എന്. പ്രഭാകരന് എഴുതി മാതൃഭൂമി ബുക്സ് പ്രസിദ്ധീകരിച്ച വടക്കന് മനസ്സ് എന്ന പുസ്തകത്തില് നിന്നും;
വടക്കന്കേരളത്തെക്കുറിച്ച് പറയുമ്പോള് പലരും ആദ്യം ഓര്മിക്കുന്നത് കണ്ണൂര്രാഷ്ട്രീയമാണ്. കണ്ണൂര്രാഷ്ട്രീയം എന്നു പറയുമ്പോള് തെക്കുള്ളവര് പലപ്പോഴും അര്ത്ഥമാക്കുന്നത് ഇവിടത്തെ മുഴുവന് രാഷ്ടീയപ്രവര്ത്തനങ്ങളെയുമല്ല. 1969 മുതല് ആരംഭിച്ചതും ഒന്നുരണ്ടു ദശകക്കാലം അതിശക്തമായി നിലനിന്നതും ഒന്നോ രണ്ടോ വര്ഷങ്ങളുടെ, ചിലപ്പോള് ഏതാനും മാസങ്ങളുടെ ഇടവേളയ്ക്കു ശേഷം പിന്നെയും വാര്ത്തകളില് ഇടം നേടിക്കൊണ്ടിരുന്നതുമായ കൊലപാതകരാഷ്ട്രീയമാണ് അവരുടെ ചിന്തയില് മുഖ്യമായും വരുന്നത്. മാര്ക്സിസ്റ്റ് പാര്ട്ടിയുടെയും ആര്.എസ്.എസ്സിന്റെയും പ്രവര്ത്തകരായ നൂറുകണക്കിനാളുകളാണ് ഈ പ്രദേശത്ത് ആസൂത്രിത കൊലപാതകങ്ങള്ക്ക് ഇരയായത്.
കോണ്ഗ്രസ്സിന്റെയും മുസ്ലിം ലീഗിന്റെയും പ്രവര്ത്തകര്ക്കും ജീവന് നഷ്ടപ്പെട്ടിട്ടുണ്ട്. കഴിഞ്ഞ മൂന്നു ദശകത്തോളമായി കൊലപാതകങ്ങളുടെ എണ്ണം താരതമ്യേന വളരെ കുറഞ്ഞിരിക്കയാണ്. എങ്കിലും കൊലപാതകരാഷ്ട്രീയത്തിന് അറുതിവന്നു എന്ന് ഉറപ്പിച്ചു പറയാനുള്ള ധൈര്യം ഇനിയും കണ്ണൂര്ക്കാര്ക്കു കൈവന്നിട്ടില്ല. കണ്ണൂരിലെ രാഷ്ട്രീയകൊലപാതകങ്ങള് അധികവും നടന്നത് മുമ്പ് അത്യുത്തരകേരളത്തിന്റെ സാംസ്കാരികതലസ്ഥാനമായി അറിയപ്പെട്ടിരുന്ന തലശ്ശേരിയിലും സമീപഗ്രാമങ്ങളിലുമാണ്. കണ്ണൂര്, കാസര്കോട് ജില്ലകളുടെ മറ്റു ഭാഗങ്ങളിലും ഏതാനും സംഭവങ്ങള് ഉണ്ടായിട്ടുണ്ട്. അവ വ്യത്യസ്ത സാഹചര്യങ്ങളില്, വ്യത്യസ്ത കാരണങ്ങളാല് സംഭവിച്ചവയാണ്.
അറുപതുകളുടെ അവസാനവര്ഷത്തില് തലശ്ശേരിയില് ആര്.എസ്.എസ്. മാര്ക്സിസ്റ്റ് സംഘട്ടനം ആരംഭിക്കുന്നതിന് കൃത്യമായ രാഷ്ട്രീയപശ്ചാത്തലമുണ്ട്. ആ പശ്ചാത്തലം മാര്ക്സിസ്റ്റ് പാര്ട്ടിയുടെ പക്ഷത്തുനില്ക്കുന്നവര് വിശദീകരിക്കുന്നത് ഇങ്ങനെയാണ്: 'മാംഗ്ളൂര് ഗണേശ് ബീഡിയുടെ തൊഴിലാളികളായിരുന്നു അതേവരെ തലശ്ശേരിയിലെ ബീഡിത്തൊഴിലാളികളില് ഏറെയും. 1967-ലെ ഇ.എം.എസ്. ഗവണ്മെന്റ് ബീഡിത്തൊഴിലാളികളുടെ തൊഴില് സാഹചര്യവും വേതനവ്യവസ്ഥയുമൊക്കെ പരിഷ്കരിക്കാനാവശ്യമായ നിയമനിര്മ്മാണത്തിലേക്ക് നീങ്ങുന്നു എന്ന് വന്നപ്പോള് മാംഗളൂര് ഗണേശ് ബീഡി കേരളത്തിലെ തൊഴിലാളികളെ അതേവരെ അവര്ക്കു കിട്ടിക്കൊണ്ടിരുന്ന വേതനത്തിന്റെയും തൊഴില്സാഹചര്യങ്ങളുടെയും വരുതിയില്ത്തന്നെ നിര്ത്താനുള്ള തന്ത്രപരമായ നീക്കങ്ങള് ആരംഭിച്ചു. അതോടെ, മാര്ക്സിസ്റ്റ് കമ്യൂണിസ്റ്റുപാര്ട്ടിയുടെ കീഴില് നേരത്തേതന്നെ സംഘടിതരായിരുന്ന ബീഡിത്തൊഴിലാളികള് അവരുടെ അവകാശങ്ങള്ക്കുവേണ്ടിയുള്ള പോരാട്ടവും ആരംഭിച്ചു.
ഗണേശ് ബീഡി കമ്പനി ആദ്യമൊന്നും കുലുങ്ങിയില്ല. അവര് അവരുടെ താത്പര്യങ്ങള് സംരക്ഷിക്കുന്നതിനുള്ള നടപടികളുമായി മുന്നോട്ടുപോയി. 'ഗണേശ് ബീഡി' കേരളത്തില്നിന്നുള്ള ഉത്പാദനം അവസാനിപ്പിച്ചപ്പോള് പന്ത്രണ്ടായിരത്തിലധികം തൊഴിലാളികള് അപ്രതീക്ഷിതമായി തൊഴില്രഹിതരായി. അവരെ അവരവരുടെ വീട്ടിലിരുത്തി ബീഡി തെറുപ്പിച്ചു വാങ്ങാനുള്ള ശ്രമം ഗണേശ് ബീഡിക്കമ്പനി ആരംഭിച്ചു. ഈ ഘട്ടത്തില് കമ്പനിയുടെ ആളുകളായി രംഗത്തെത്തി ഈ പുതിയ സാഹചര്യം തൊഴിലാളികളെക്കൊണ്ട് അംഗീകരിപ്പിക്കാന് മുന്നിട്ടിറങ്ങിയത് ആര്.എസ്.എസ്സുകാരാണ്. മാര്ക്സിസ്റ്റ് പാര്ട്ടി ഈ നീക്കത്തെ ചെറുത്തുതോല്പ്പിക്കാനുള്ള ശ്രമങ്ങള് ആരംഭിച്ചു.
