എം.എസ്‌സി. നഴ്‌സിങ്: രണ്ടാംറൗണ്ടിന് ഓപ്ഷൻ കൺഫർമേഷൻ നടത്തണം

കേരളത്തിൽ 2024-25 ലെ എം.എസ്‌സി. നഴ്‌സിങ് പ്രവേശനത്തിനായി നടത്തുന്ന കേന്ദ്രീകൃത അലോട്മെന്റ് പ്രക്രിയയുടെ രണ്ടാംറൗണ്ട് നടപടികൾ www.cee.kerala.gov.in-ൽ ആരംഭിച്ചു.ആദ്യഘട്ടത്തിൽ ഓപ്ഷനുകൾ രജിസ്റ്റർചെയ്തവർക്ക് രണ്ടാംഘട്ട അലോട്മെന്റിൽ പങ്കെടുക്കാൻ താത്‌പര്യമുണ്ടെങ്കിൽ www.cee.kerala.gov.in-ലെ അവരുടെ ഹോം പേജുവഴി ഓൺലൈനായി ഓപ്ഷൻ കൺഫർമേഷൻ നടത്തണം.ആദ്യഘട്ടത്തിൽ അലോട്മെന്റ് ലഭിച്ച, ഇപ്പോഴും ആ സീറ്റ് നിലനിർത്തുന്നവരും ആദ്യഘട്ടത്തിൽ അലോട്മെന്റ് ഒന്നും ലഭിക്കാത്തവരും രണ്ടാംറൗണ്ടിൽ പങ്കെടുക്കാൻ ഓപ്ഷൻ കൺഫർമേഷൻ നിർബന്ധമായും നടത്തണം.

അപേക്ഷാ നമ്പർ, പാസ്‌വേഡ് എന്നിവ www.cee.kerala.gov.in-ൽ പി.ജി. നഴ്‌സിങ് 2024-കാൻഡിഡേറ്റ്‌സ് പോർട്ടൽ വഴി നൽകി ഹോം പേജിലേക്ക് ലോഗിൻ ചെയ്യണം. അവിടെയുള്ള ‘കൺഫേം’ ബട്ടൺ ക്ലിക് ചെയ്യണം. തുടർന്ന് അവശേഷിക്കുന്ന ഹയർ ഓപ്ഷനുകൾ പുനഃക്രമീകരിക്കാൻ അവസരംലഭിക്കും. ഹയർ ഓപ്ഷനുകളിൽ, താത്‌പര്യമില്ലാത്തവ ഒഴിവാക്കാം, അവശേഷിക്കുന്ന ഓപ്ഷനുകളുടെ ക്രമം/മുൻഗണന വേണമെങ്കിൽ മാറ്റാം.

• നിലവിൽ ഈ കോഴ്‌സുകളിൽ പ്രവേശനംനേടിയവർക്ക്, ഇനിയും ഒരു മാറ്റം വേണ്ടെങ്കിൽ അവശേഷിക്കുന്ന ഹയർ ഓപ്ഷനുകൾ (ഉണ്ടെങ്കിൽ), പൂർണമായും റദ്ദാക്കണം.

• ഓപ്ഷൻ കൺഫർമേഷൻ നടത്താത്തവരെ രണ്ടാംഘട്ട അലോട്മെന്റിൽ പരിഗണിക്കില്ല.

• ആദ്യഘട്ടത്തിൽ പ്രവേശനംനേടിയവർ ഓപ്ഷൻ കൺഫർമേഷൻ നടത്താത്തപക്ഷം അവരുടെ നിലവിലുള്ള പ്രവേശനം നിലനിൽക്കും.

• ഓപ്ഷൻ കൺഫർമേഷൻ നടത്തുന്ന, നിലവിൽ അഡ്മിഷനുള്ളവർക്ക് രണ്ടാംഘട്ടത്തിൽ ഒരു മാറ്റംവന്നാൽ, നിലവിലുള്ള സീറ്റ് നഷ്ടമാകും. പുതിയസീറ്റ് അവർ സ്വീകരിക്കണം. സ്വീകരിക്കാത്തപക്ഷം പുതിയസീറ്റും നഷ്ടപ്പെടും. അതിനാൽ അലോടുചെയ്യപ്പെട്ടാൽ സ്വീകരിക്കുമെന്നുറപ്പുള്ള ഓപ്ഷനുകൾമാത്രം രണ്ടാംഘട്ടത്തിലേക്ക് നിലനിർത്താൻ പ്രത്യേകം ശ്രദ്ധിക്കണം.

• ഓപ്ഷൻ കൺഫർമേഷൻ നടത്താനും ഹയർ ഓപ്ഷനുകൾ പുനഃക്രമീകരിക്കാനും ഒക്ടോബർ 16-ന് ഉച്ചയ്ക്ക് 12 വരെ സമയംലഭിക്കും.

രണ്ടാംഘട്ട പ്രൊവിഷണൽ അലോട്മെന്റ് 16-ന് പ്രസിദ്ധീകരിക്കും. രണ്ടാംഘട്ട അന്തിമ അലോട്മെന്റ് 17-നും.

അലോട്മെന്റ് ലഭിക്കുന്നവർ ഹോം പേജിൽനിന്ന്‌ അലോട്മെന്റ് മെമ്മോ ഡൗൺലോഡുചെയ്തെടുത്ത് 18-നും 21-ന്‌ വൈകീട്ട് മൂന്നിനുമിടയ്ക്ക് ബന്ധപ്പെട്ട സ്ഥാപനത്തിൽ റിപ്പോർട്ടുചെയ്ത് അലോട്മെന്റ് മെമ്മോയിൽ രേഖപ്പെടുത്തിയ ഫീ കോളേജിൽ അടച്ച് പ്രവേശനംനേടണം.

എം.എസ്‌സി. നഴ്‌സിങ് പ്രോസ്പെക്ടസ് ക്ലോസ് ഏഴ്‌ പ്രകാരമുള്ള യോഗ്യത, പ്രവേശനസമയത്ത് നേടിയിരിക്കണം.

മെറിറ്റ് സീറ്റിൽ പ്രവേശനംനേടുന്ന എസ്.സി./എസ്.ടി./ഒ.ഇ.സി./രജിസ്റ്റർചെയ്ത മത്സ്യത്തൊഴിലാളികളുടെ മക്കൾ, ശ്രീചിത്ര ഹോം, നിർഭയ ഹോം, ഗവൺമെന്റ് ജുവനൈൽ ജസ്റ്റിസ് ഹോം എന്നിവയിലെ അന്തേവാസികൾ എന്നിവർ ഫീസ് അടയ്ക്കേണ്ടതില്ല.

ആദ്യഘട്ടത്തിൽ പ്രവേശനംനേടിയവർക്ക് രണ്ടാംഘട്ടത്തിൽ കോളേജ് മാറ്റം ലഭിക്കുന്നപക്ഷം അവർ ആദ്യകോളേജിൽനിന്ന്‌ ടി.സി.യും മറ്റുരേഖകളും വാങ്ങി സമയപരിധിക്കകം പുതിയകോളേജിൽ ചേരണം.