മുൻ ഇന്ത്യൻ ക്യാപ്റ്റൻ രോഹിത് ശർമ ടെസ്‌ല മോഡൽ Y കാർ ഓടിക്കുന്ന വീഡിയോ സോഷ്യൽ മീഡിയയിൽ വൈറൽ.കറുത്ത ടീ-ഷർട്ടും തൊപ്പിയും ധരിച്ച് കാറോടിക്കുന്ന രോഹിത്തിനെയാണ് ദൃശ്യങ്ങളിൽ കാണുന്നത്. എന്നാൽ ഈ ടെസ്‌ലയുടെ നമ്പർ പ്ലേറ്റിലാണ് രസകരമായ ഒരു കാര്യമുള്ളത്.

To advertise here,

തന്റെ പുതിയ കാറിന് ‘3015’ എന്ന പ്രത്യേക നമ്പറാണ് താരം തിരഞ്ഞെടുത്തത്. ഇത് അദ്ദേഹത്തിന്റെ കുട്ടികളുടെ ജനന തയതികളെ സൂചിപ്പിക്കുന്നുവെന്നാണ് റിപ്പോർട്ട്. രോഹിത്തിൻ്റെ മക്കളായ, ഡിസംബർ 30-ന് ജനിച്ച സമൈറയുടെയും നവംബർ 15-ന് ജനിച്ച അഹാന്റെയും ജന്മദിനങ്ങൾ അടിസ്ഥാനമാക്കിയാണ് ഇത് തയ്യാറാക്കിയിരിക്കുന്നത് എന്നാണ് ദേശീയമാധ്യമങ്ങൾ റിപ്പോർട്ടുചെയ്യുന്നത്.

തന്റെ പുതിയ ലംബോർഗിനി ഉറൂസ് എസ്ഇ-ക്കും രോഹിത് ഇതേ നമ്പർ തന്നെയാണ് ഉപയോഗിച്ചിരിക്കുന്നത്. അരാൻസിയോ ആർഗോസ് (ഓറഞ്ച്) നിറമാണ് ഈ കാറിന്. ബിഎംഡബ്ല്യു, മെഴ്‌സിഡീസ് മുതൽ മുൻപുണ്ടായിരുന്ന നീല ലംബോർഗിനി ഉറൂസ് വരെയുള്ള പ്രീമിയം വാഹനങ്ങളുടെ ഒരു വലിയ ശേഖരം രോഹിത്തിന്റെ ഗ്യാരേജിലുണ്ട്.

ടെസ്‌ല മോഡൽ Y

ആഡംബരം, സാങ്കേതികവിദ്യ, പ്രകടനം എന്നിവയുടെ ഒരു സമന്വയമാണ് ടെസ്‌ല മോഡൽ Y. 15.4 ഇഞ്ച് ടച്ച്‌സ്‌ക്രീൻ, ഹീറ്റഡ്, വെൻ്റിലേറ്റഡ് സീറ്റുകൾ, ആംബിയൻ്റ് ലൈറ്റിങ്, റിയർ-വീൽ ഡ്രൈവ്, 9 സ്പീക്കർ ഓഡിയോ സിസ്റ്റം, ഓട്ടോമാറ്റിക് എമർജൻസി ബ്രേക്കിങ് (AEB), ബ്ലൈൻഡ്-സ്പോട്ട് കൊളിഷൻ വാണിങ്, ടിൻ്റഡ് ഗ്ലാസ് റൂഫ് എന്നിവ പ്രധാന സവിശേഷതകളാണ്.

ഇന്ത്യയിൽ മോഡൽ Y-ക്ക് രണ്ട് ബാറ്ററി ഓപ്ഷനുകളുണ്ട്. സ്റ്റാൻഡേർഡ് 60 kWh ബാറ്ററി 500 കിലോമീറ്റർ WLTP-സർട്ടിഫൈഡ് റേഞ്ച് നൽകുമ്പോൾ, 75 kWh ലോങ് റേഞ്ച് പതിപ്പ് ഒറ്റ ചാർജിൽ 622 കിലോമീറ്റർ വരെ റേഞ്ച് വാഗ്ദാനം ചെയ്യുന്നു. 295 ബിഎച്ച്പി ഉത്പാദിപ്പിക്കുന്ന റിയർ-മൗണ്ടഡ് ഇലക്ട്രിക് മോട്ടോറാണ് ഈ ഇലക്ട്രിക് ക്രോസ്ഓവറിന് കരുത്തേകുന്നത്.

5.9 സെക്കൻഡിനുള്ളിൽ 0-100 കിലോമീറ്റർ വേഗത കൈവരിക്കാനാകും. 2025 ജൂലായിലാണ് ഇന്ത്യയിൽ മോഡൽ Y പുറത്തിറക്കിയത്. സ്റ്റാൻഡേർഡ് മോഡലിന് 59.89 ലക്ഷം (എക്സ്-ഷോറൂം) മുതലും ലോങ് റേഞ്ച് വേരിയൻ്റിന് 67.89 ലക്ഷം (എക്സ്-ഷോറൂം) മുതലുമാണ് വില ആരംഭിക്കുന്നത്.