ബീഡിത്തൊഴിലാളികളുടെ കോ ഓപ്പറേറ്റീവ് സൊസൈറ്റികള് രൂപീകരിച്ചുകൊണ്ടായിരുന്നു അത്. ഈ സൊസൈറ്റികളെ ഒരു കുടക്കീഴില് കൊണ്ടുവന്നാണ് കേരളാ ദിനേശ് ബീഡി കോ ഓപ്പറേറ്റീവ് സൊസൈറ്റി രൂപീകരിച്ചത് (1969). കോ ഓപ്പറേറ്റീവ് സൊസൈറ്റികള് രൂപീകരിച്ച് ബീഡിത്തൊഴിലാളികള് തങ്ങളുടെ നീക്കങ്ങളെ വെല്ലുവിളിച്ചപ്പോള് ആര്.എസ്.എസ്സുകാര് കൂടുതല് പ്രകോപിതരായിത്തീര്ന്നു. അവര് ബീഡിത്തൊഴിലാളികളെയും അവരുടെ സംരക്ഷകരായി പ്രവര്ത്തിച്ച മാര്ക്സിസ്റ്റുകാരെയും നിലയ്ക്കു നിര്ത്താന് ഉദ്ദേശിച്ചുള്ള ആക്രമണങ്ങള് ആരംഭിച്ചു. ഇങ്ങനെയാണ് തലശ്ശേരിയിലെ രാഷ്ട്രീയ ഏറ്റുമുട്ടലുകള് ആരംഭിക്കുന്നത്.'
പല സംസ്കാരങ്ങള് കൂടിച്ചേര്ന്നതിന്റെയും നാഗരികജീവിതത്തിന്റെ പല നേട്ടങ്ങളും ആദ്യമായി സ്വന്തമാക്കാന് കഴിഞ്ഞതിന്റെയും അഭിമാനകരമായ പാരമ്പര്യം തലശ്ശേരിക്കുണ്ട്. തലശ്ശേരി നഗരസഭ കേരളത്തിലെ ഏറ്റവും പഴയ നഗരസഭയാണ്. കേരളത്തിലെ ഏറ്റവും പഴയ ഉന്നത വിദ്യാഭ്യാസസ്ഥാപനങ്ങളിലൊന്നായ ഗവ. ബ്രണ്ണന് കോളേജ് ആദ്യം തലശ്ശേരി നഗരത്തിലാണ് പ്രവര്ത്തിച്ചു തുടങ്ങിയത്. പിന്നീടാണ് കോളേജ് തൊട്ടടുത്ത ഗ്രാമമായ ധര്മ്മടത്തേക്കു മാറ്റിയത്. 1883-ല് ഇന്ത്യയില് ആദ്യമായി ക്രിസ്മസ് കെയ്ക്കുണ്ടാക്കിയത് തലശ്ശേരിയിലെ മമ്പള്ളി ബാപ്പുവാണ്. ഇംഗ്ലീഷുകാരോടൊപ്പം മലയാളികള് ആദ്യമായി ക്രിക്കറ്റ് കളിച്ച നഗരം തലശ്ശേരിയാണ്. ഇന്ത്യന് സര്ക്കസ്സിന്റെ ഈറ്റില്ലവും തലശ്ശേരിതന്നെ. ഗുണ്ടര്ട്ടും എഡ്വേര്ഡ് ബ്രണ്ണനും ജീവിച്ച നഗരമാണിത്. എണ്ണിപ്പറയാവുന്ന ഈ നേട്ടങ്ങളെല്ലാം തലശ്ശേരിയുടേതാണെങ്കിലും സമീപഗ്രാമങ്ങളിലുള്ളവരും പല അളവിലും തരത്തിലും അവയില് പങ്കുപറ്റിയിട്ടുണ്ട്.
