രാജ്യത്തെ ദേശീയ പാതകളിലും എക്‌സ്പ്രസ് വേകളിലുമുള്ള ടോൾ പിരിവിൽ റെക്കോർഡ്. ഒക്ടോബറിൽ ടോൾ പിരിവ് എക്കാലത്തെയും ഉയർന്ന നിരക്കായ 6,640 കോടി രൂപയിലെത്തി. രാജ്യത്തെ ഹൈവേ ശൃംഖലയുമായി ബന്ധപ്പെട്ട സാമ്പത്തിക പ്രവർത്തനങ്ങൾ വർധിച്ചതും വാഹനങ്ങളുടെ യാത്രകൾ കൂടിയതുമാണ് ഇത് സൂചിപ്പിക്കുന്നതെന്ന് വിലയിരുത്തപ്പെടുന്നു.

To advertise here,

2025 ഒക്ടോബറിൽ രേഖപ്പെടുത്തിയ 5,715 കോടി രൂപയേക്കാൾ ഏകദേശം 16 ശതമാനം കൂടുതലാണ് ഈവർഷം ഒക്ടോബറിലെ യൂസർ ഫീ ശേഖരണം. ഈ വർഷം മെയ് മാസത്തിൽ ശേഖരിച്ച 6,185 കോടി രൂപയായിരുന്നു ഇതിനുമുമ്പത്തെ ഏറ്റവും ഉയർന്ന പ്രതിമാസ ടോൾ വരുമാനം. ഈ പ്രവണത തുടരുകയാണെങ്കിൽ, മൊത്തത്തിലുള്ള ടോൾ പിരിവ് 74,000 കോടി രൂപയ്ക്കടുത്തായിരിക്കുമെന്ന് വിലയിരുത്തപ്പെടുന്നു.

ടോൾ ബൂത്തുകളിൽ നേരിട്ട് പണം നൽകുന്ന രീതിയിലും കാര്യമായ മാറ്റം പ്രകടമാകുന്നുണ്ട്. കഴിഞ്ഞ വർഷം ഒക്ടോബറിലെ 84 കോടി രൂപയിൽ നിന്ന് കഴിഞ്ഞ മാസം പണമായി ലഭിച്ച തുക 4 കോടി രൂപയായി ഗണ്യമായി കുറഞ്ഞു. അതേസമയം,യുണിഫൈഡ് പേയ്മെന്റ് ഇന്റർഫേസ് (യുപിഐ) വഴിയുള്ള പണമടയ്ക്കൽ ഒക്ടോബറിൽ ഏകദേശം 100 കോടി രൂപയായി ഉയർന്നു.

ഹൈവേ യൂസർ ഫീസുകൾക്കായി പണം നൽകുന്ന രീതി ഒഴിവാക്കാനും ഫാസ്ടാഗ് (FASTag) അല്ലെങ്കിൽ യുപിഐ എന്നിവ ഡിഫോൾട്ട് രീതികളായി ഉപയോഗിക്കാനും സർക്കാരിൽ നിന്നുള്ള നിർദ്ദേശങ്ങൾ വന്നതിനെത്തുടർന്നാണ് പണമിടപാടുകളിൽ പെട്ടെന്ന് ഇടിവുണ്ടായത്.

ടോൾ പേയ്മെന്റുകൾക്കായി പണം പൂർണമായും ഒഴിവാക്കുന്നുണ്ടെന്ന് ഉറപ്പാക്കാൻ കർശനമായ നിരീക്ഷണം നടത്തിവരികയാണെന്ന് ഉദ്യോഗസ്ഥർ പറയുന്നു. പണമിടപാടുകൾ അവസാനിക്കുന്നതോടെ ക്രമക്കേടുകൾക്കുള്ള സാധ്യത ഇല്ലാതാകുമെന്നാണ് വിലയിരുത്തപ്പെടുന്നത്. കൂടുതൽ പേർ ഫാസ്ടാഗ് വാർഷിക പാസുകൾ തിരഞ്ഞെടുക്കുന്നുണ്ട് എന്നതും ശ്രദ്ധേയമാണ്. ഇത് നല്ല സൂചനയാണെന്ന് ഉദ്യോഗസ്ഥർ വിലയിരുത്തുന്നു.