സ്‌കോഡ ഇന്ത്യയുടെ ലൈനപ്പിലെ ഏറ്റവും വില കുറഞ്ഞ വാഹനം, ആദ്യ കോംപാക്ട് എസ്.യു.വി. തുടങ്ങിയ വിശേഷണങ്ങള്‍ ഇണങ്ങുന്ന വാഹനമാണ് കൈലാഖ്. നവംബര്‍ ആദ്യവാരം പ്രദര്‍ശനത്തിനെത്തിച്ച ഈ വാഹനത്തിന്റെ കൂടുതല്‍ വിവരങ്ങള്‍ പുറത്തായിരിക്കുകയാണ്. ഇതിനോടകം തന്നെ ബുക്കിങ്ങ് ആരംഭിച്ച ഈ വാഹനത്തിന്റെ വിതരണം 2025 ജനുവരി 27 മുതല്‍ ആരംഭിക്കുമെന്നാണ് നിര്‍മാതാക്കളായ സ്‌കോഡ ഇന്ത്യ അറിയിച്ചിരിക്കുന്നത്.
ക്ലാസിക്,. സിഗ്നേച്ചര്, സിഗ്നേച്ചര് പ്ലസ്, പ്രസ്റ്റീജ് എന്നീ നാല് വേരിയന്റുകളിലാണ് സ്‌കോഡ കൈലാഖ് വിപണിയില്‍ എത്തുന്നത്. യഥാക്രമം 7.89 ലക്ഷം, 9.59 ലക്ഷം, 11.40 ലക്ഷം, 13.35 ലക്ഷം രൂപ എന്നിങ്ങനെയാണ് ഈ വേരിയന്റുകളുടെ മാനുവല്‍ ട്രാന്‍സ്മിഷന്‍ പതിപ്പിന്റെ എക്‌സ്‌ഷോറൂം വില. മൂന്ന് വേരിയന്റുകളില്‍ എത്തുന്ന ഓട്ടോമാറ്റിക് പതിപ്പിന് യഥാക്രമം 10.59 ലക്ഷം, 12.40 ലക്ഷം, 14.40 ലക്ഷം എന്നിങ്ങനെയാണ് എക്‌സ്‌ഷോറൂം വിലയാകുന്നത്.
സ്‌കോഡയുടെ പുതിയ ഡിസൈന്‍ ശൈലിയായ മോഡേണ്‍ സോളിഡ് അനുസരിച്ചാണ് കൈലാഖ് നിര്‍മിച്ചിരിക്കുന്നത്. സ്‌കോഡ പ്രാദേശികമായി വികസിപ്പിച്ചിട്ടുള്ള എം.ക്യു.ബി. എ.ഒ. ഇന്‍ പ്ലാറ്റ്ഫോമിലാണ് ഈ കോംപാക്ട് എസ്.യു.വിയും ഒരുങ്ങിയിരിക്കുന്നത്. ലുക്കില്‍ സ്‌കോഡയുടെ മിഡ്-സൈസ് എസ്.യു.വി. മോഡലായ കുഷാക്കിനോട് ഏറെക്കുറെ സാമ്യമുള്ള വാഹനമാണ് കൈലാഖും. സ്‌കോഡയുടെ സിഗ്നേച്ചര് ഗ്രില്ല്, ബമ്പറില്‍ സ്ഥാനം പിടിച്ചിട്ടുള്ള എല്‍.ഇ.ഡി. ഹെഡ്ലാമ്പ്, എല്‍.ഇ.ഡി. ഡി.ആര്‍.എല്‍, വലിയ എയര്‍ഡാം എന്നിവയാണ് മുഖഭാവത്തിലെ അലങ്കാരങ്ങള്‍.
സ്പോര്‍ട്ടി ഭാവത്തില്‍ ഒരുങ്ങിയിട്ടുള്ള അലോയി വീല്‍. ബ്ലാക്ക് ഫിനീഷിങ്ങ് വീല്‍ ആര്‍ച്ചും ഡോര്‍ ക്ലാഡിങ്ങും, സില്‍വര്‍ ഫിനീഷിങ് റൂഫ് റെയില്‍, റിയര്‍ പ്രൊഫൈല്‍ സ്‌കോഡയുടെ മറ്റ് എസ്.യു.വികളുമായി സമാനതകളോടെയാണ് ഡിസൈന്‍ ചെയ്തിരിക്കുന്നത്. ഇന്റീരിയറിന്റെ ഡിസൈനില്‍ സ്‌കോഡയുടെ പതിവ് ലാളിത്യം പുലര്‍ത്തിയിട്ടുണ്ട്. ടച്ച് സ്‌ക്രീന്‍ ഇന്‍ഫോടെയ്ന്‍മെന്റ് സിസ്റ്റം, ഡിജിറ്റല്‍ ഇന്‍സ്ട്രുമെന്റ് ക്ലെസ്റ്റര്‍, ലെതര്‍ ഫിനീഷിങ് സീറ്റുകള്‍, ഓട്ടോമാറ്റിക് ക്ലൈമറ്റ് കണ്‍ട്രോള്‍ തുടങ്ങിയവയാണ് ഇന്റീരിയറിലുള്ളത്.
സ്‌കോഡയുടെ വിവിധ മോഡലുകളില്‍ കരുത്തേകുന്ന 1.0 ലിറ്റര്‍ മൂന്ന് സിലിണ്ടര്‍ ടര്‍ബോ പെട്രോള്‍ എന്‍ജിനാണ് കൈലാഖിലും നല്‍കിയിരിക്കുന്നത്. ഇത് 115 എച്ച്.പി. പവറും 178 എന്‍.എം. ടോര്‍ക്കുമാണ് ഉത്പാദിപ്പിക്കുന്നത്. മാനുവല്‍, ടോര്‍ക്ക് കണ്‍വേര്‍ട്ടര്‍ ഓട്ടോമാറ്റിക് എന്നീ ട്രാന്‍സ്മിഷനുകള്‍ ഒരുങ്ങും. സുരക്ഷ ഉറപ്പാക്കുന്നതിനായി 35-ല്‍ അധികം ആക്ടീവ്-പാസീവ് ഫീച്ചറുകളാണ് ഈ വാഹനത്തില്‍ നല്‍കിയിട്ടുള്ളതെന്നാണ് സ്‌കോഡ അറിയിച്ചിരിക്കുന്നത്.
ഏഴ് നിറങ്ങളിലാണ് കൈലാഖ് പുറത്തിറങ്ങുക. കാര്‍ബണ്‍ സ്റ്റീല്‍, ടൊര്‍ണാഡൊ റെഡ്, കാന്‍ഡ് വൈറ്റ്, ബ്രില്യന്റ് സില്‍വര്‍, ഡീപ്പ് ബ്ലാക്ക്, ലാവ ബ്ലൂ, ഒലീവ് ഗോള്‍ഡ് എന്നിവയാണ് നിറങ്ങള്‍. കൈലാഖ് ബുക്കുചെയ്യുന്ന ആദ്യ 33,333 ഉപയോക്താക്കള്‍ക്ക് സ്‌പെഷ്യല്‍ മെയിന്റനന്‍സ് പാക്കേജ് ഒരുക്കുമെന്നാണ് സ്‌കോഡ അറിയിച്ചിരിക്കുന്നത്. 1,00,000 ലക്ഷം കിലോമീറ്റര്‍ അല്ലെങ്കില്‍ മൂന്ന് വര്‍ഷമാണ് ഈ വാഹനത്തിന് നല്‍കുന്ന അടിസ്ഥാന വാറണ്ടി.
Content Highlights: Skoda Kylaq full variant details and pricing officially announced.
Published: 08 Dec 2024, 02:32 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented