83 വയസിലും പ്രായം തളർത്താത്ത പോരാട്ട വീര്യത്തോടെ. വിജയത്തിൽ കുറഞ്ഞതൊന്നും അയാൾക്ക് മുന്നിലുണ്ടായിരുന്നില്ല. പരാജയമാണെങ്കിൽ ഇനിയൊരു തിരിച്ചുവരവില്ലെന്നും രാഷ്ട്രീയത്തിലെ ഭീഷ്മാചാര്യർക്ക് നന്നായറിയാം. പ്രിയപ്പെട്ട മണ്ഡലമായ ബാരാമതിയിൽ മകൾ സുപ്രിയ സുലെയെത്തന്നെ നിർത്തി. എതിർപക്ഷത്ത് ബിജെപി നിർത്തിയതാവട്ടെ അജിത് പവാറിന്റെ ഭാര്യ സുനേത്രയും. 1996 മുതൽ പവാർ കുടുംബം മാത്രം ജയിച്ചു പോന്ന മണ്ഡലത്തിൽ കുടുംബക്കാർ പരസ്പരം പോരാടി. പക്ഷേ, അന്തിമവിജയം ശരദ് പവാറിനൊപ്പം തന്നെ നിന്നു, സുപ്രിയ സുലെ വിജയിച്ചു. 

മഹാരാഷ്ട്രയിൽ ഭാരതീയ ജനതാ പാർട്ടിയുടെ നേതൃത്വത്തിലുള്ള മഹായുതിയുടെ വ്യക്തമായ വിജയത്തെ സൂചിപ്പിക്കുന്ന വിവിധ എക്സിറ്റ് പോൾ ഫലങ്ങൾ ഉണ്ടായിരുന്നിട്ടും, സംസ്ഥാനത്തെ 48 ലോക്സഭാ മണ്ഡലങ്ങളിൽ 29 എണ്ണത്തിലും മഹാ വികാസ് അഘാഡി (എംവിഎ) ആധിപത്യം നേടി. വരുന്ന രണ്ടുവർഷത്തിനുള്ളിൽ ഏതാനും പ്രാദേശിക പാർട്ടികൾ കോൺഗ്രസുമായി കൂടുതൽ അടുക്കുമെന്നും അതിൽ ചിലത് ലയിച്ചേക്കുമെന്ന പവാറിന്റെ പ്രതികരണം കോൺഗ്രസുമായുള്ള ലയനസൂചന വ്യക്തമാക്കുന്നതായിരുന്നു. കോൺഗ്രസിനൊപ്പം എൻസിപി (ശരദ് പവാർപക്ഷം)കൂടി ചേർന്ന് നിന്ന മഹാവികാസ് അഘാഡി സഖ്യം ബിജെപിയുടെ സീറ്റ് മോഹത്തിന് കനത്ത പ്രഹരം തന്നെയേൽപിച്ചു. ചേർന്ന് നിന്നാൽ രാജ്യം കൂടെനിൽക്കുമെന്ന് പവാർ 'ഇന്ത്യ' സഖ്യത്തിനെ ഒരിക്കൽ കൂടി പഠിപ്പിച്ചിരിക്കുന്നു. പ്രാദേശിക പാർട്ടികൾ ഒരു കുടക്കീഴിൽ അണിനിരത്ത് പ്രതിരോധം തീർക്കണമെന്ന ആശയത്തിന് പിന്നിലും ശരദ്പവാറുണ്ടായിരുന്നു. 

മക്കൾ രാഷ്ട്രീയത്തിൽ കാലിടറിയ നേതാക്കൾ ഇന്ത്യൻ രാഷ്ട്രീയത്തിൽ ധാരാളമുണ്ട്. ശരദ് പവാറിന് സംഭവിച്ചതും അത് തന്നെയായിരുന്നു. ശരദ് പവാർ എന്ന അച്ചുതണ്ടിന് കീഴെ കറങ്ങുന്ന ഗോളങ്ങളായിരുന്നു എൻ.സി.പിയെന്ന പാർട്ടിയും നേതൃത്വവും. അയാളോളം വളരുന്നതെന്തിനേയും വെട്ടിനിരത്താനും മടിച്ചില്ല, മകളെയൊഴിച്ച്. അജിത് പവാറിന്റെ അധികാരമോഹം മറനീക്കി പുറത്തുവന്നപ്പോഴെല്ലാം ശരദ്പവാർ കടിഞ്ഞാണിട്ടു. എന്നാൽ ഏറ്റവുമൊടിവിലത്തേതിനുമാത്രം അയാൾക്കത് കഴിയാതെ പോയി. 

