ന്യൂഡൽഹി: നാഷണൽ ടെസ്റ്റിങ് ഏജൻസി കഴിഞ്ഞ ആറ് വർഷത്തിനിടെ പരീക്ഷാ നടത്തിപ്പിലൂടെ മാത്രം സമാഹരിച്ചത് 448 കോടി രൂപയുടെ ലാഭമെന്ന് പാർലമെന്ററി സമിതിയുടെ റിപ്പോർട്ട്. തുക എൻ.ടി.എ.യുടെ പരീക്ഷാ അടിസ്ഥാന സൗകര്യങ്ങൾ വർധിപ്പിക്കുന്നതിനും പരീക്ഷാ നടത്തിപ്പിൽ പങ്കാളികളാകുന്ന പുറംകരാർ ഏജൻസികളുടെ മേൽനോട്ടം ശക്തമാക്കുന്നതിനും ഉപയോഗിക്കണമെന്ന് സമിതി ശുപാർശ ചെയ്തു.

To advertise here,

പാർലമെന്ററി സ്റ്റാൻഡിങ് കമ്മിറ്റിയുടെ ഏറ്റവും പുതിയ റിപ്പോർട്ടിലാണ് വിവരങ്ങളുള്ളത്. കഴിഞ്ഞ ആറ് വർഷത്തിനിടെ പരീക്ഷാ നടത്തിപ്പിലൂടെ എൻ.ടി.എ.ക്ക് 3,512.98 കോടി രൂപ വരുമാനം ലഭിച്ചപ്പോൾ, പരീക്ഷാ നടത്തിപ്പിനായുള്ള ചെലവ് 3,064.77 കോടി രൂപ മാത്രമായിരുന്നു. ഇതാണ് 448 കോടി രൂപയുടെ വലിയൊരു തുക ബാക്കിയാകാൻ കാരണം.

രാജ്യസഭാ എം.പി. ദിഗ്‌വിജയ് സിങ്ങിന്റെ നേതൃത്വത്തിലുള്ള സമിതി പരീക്ഷാ ക്രമക്കേടുകൾ തുടരുന്നതിൽ കടുത്ത ആശങ്ക രേഖപ്പെടുത്തി. കഴിഞ്ഞ വർഷങ്ങളിലെ നീറ്റ് ഉൾപ്പെടെയുള്ള ദേശീയ പ്രവേശന പരീക്ഷകളിലെ വിവാദങ്ങൾക്ക് ശേഷം സർക്കാർ പല നടപടികളും സ്വീകരിച്ചിട്ടും ക്രമക്കേടുകൾ ആവർത്തിക്കുന്നത് വിദ്യാർത്ഥികളിൽ വലിയ ആശങ്കയാണ് ഉണ്ടാക്കുന്നതെന്ന് സമിതി ചൂണ്ടിക്കാട്ടി.

  • രാധാകൃഷ്ണൻ കമ്മിറ്റി റിപ്പോർട്ട്: മുൻ ഐ.എസ്.ആർ.ഒ. ചെയർമാൻ കെ. രാധാകൃഷ്ണന്റെ നേതൃത്വത്തിലുള്ള ഉന്നതതല സമിതിയുടെ ശുപാർശകൾ എത്രയും വേഗം നടപ്പാക്കാൻ എൻ.ടി.എ.യോട് സമിതി ആവശ്യപ്പെട്ടു.

  • നടപടിക്രമങ്ങളുടെ സമയരേഖ: ശുപാർശകൾ നടപ്പിലാക്കുന്നതിനുള്ള കൃത്യമായ സമയരേഖ ഉന്നതവിദ്യാഭ്യാസ വകുപ്പ് പ്രസിദ്ധീകരിക്കണം. പരീക്ഷകൾ പൂർണ്ണമായും സുതാര്യവും കുറ്റമറ്റതുമാക്കാൻ വിവിധ മേഖലകളിലെ വിദഗ്ദ്ധരുമായി വിപുലമായ ചർച്ചകൾ നടത്തണമെന്നും റിപ്പോർട്ടിലുണ്ട്.

എൻ.ടി.എ. സ്വയംഭരണാധികാരമുള്ള സ്ഥാപനമാണെന്നും സർക്കാരിൽ നിന്ന് ഫണ്ട് കൈപ്പറ്റാറില്ലെന്നും വകുപ്പ് കൂട്ടിച്ചേർത്തു. പരീക്ഷാ സെന്ററുകൾ ബുക്ക് ചെയ്യാനും സുരക്ഷാ ക്രമീകരണങ്ങൾക്കുമായി വർഷത്തിന്റെ തുടക്കത്തിൽ വലിയ തുക ആവശ്യമായി വരാറുണ്ട്. പരീക്ഷകൾക്ക് ശേഷം ശരാശരി 74.5 കോടി രൂപയാണ് പ്രതിവർഷം ബാക്കി വരുന്നത്. ഈ തുക അടുത്ത വർഷത്തെ പരീക്ഷാ മുന്നൊരുക്കങ്ങൾക്കായാണ് സാധാരണ ഉപയോഗിക്കാറുള്ളതെന്നും പാർലമെന്ററി സമിതിയുടെ നിർദ്ദേശപ്രകാരം ഈ ഫണ്ട് കൂടുതൽ കാര്യക്ഷമമായി വിനിയോഗിക്കുമെന്നും മന്ത്രാലയം അറിയിച്ചു.