കുമളി: വിസ്തീർണത്തിൽ സംസ്ഥാനത്തെ ഏറ്റവും വലിയ പഞ്ചായത്ത് വാർഡുകളിലൊന്നായ മുല്ലപ്പെരിയാറിലെ കുഞ്ഞൻ ബൂത്തായ പച്ചക്കാനത്ത് ഇത്തവണ വോട്ട് രേഖപ്പെടുത്തിയത് ഒരാൾമാത്രം. പച്ചക്കാനം എസ്റ്റേറ്റിലെ ജീവനക്കാരനായ സിൽവസ്റ്റർ. 29 വോട്ടർമാരുള്ള ഈ ബൂത്തിൽ 16 പുരുഷൻമാർക്കും 13 സ്ത്രീകൾക്കുമാണ് വോട്ടുണ്ടായിരുന്നത്. കുമളി പഞ്ചായത്തിലെ പതിമ്മൂന്നാം വാർഡായ മുല്ലപ്പെരിയാറിലെ രണ്ടാംനമ്പർ ബൂത്തായ പച്ചക്കാനം പെരിയാർ കടുവസങ്കേതത്തിനുള്ളിലാണ്. 35 കിലോമീറ്റർ യാത്രചെയ്താലേ കുമളിയിൽനിന്ന് ഇവിടെ എത്താൻ കഴിയൂ. 2020-ലെ തദ്ദേശതിരഞ്ഞെടുപ്പിന് മുന്നോടിയായി ഇവിടെ വൈദ്യുതിയും വെള്ളവും എത്തിച്ചിരുന്നു. എന്നാൽ, ഇപ്പോഴും, മൊബൈൽ നെറ്റ്‌വർക്ക് പേരിനുപോലുമില്ല. മന്നാൻ വിഭാഗത്തിൽപ്പെട്ടവരാണ് ഇവിടെ താമസിക്കുന്നവരിൽ ഭൂരിപക്ഷവും. രണ്ടുപോലീസുകാർ ഉൾപ്പെടെ ഏഴ് ഉദ്യോഗസ്ഥരാണ് പോളിങ് ബൂത്തിൽ ഉണ്ടായിരുന്നത്.

To advertise here,