ബാരാമതിയിലെ കേവലമൊരു കരിമ്പു സൊസൈറ്റിയിൽനിന്ന് പവാർ ഇന്നു കാണുന്ന പവറിലേക്കെത്തിയത് മറുകണ്ടം ചാടിയും കുതികാൽവെട്ടിയുമൊക്കെത്തന്നെയാണ്. ഒറ്റ പാർട്ടിക്ക് കീഴിലോ ഒറ്റ ചിഹ്നം കൊണ്ടു മാത്രമോ പടുത്തയർത്തിയ ജയങ്ങളായിരുന്നില്ല ഒന്നും. അതുകൊണ്ട് തന്നെയാണ് അജിത് പവാറും വിശ്വസ്തരായിരുന്ന പ്രഫുൽ പട്ടേലും ഛഗൻ ഭുജ്ബലും മറുകണ്ടം ചാടിയപ്പോഴും പവാർ ഉശിരോടെ നിന്നത്. 

ശരദ് പവാറും എൻ.സി.പിയും പിന്നെ അജിത് 'പവറും'

എൻ.സി.പിയെന്നാൽ മഹാരാഷ്ട്രക്കാർക്ക് അന്നുമിന്നും ശരദ് പവറാണ്. മറ്റേത് നേതാവും അതിന് പിന്നിലേ വരൂ. ഇന്നും അണികൾക്കിടയിലെ ക്രൗഡ്പുള്ളറാണ് പവാർ. അയാളെ കേൾക്കാൻ ഇന്നും മഹാരാഷ്ട്രയിൽ ജനമിരമ്പും. പിളർപ്പിന് ശേഷം രാഷ്ട്രീയ ഗുരുവായ വൈ.ബി.ചവാന്റെ സമാധിദിനത്തിൽ ശരദ് പവാറിനെ കേൾക്കാനെത്തിയ ജനസാഗരവും അത് അടിവരയിട്ടു. അജിത് പവാർ ബി.ജെ.പിയ്‌ക്കൊപ്പം ചേരാൻ വിമതനീക്കം നടത്തുന്നുവെന്ന വാർത്ത പരന്നതോടെയാണ് 2023 മേയ് മാസത്തിൽ അജിത് പവാറിന്റെ രാജി നാടകം അരങ്ങേറിയത്. പാർട്ടിയിലെ തന്റെ അപ്രമാദിത്തം കൂടിയാണ് അതിലൂടെ അദ്ദേഹം തെളിയിച്ചത്. ശരദ് പവാറിന്റെ തീരുമാനത്തെ അനുസരിക്കൂ രാജിവെയ്ക്കട്ടെ എന്ന നിലപാടായിരുന്നു അജിത് പവാറിന്. എന്നാൽ 'അയ്യോ അച്ഛാ പോവല്ലേ' വികാരത്തോടെ  പാർട്ടി ഒന്നടക്കം ശരദ് പവാറിനൊപ്പം നിൽക്കുന്ന കാഴ്ചയാണ് പിന്നീട് കണ്ടത്. പാർട്ടിയിൽ തന്റേത് തന്നെയാണ് ഇപ്പോഴും അവസാനവാക്കെന്ന അജിത് പവാറിനുള്ള താക്കീത് കൂടിയായി രാജിപ്രഖ്യാപനം

രാഷ്ട്രീയത്തിലേക്ക് കൈപിടിച്ച് കയറ്റിയതും വളർത്തിയതും ഇളയച്ഛനാണെങ്കിലും ഒരു ഘട്ടത്തിനപ്പുറം തനിക്ക് സ്ഥാനമില്ലെന്ന ചിന്തയും അധികാരമോഹവും അജിത് പവാറിനെ എല്ലാ കാലത്തും അസ്വസ്ഥനാക്കി. പല ഘട്ടത്തിലും അജിത് പവാർ അത് തുറന്ന് കാട്ടി. എൻ.സി.പിയുടെ സ്ഥാപകദിനത്തിൽ അജിത് പവാർ ഇരിക്കെയാണ് മകൾ സുപ്രിയ സുലയെയും പ്രഫുൽ പട്ടേലിനെയും ശരദ് പവാർ പാർട്ടിയുടെ വർക്കിങ് പ്രസിഡന്റുമാരാക്കിയത്. അധികാരം കാണുമ്പോൾ മലക്കം മറിയുന്ന നേതാവ്, അത് സഹോദരപുത്രനാണെങ്കിലും വിശ്വസിക്കരുതെന്ന് ഒരുപക്ഷേ ശരദ് പവാറിനെ അനുഭവം പഠിപ്പിച്ചിരിക്കാം. താനെന്ന ലക്ഷ്മണരേഖ മറികടക്കാൻ അജിത് പവാറിന് ഒരു പ്രയാസവുമുണ്ടാവില്ലെന്ന് ശരദ് പവാർ മനസിലാക്കിയിട്ടുണ്ടാവണം. കാരണം 1999-ൽ സോണിയ ഗാന്ധിയുടെ വിദേശപൗരത്വത്തെച്ചൊല്ലി കോൺഗ്രസിൽനിന്ന് രാജിവെച്ച് എൻ.സി.പിയെന്ന പുതിയ പാർട്ടിയുണ്ടാക്കിയ പവാറും അത്തരമൊരു 'രേഖ'യും ഗൗനിച്ചിട്ടില്ല. അവിഭക്ത കോൺഗ്രസിൽനിന്നു ഗ്രൂപ്പുകളികളിലേക്കും അവിടെനിന്ന് സാങ്മയ്ക്കൊപ്പം സ്വന്തം പാർട്ടിയുണ്ടാക്കി പോയപ്പോഴും അധികാരമോഹം തന്നെയാണ് ശരദ് പവാറിനെയും നയിച്ചത്. അന്നുമുതൽ വെള്ളവും വളവും നൽകി വളർത്തിയ പാർട്ടിയെയും കൂടെ നിർത്തിയ ഛഗൻ ഭുജ്പൽ അടക്കമുള്ള നേതാക്കളെയുമാണ് അജിത് പവാർ പിഴുതെടുത്തത്. 

ശിവസേനയ്ക്ക് പിന്നാലെ എൻ.സി.പി.; കളമറിഞ്ഞ് കളിച്ച ബി.ജെ.പി

എൻ.സി.പിയും ശിവസേനയും തമ്മിലായിരുന്നു ഒരുകാലത്ത് മഹാരാഷ്ട്രയിൽ നേർക്ക്‌നേർ പോരാട്ടം. എൻ.ഡി.എ. ഉണ്ടായ കാലം മുതൽ ആ സഖ്യത്തിനൊപ്പം നിൽക്കുന്ന പാർട്ടിയാണ് ശിവസേന. കോൺഗ്രസിനെ നേരിട്ടത് ശിവസേന-ബി.ജെ.പി. സഖ്യമായിരുന്നു. പവാർ കോൺഗ്രസ് പിളർത്തി എൻ.സി.പിയുണ്ടാക്കിയെങ്കിലും കോൺഗ്രസും എൻ.സി.പിയും സഖ്യകക്ഷികളായി ഒരു വശത്ത് തുടർന്നു. 2014-ൽ മോദി വന്ന ശേഷം കോൺഗ്രസിൽനിന്ന് പല പ്രമുഖരും ബി.ജെ.പിയിൽ ചേക്കേറി. അപ്പോഴും വലിയ പരിക്കില്ലാതെ നിന്ന എൻ.സി.പിയെയാണ് 2023ൽ അജിത് പവാർ നെടുകെ പിളർന്നത്. ശിവസേനയുടെ അതേവിധി 

മകൾ സുപ്രിയയെ മുൻനിരയിലെത്തിച്ചപ്പോഴുണ്ടായ നേതാക്കൾക്കിടയിലെ അതൃപ്തിയും അധികാരമോഹവും എൻ.സി.പിയെ പിളർത്തുന്നതിൽ പ്രധാന കാരണങ്ങളായി. ശിവസേന പിളർത്തി ഏകനാഥ് ഷിന്ദേയെ തനിക്കൊപ്പം നിർത്തിയ ബി.ജെ.പി. അതേ കളി എൻ.സി.പിയിലും കളിച്ചെന്ന് സാരം. എന്നാൽ അജിത്പവാറിനുമപ്പുറം, എൻ.സി.പിക്കുമപ്പുറം മഹാരാഷ്ട്രയ്ക്ക് ശരദ്പവാർ തന്നെയാണ് വേണ്ടപ്പെട്ടവനെന്ന് ഈ തിരഞ്ഞെടുപ്പിലൂടെ അയാൾ തെളിയിച്ചിരിക്കുന്നു.