ബിരിയാണിയും ബേക്കറി ഐറ്റംസും മറ്റും ഏറ്റവും മികച്ച രീതിയില് ഉണ്ടാക്കുന്നതില് പ്രത്യേക വൈദഗ്ധ്യമുള്ളവരാണ് തലശ്ശേരിക്കാര്. അല്പ്പം മുമ്പുവരെയും കേരളത്തിലെ ഏറ്റവുമധികം ഫാഷന് കോണ്ഷ്യസ്സായ ജനത തലശ്ശേരിക്കാരായിരുന്നു. ഇങ്ങനെ തലശ്ശേരിക്കാര്ക്കും അവരുടെ അയല്ക്കാരായ പല ഗ്രാമപ്രദേശങ്ങളിലെയും ആളുകള്ക്കും പലതും അവകാശപ്പെടാനുണ്ടെങ്കിലും മനസ്സുകൊണ്ട് അവരെല്ലാം വലിയൊരളവോളം ഗ്രാമീണരാണ്. ഗ്രാമജീവിതത്തിന്റെ നല്ലതും ചീത്തയുമായ പ്രധാനപ്പെട്ട വശങ്ങളെല്ലാം അവരുടെ അടിസ്ഥാന പ്രകൃതത്തിലുണ്ട്. അന്യോന്യതയുടെ ഭാഗമായ പകരം ചോദിക്കാനുള്ള വാസനയും അതിന്റെ ഭാഗമാണ്. തലശ്ശേരിയിലും അടുത്ത പ്രദേശങ്ങളിലും നടന്ന രാഷ്ട്രീയ ഏറ്റുമുട്ടലുകളുടെയും കൊലപാതകങ്ങളുടെയും പിന്നില് മുഖ്യമായും രാഷ്ട്രീയകാരണങ്ങള്തന്നെയാണുള്ളതെങ്കിലും ഒരു ഘട്ടം കഴിഞ്ഞപ്പോള് മുകളില് പറഞ്ഞ വാസന ഭാഗികമായെങ്കിലും മേല്ക്കൈ നേടുകയാണുണ്ടായത്.
കേരളത്തിലെവിടെയുമെന്നപോലെ തലശ്ശേരി, ധര്മ്മടം, കതിരൂര്, കൂത്തുപറമ്പ്, പാനൂര് എന്നിവിടങ്ങളിലെല്ലാം പല പ്രകൃതക്കാരായ ആളുകളുണ്ട്. പക്ഷേ, പൊതുവേ ഇവിടങ്ങളിലെയെല്ലാം ജനങ്ങളുടെ സാധാരണ പെരുമാറ്റം വളരെ സൗഹാര്ദപൂര്ണമാണ്. തലശ്ശേരിക്കാര്ക്ക് പ്രത്യേകിച്ചും മതമൈത്രിയിലുള്ള താത്പര്യം സ്വഭാവത്തിന്റെ ഒരു ഭാഗമെന്നപോലെത്തന്നെയാണ്. അത് ആരുടെയെങ്കിലും പ്രേരണകൊണ്ട് അവര് സ്വീകരിച്ചതല്ല. രാജ്യത്ത് ശക്തമായിക്കൊണ്ടിരിക്കുന്ന വര്ഗീയതയില് ഊന്നിയ രാഷ്ട്രീയസാഹചര്യംകൊണ്ടുതന്നെ ഇപ്പോള് അങ്ങിങ്ങായി ചെറിയ ചില വിള്ളലുകള് പ്രത്യക്ഷപ്പെട്ടുതുടങ്ങിയിട്ടുണ്ടെങ്കിലും അന്യമതക്കാരനാണ് എന്നു ചിന്തിക്കാന് ഇട നല്കാത്ത വിധത്തിലാണ് തലശ്ശേരി മുസ്ലിങ്ങളില് മഹാഭൂരിപക്ഷവും മറ്റെല്ലാവരോടും ഇപ്പോഴും ഇടപെട്ടുവരുന്നത്. തലശ്ശേരിയിലെ 'മാളിയേക്കല്' എന്ന പ്രശസ്തമായ പഴയ മുസ്ലിം തറവാട്ടില് മുമ്പൊരിക്കല് ക്ഷണിക്കപ്പെടാതെതന്നെ ഒരു സുഹൃത്തിനോടൊപ്പം കല്യാണത്തിനു പോയതും 'യൂസഫിന്റെ കല്യാണം, എല്ലാര്ക്കും സന്തോഷം' എന്നു പാടിക്കൊണ്ട് ഒരു സംഘം ആളുകളോടൊപ്പം തറവാടിന്റെ കോലായിലേക്കു കയറിയതും എന്റെ ആഹ്ലാദപൂര്ണമായ ഓര്മകളിലൊന്നാണ്.
Content Highlights: N. Prabhakaran's Vadakkan manasu book excerpt
Published: 26 Aug 2024, 03:31 pm IST
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented