തീരദേശപാതയിൽ പുതിയ മെമു, പാസഞ്ചർ ട്രെയിനുകൾ പരിഗണനയിൽ

ടാറ്റാനഗറിനു പച്ചക്കൊടിയില്ലെന്ന് സൂചന

ആലപ്പുഴ : തീരദേശപാതയിലെ യാത്രാക്ലേശത്തിനു പരിഹാരമായി പുതിയ മെമു, പാസഞ്ചർ ട്രെയിനുകൾ പരിഗണിക്കുന്നു. തിരുവനന്തപുരത്തേക്കു നീട്ടിയ ധൻബാദിനു പകരമായാണ് പുതിയ ട്രെയിനുകൾ പരിഗണിക്കുന്നത്. എന്നാൽ, എറണാകുളത്ത് സർവീസ് അവസാനിപ്പിക്കുന്ന ടാറ്റാനഗർ എക്സ്പ്രസ് ആലപ്പുഴയിലേക്കു നീട്ടില്ലെന്ന കാര്യത്തിൽ തീരുമാനമായി. ടാറ്റാനഗർ എക്സ്പ്രസ് ആലപ്പുഴയിലേക്കു നീട്ടണമെന്ന ആവശ്യം യാത്രക്കാർക്കിടയിൽ ശക്തമാണ്. ട്രെയിൻ ദീർഘനേരം എറണാകുളത്ത് നിർത്തിയിടുന്ന സാഹചര്യം സർവീസ് നീട്ടുന്നതിനുള്ള സാധ്യതയായി ചൂണ്ടിക്കാട്ടപ്പെടുന്നു. എന്നാൽ, ഈ ആവശ്യം റെയിൽവേ പരിഗണിക്കുന്നില്ലെന്ന വിവരം പ്രതിഷേധത്തിന് ഇടയാക്കുന്നുണ്ട്. ടാറ്റാനഗർ എക്സ്പ്രസ് നീട്ടാൻ കഴിയാത്ത സാഹചര്യമാണെങ്കിൽ പകരം പുതിയ പാസഞ്ചർ ട്രെയിൻ അനുവദിക്കണമെന്ന ആവശ്യം റെയിൽവേ ഗൗരവമായി പരിഗണിക്കുന്നുണ്ട്.

പുതിയ മെമു, പാസഞ്ചർ സർവീസുകൾ പരിഗണിക്കുമ്പോൾ വടക്കൻമേഖലയിലെ യാത്രക്കാർക്കു ലഭിക്കുന്ന പരിഗണനയ്ക്കു സമാനമായി തെക്കോട്ടുള്ള യാത്രക്കാരുടെ ആവശ്യങ്ങളും കണക്കിലെടുക്കണമെന്നാണ് ഉയരുന്ന ആവശ്യം. നിലവിൽ തീരദേശപാതയിൽ അമ്പലപ്പുഴ, ഹരിപ്പാട് തുടങ്ങിയ സ്റ്റേഷനുകളിൽനിന്ന് രാവിലെ യാത്രചെയ്യുന്നവർക്ക് അനുയോജ്യമായ ട്രെയിൻ സൗകര്യം പരിമിതമാണെന്നും ഏറനാട് എക്സ്പ്രസിനെ ആശ്രയിക്കേണ്ടിവരുന്ന സാഹചര്യമാണെന്നും യാത്രക്കാർ ചൂണ്ടിക്കാട്ടുന്നു. പുതിയ പാസഞ്ചർ ട്രെയിൻ അനുവദിക്കുകയാണെങ്കിൽ കൊല്ലത്തുനിന്ന് സർവീസ് ആരംഭിക്കണമെന്നാണ് യാത്രക്കാരുടെ ആവശ്യം.

കരുനാഗപ്പള്ളി, ഹരിപ്പാട്, അമ്പലപ്പുഴ തുടങ്ങിയ സ്റ്റേഷനുകളിലെ യാത്രക്കാർക്കും പ്രയോജനം ലഭിക്കുന്ന രീതിയിൽ സർവീസ് ക്രമീകരിക്കണമെന്നാണ് ആവശ്യം. പുതിയ ട്രെയിൻ അനുവദിക്കുന്നതുകൊണ്ടു മാത്രം പ്രശ്നം പരിഹരിക്കപ്പെടില്ലെന്നും യാത്രക്കാരുടെ യഥാർഥ ആവശ്യങ്ങൾക്കനുസരിച്ചുള്ള സമയക്രമവും സ്റ്റോപ്പുകളും ഉറപ്പാക്കണമെന്നും യാത്രക്കാർ ആവശ്യപ്പെടുന്നു. അതോടൊപ്പം ആലപ്പുഴയിലെ പിറ്റ് ലൈനും മെയിന്റനൻസ് ഡിപ്പോയും സംരക്ഷിക്കാനുള്ള നടപടികളും സ്വീകരിക്കണമെന്നാണ് യാത്രക്കാരുടെയും സംഘടനകളുടെയും ആവശ്യം.