ആലുവ: ട്രെയിനില്‍ സഞ്ചരിക്കുന്ന യാത്രക്കാരെ വടി കൊണ്ട് ആക്രമിച്ച് കവര്‍ച്ച നടത്തുന്ന സംഘം പിടിയില്‍. ആറുപേരെയാണ് റെയില്‍വേ പോലീസ് പിടികൂടിയത്. ആലുവ സൗത്ത് വാഴക്കുളം ഷെഫിന്‍ (18), പെരുമ്പാവൂര്‍ സ്വദേശികളായ മാറമ്പിള്ളി കെ.എ. ആഷിക് (21), അല്ലപ്ര എം. സിറാജ് (26), റയോണ്‍സ് ജോസ്വിന്‍ എല്‍ദോ (18), മുടിക്കല്‍ മുഹമ്മദ് ഫസല്‍ (18), പ്രായപൂര്‍ത്തിയാകാത്ത ഒരാള്‍ എന്നിവരാണ് പിടിയിലായത്.
ആലുവ റെയില്‍വേ സ്റ്റേഷനു സമീപമുള്ള പെരിയാര്‍ പാലത്തില്‍ തീവണ്ടി പോകുമ്പോള്‍ വേഗം കുറച്ചാണ് പോകുന്നത്. ഈ അവസരം മുതലാക്കിയാണ് കവര്‍ച്ച നടത്തുന്നത്.
മേല്‍പ്പാലത്തിനും റെയില്‍വേ സ്റ്റേഷനും ഇടയിലുള്ള ഭാഗത്താണ് കവര്‍ച്ചസംഘം നിലയുറപ്പിക്കുന്നത്. തീവണ്ടിയെത്തുമ്പോള്‍ വാതിലിന് അടുത്തു നില്‍ക്കുന്നവരെ നീളന്‍ വടികൊണ്ട് ആക്രമിക്കും. കൈയില്‍നിന്ന് താഴേക്ക് വീഴുന്ന വസ്തുക്കള്‍ കൈക്കലാക്കും. അടികൊണ്ട് ആളടക്കം താഴേക്ക് വീണാല്‍ മൊത്തം സാധനങ്ങളുമായി സംഘം കടന്നു കളയും.
ഇത്തരം മോഷണശ്രമത്തിനിടെ ഒരു യുവാവിന് പരിക്കുപറ്റിയിരുന്നു. ഞായറാഴ്ച രാത്രി മലബാര്‍ എക്‌സ്പ്രസില്‍ എറണാകുളത്തുനിന്ന് ഷൊര്‍ണൂര്‍ക്ക് പോയ അമ്പലപ്പുഴ സ്വദേശിക്കാണ് സംഘത്തിന്റെ അടിയേറ്റത്. താഴെ വീണ് ഇയാള്‍ക്ക് പരിക്കേറ്റു. 75,000 രൂപയുടെ മൊബൈല്‍ ഫോണും 1500 രൂപയുടെ ഇയര്‍ ഫോണും 700 രൂപയും സംഘം മോഷ്ടിച്ചു. തുടര്‍ന്ന് യുവാവ് നല്‍കിയ പരാതിയിലാണ് എറണാകുളം റെയില്‍വേ പോലീസ് പ്രതികളെ പിടികൂടിയത്. മോഷണ മുതലുകള്‍ പിടിയിലായവരില്‍നിന്ന് കണ്ടെത്തി.
Content Highlights: 6-member gang targeting train passengers with sticks and stealing Arresyed in Aluva
Published: 12 Aug 2025, 07:58 am IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented