കലി തുളളി കാലവര്‍ഷം; വാഹനവുമായി നിരത്തിലിറങ്ങുമ്പോള്‍ ശ്രദ്ധിക്കേണ്ട കാര്യങ്ങള്‍

മുന്‍വര്‍ഷങ്ങളിലേതിന് സമാനമായി മഴ ശക്തിപ്പെടുകയാണ്. പലയിടങ്ങളിലും റോഡുകള്‍ വെള്ളക്കെട്ടുകളായി കഴിഞ്ഞു. ഈ സാഹചര്യത്തില്‍ അത്യാവശ്യ കാര്യങ്ങള്‍ക്ക് മാത്രം വാഹനവുമായി പുറത്തു പോകുന്നതാണ് ഉത്തമം. ഇത്തരത്തില്‍ വാഹനവുമായി നിരത്തിലിറങ്ങുന്ന ആളുകള്‍ നിര്‍ബന്ധമായും ഉറപ്പാക്കേണ്ട കാര്യങ്ങളാണ് ഇനി പറയുന്നത്. 

മികച്ച ടയറുകള്‍ ഉറപ്പാക്കുക

• നനഞ്ഞ് കിടക്കുന്ന നിരത്തുകളില്‍ വാഹനവുമായി ഇറങ്ങുന്നവര്‍ ടയറുകളുടെ കാര്യക്ഷമത ഉറപ്പാക്കണം. വെള്ളം കെട്ടി നില്‍ക്കുന്നതിനെ തുടര്‍ന്നുണ്ടാകുന്ന വഴുവഴുപ്പിനെ അതിജീവിക്കാനുള്ള ഗ്രിപ്പ് ടയറുകള്‍ക്കുണ്ടാവണം. തേയ്മാനം സംഭവിച്ച ടയറാണെങ്കില്‍ ബ്രേക്ക് ചെയ്യുന്ന സമയത്ത് വാഹനം തെന്നി മാറാനുള്ള സാധ്യത ഏറെയാണ്.

ബ്രേക്കിന്റെ പ്രവര്‍ത്തനം പരിശോധിക്കുക

• ടയര്‍ വെള്ളത്തില്‍ മുങ്ങുന്ന തരത്തില്‍ വാഹനമോടിയിട്ടുണ്ടെങ്കില്‍ ഇതിനുശേഷം ബ്രേക്ക് പ്രവര്‍ത്തന ക്ഷമമാണോയെന്ന് ഉറപ്പുവരുത്തണം. കാറുകളില്‍ കൂടുതലായ ഡിസ്‌ക് ബ്രേക്ക് ഉപയോഗിക്കുന്നത്. മഴയിലും വെള്ളക്കെട്ടിലും ഇതില്‍ ചെളിപിടിക്കാനുള്ള സാധ്യത എറെയാണ്. ഇത് വൃത്തിയാക്കാനും ശ്രദ്ധിക്കണം.

സഡന്‍ ബ്രേക്ക് ചെയ്യരുത്

• മഴക്കാല യാത്രകളില്‍ നനഞ്ഞുകിടക്കുന്ന റോഡില്‍ സഡന്‍ ബ്രേക്ക് പരമാവധി ഒഴിവാക്കുക. വെള്ളക്കെട്ടിലെ കുഴികളില്‍ ടയര്‍ വീണാലുടന്‍ ബ്രേക്ക് ചെയ്യുന്നതും ഒഴിവാക്കണം. ഇങ്ങനെ ചെയ്യുന്നത് പുകകുഴലില്‍ വെള്ളം കയറാനുള്ള സാധ്യത വര്‍ധിപ്പിക്കും. വെള്ളത്തില്‍ വാഹനം നിര്‍ത്തിയാല്‍ ചെറുതായി ആക്‌സിലറേറ്റര്‍ അമര്‍ത്തുന്നതും നല്ലതാണ്. 

കുറഞ്ഞ ഗിയറില്‍ ഓടിക്കുക

• മഴയുള്ളപ്പോഴും വെള്ളക്കെട്ടിലും കുറഞ്ഞ ഗിയറില്‍ വാഹനമോടിക്കുന്നത് ശീലമാക്കുക. വാഹനത്തിന്റെ നിയന്ത്രണത്തിന് ഇത് സഹായിക്കും. അതുപോലെ കുറഞ്ഞ ഗിയറില്‍ കൂടുതല്‍ റെയ്‌സ് ചെയ്ത് ഓടിക്കുന്നതിലൂടെ പുക കൂടുതലായി പുറംതള്ളുകയും പുകക്കുഴലില്‍ വെള്ളം കടക്കുന്നത് തടയാനും സഹായിക്കും.  

വാഹനങ്ങള്‍ തമ്മില്‍ അകലം പാലിക്കണം

• വെള്ളക്കെട്ടിലൂടെ നീങ്ങുമ്പോള്‍ വാഹനങ്ങള്‍ തമ്മില്‍ നിശ്ചിത അകലം പാലിക്കേണ്ടതാണ്. അല്ലാത്തപക്ഷം വാഹനമോടുമ്പോള്‍ വെള്ളക്കെട്ടിലുണ്ടാകുന്ന ഓളങ്ങള്‍ മൂലം പിന്നില്‍ വരുന്ന വാഹനത്തിന്റെ എയര്‍ഡാമിലൂടെ വെള്ളം ഉള്ളിലെത്താന്‍ സാധ്യതയുണ്ട്. ചെറുകാറുകളില്‍ ഇത് പ്രത്യേകം ശ്രദ്ധിക്കണം. 

പാര്‍ക്കിങ്ങിലും ശ്രദ്ധവേണം

• ശക്തമായ മഴയുള്ളപ്പോള്‍ വാഹനം മരങ്ങളുടെ താഴെയും വലിയ ഭിത്തികളുടെയും മറ്റും സമീപത്തും പാര്‍ക്ക് ചെയ്യാതിരിക്കാന്‍ ശ്രദ്ധിക്കണം. മരത്തിന്റെ കൊമ്പുകളും മറ്റും ഒടിഞ്ഞ് വാഹനത്തില്‍ വീഴുന്നതില്‍നിന്നും മണ്ണിടിച്ചില്‍ പോലെയുള്ളവയില്‍നിന്നും വാഹനത്തെ സംരക്ഷിക്കുന്നതിനായാണിത്. 

ഓഫായ വാഹനം സ്റ്റാര്‍ട്ട് ചെയ്യരുത്

• വെള്ളക്കെട്ടിനുള്ളില്‍ വാഹനം നിന്ന് പോകുന്നതാണ് ഈ മഴക്കാലത്ത് പതിവായുണ്ടാകുന്ന വെല്ലുവിളി. ഈ സാഹചര്യത്തില്‍ പരിഭ്രാന്തരാകുന്ന ആളുകള്‍ പിന്നെയും വാഹനം സ്റ്റാര്‍ട്ട് ചെയ്യുകയാണ് പതിവ്. എന്നാല്‍, ഇത് തെറ്റായ കീഴ്വഴക്കമാണ്. വെള്ളത്തില്‍ നിന്നുപോയാല്‍ വാഹനം വീണ്ടും സ്റ്റാര്‍ട്ട് ചെയ്യാതെ സര്‍വീസ് സ്റ്റേഷന്റെ സഹായം തേടണം. 

Content Highlights: Directions To Safe Driving During Heavy Rain And Flood