പത്ത് കോടി വാഹനങ്ങള്‍ നിരത്തുകളില്‍ എത്തിച്ചതിന്റെ ആഘോഷത്തിലാണ് ഇന്ത്യയിലെ മുന്‍നിര ഇരുചക്ര വാഹന നിര്‍മാതാക്കളായ ഹീറോ മോട്ടോകോര്‍പ്. എക്‌സ്ട്രീം 160ആര്‍ എന്ന മോഡലിലൂടെയാണ് 10 കോടി എന്ന നമ്പര്‍ പൂര്‍ത്തിയാക്കിയത്. അതുകൊണ്ട് തന്നെ ഈ ബൈക്കിന്റെ ലിമിറ്റഡ് എഡിഷന്‍ പതിപ്പ് വിപണിയില്‍ എത്തിക്കാനൊരുങ്ങുകയാണ് ഹീറോ. 100 മില്ല്യണ്‍ ലിമിറ്റഡ് എഡിഷന്‍ എന്ന പേരിലാണ് എക്‌സ്ട്രീം 160 ആറിന്റെ പ്രത്യേക പതിപ്പ് എത്തുന്നത്.
എക്‌സ്ട്രീം 160 ആറിന്റെ റെഗുലര്‍ പതിപ്പിന്റെ രൂപത്തില്‍ ഡിസൈനില്‍ അല്‍പ്പം പുതുമ വരുത്തിയാണ് ലിമിറ്റഡ് എഡിഷന്‍ പതിപ്പ് എത്തുന്നത്. വെള്ള-ചുവപ്പ് ഇരട്ട നിറങ്ങള്‍ക്കൊപ്പം പുതിയ ബോഡി ഗ്രാഫിക്‌സും നല്‍കിയാണ് ഈ മോഡല്‍ ഡിസൈന്‍ ചെയ്തിരിക്കുന്നത്. എല്‍.ഇ.ഡി.ഹെഡ്‌ലാമ്പ്, ഇന്റിക്കേറ്ററുകള്‍, മിനിമല്‍ കൗള്‍, സിംഗിള്‍ പീസ് സീറ്റ്. എച്ച് സിഗ്‌നേച്ചര്‍ രൂപത്തില്‍ ഒരുങ്ങിയ എല്‍.ഇ.ഡി.ടെയ്ല്‍ലാമ്പ് എന്നിവ റെഗുലര്‍ മോഡലില്‍ നിന്ന് കടംകൊണ്ടതാണ്.
ഫുള്‍ ഡിജിറ്റലായുള്ള എല്‍.സി.ഡി. ഇന്‍സ്ട്രുമെന്റ് കണ്‍സോളാണ് എക്‌സ്ട്രീം 160 ആര്‍ 100 മില്ല്യണ്‍ എഡിഷനില്‍ നല്‍കിയിട്ടുള്ളത്. ഇതില്‍ ഹാസാഡ്സ് ലൈറ്റ്, സൈഡ് സ്റ്റാന്റ് ഇന്റിക്കേറ്റര്‍, എന്‍ജിന്‍ കട്ട്-ഓഫ് തുടങ്ങിയവ ഒരുക്കിയിട്ടുണ്ട്. 17 ഇഞ്ച് വലിപ്പമുള്ള ടയറുകളാണ് ഇതില്‍ നല്‍കിയിട്ടുള്ളത്. മുന്നില്‍ 276 എം.എം. ഡിസ്‌കും പിന്നില്‍ 220 എം.എം. ഡിസ്‌കുമാണ് ബ്രേക്കിങ്ങ് ഒരുക്കുന്നത്. ഡ്യുവല്‍ ചാനല്‍ എ.ബി.എസ് ഇതില്‍ സുരക്ഷ കാര്യക്ഷമാക്കും.
റെഗുലര്‍ മോഡലിന് സമാനമായി ഫ്യുവല്‍ ഇഞ്ചക്ഷന്‍ സാങ്കേതികവിദ്യയിലുള്ള 163 സി.സി. എയര്‍-കൂള്‍ഡ് എന്‍ജിനാണ് ലിമിറ്റഡ് എഡിഷന്‍ മോഡലിലും പ്രവര്‍ത്തിക്കുന്നത്. ഇത് 15 ബി.എച്ച്.പി.പവറും 14 എന്‍.എം.ടോര്‍ക്കുമാണ് ഉത്പാദിപ്പിക്കുന്നത്. അഞ്ച് സ്പീഡ് മാനുവല്‍ ഗിയര്‍ബോക്‌സാണ് ഇതില്‍ ട്രാന്‍സ്മിഷന്‍ ഒരുക്കുന്നത്. കേവലം 4.7 സെക്കന്റില്‍ പൂജ്യത്തില്‍ നിന്ന് 60 കിലോമീറ്റര്‍ വേഗത കൈവരിക്കാന്‍ ഈ വാഹനത്തിനാകും. 139.5 കിലോയാണ് ആകെ ഭാരം.
ഹീറോ എക്‌സ്ട്രീം 160 ആറിന്റെ ഡബിള്‍ ഡിസ്‌ക് വേരിയന്റിന് 1.06 ലക്ഷം രൂപ മുതലും സിംഗിള്‍ ഡിസ്‌ക് വേരിയന്റിന് 1.03 ലക്ഷം രൂപയിലുമാണ് എക്‌സ്‌ഷോറും വില ആരംഭിക്കുന്നത്. 100 മില്ല്യണ്‍ എഡിഷന്‍ മോഡല്‍ ഹീറോയുടെ വെബ്‌സൈറ്റില്‍ പ്രദര്‍ശിപ്പിച്ചിട്ടുണ്ടെങ്കിലും വില സംബന്ധിച്ച സൂചനകള്‍ നല്‍കിയിട്ടില്ല. റെഗുലര്‍ മോഡലിനെക്കാള്‍ വില ഉയര്‍ത്തിയാകും ലിമിറ്റഡ് എഡിഷന്‍ എത്തിക്കുകയെന്നാണ് സൂചനകള്‍.
Content Highlights: Hero Xtreme 160R 100 Million Limited Edition To Be Launch Soon
Published: 17 Feb 2021, 03:57 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented