ഭാരതത്തിലുടനീളം സാധാരണ കളയായി കാണപ്പെടുന്നതും എന്നാൽ അങ്ങേയറ്റം ഔഷധഗുണമുള്ളതുമായ സസ്യമാണ് തഴുതാമ. ശാസ്ത്രീയമായി ബോർഹാവിയ ഡിഫ്യൂസ (Boerhavia diffusa) എന്ന് വിളിക്കപ്പെടുന്ന ഈ സസ്യം ആയുർവേദത്തിൽ പുനർന്നവ വർഷഭവഃ, ശോഭഘ്‌നി എന്നീ പേരുകളിൽ അറിയപ്പെടുന്നു. ഇംഗ്ലീഷിൽ ഇതിനെ സ്‌പ്രെഡിങ് ഹോഗ്‌വീഡ് എന്നാണ് വിളിക്കുന്നത്. ഔഷധ ആവശ്യങ്ങൾക്കായി ഇതിന്റെ ഇല, വേര് എന്നിവയും ചെടി സമൂലമായും ഉപയോഗിക്കാറുണ്ട്.

To advertise here,

വേനൽക്കാലത്ത് ഉണങ്ങിക്കരിഞ്ഞു പോയാലും വർഷകാലത്തെ ആദ്യ മഴയോടെ വീണ്ടും തളിർത്തു പടർന്നു വളരുന്നതിനാലാണ് ഇതിന് പുനർന്നവ എന്ന പേര് ലഭിച്ചത്. നിലത്ത് ഏകദേശം രണ്ട് മീറ്റർ വരെ വിസ്താരത്തിൽ അനേകം ശാഖകളോടെ പടർന്നു വളരുന്ന ഇതിൽ ചെറിയ പൂക്കൾ കുലകളായി കാണപ്പെടുന്നു. തണ്ടിന്റെയും പൂവിന്റെയും നിറത്തെ അടിസ്ഥാനമാക്കി ഇതിനെ ചുവന്ന തഴുതാമ എന്നും വെള്ള തഴുതാമ എന്നും രണ്ട് വിഭാഗങ്ങളായി തരംതിരിച്ചിരിക്കുന്നു.

ആരോഗ്യസംരക്ഷണത്തിൽ തഴുതാമയ്ക്കുള്ള പങ്ക് വളരെ വലുതാണ്. ഇതിന് വൃക്ക രോഗങ്ങളെ ശമിപ്പിക്കാനും ഹൃദയത്തെ ഉത്തേജിപ്പിക്കാനും സവിശേഷമായ കഴിവുണ്ട്. ശരീരത്തിലെ നീരും വാതരോഗങ്ങളും അകറ്റാൻ ഇത് ഏറെ ഫലപ്രദമാണ്. സുകുമാര കഷായം, പുനർന്നവാദി കഷായം, രാസ്‌നാസപ്തകം കഷായം തുടങ്ങി നിരവധി ആയുർവേദ ഔഷധങ്ങളിലെ പ്രധാന ചേരുവയാണിത്. ഇതിൽ അടങ്ങിയിരിക്കുന്ന ബൊറ്യാവിൻ, പുനർന്നാവോസൈഡ് തുടങ്ങിയ രാസഘടകങ്ങൾ ആന്റി ഇൻഫ്‌ലമേറ്ററി, ഡയൂററ്റിക് ഗുണങ്ങൾ നൽകുന്നു.

ഭക്ഷണക്രമത്തിലും തഴുതാമയ്ക്ക് പ്രധാന സ്ഥാനമുണ്ട്. കേരളത്തിൽ കർക്കടക മാസത്തിൽ ആരോഗ്യത്തിനായി കഴിക്കുന്ന 'പത്തിലകളിൽ' ഒന്നാണ് തഴുതാമ. തഴുതാമയുടെ ഇലകൾ കൊണ്ട് തയ്യാറാക്കുന്ന തോരൻ വളരെ സ്വാദിഷ്ടമാണ്. ഔഷധഗുണമുള്ളതോടൊപ്പം തന്നെ പോഷകസമൃദ്ധവുമാണ് ഈ ഇലക്കറി. മുറ്റത്തെ ഈ കളയെ വെറുതെ പറിച്ചുകളയാതെ ആഹാരത്തിന്റെ ഭാഗമാക്കുന്നത് ശാരീരിക ഉന്മേഷത്തിന് സഹായിക്കും.

വാണിജ്യപരമായും തഴുതാമ കൃഷി ഏറെ ലാഭകരമാണ്. നല്ല വെയിലുള്ളതും നീർവാഴ്ചയുള്ളതുമായ മണ്ണിൽ ഇത് വേഗത്തിൽ പടർന്നു വളരും. വിത്ത് മുളച്ച് വെറും നാല് ആഴ്ച കൊണ്ട് ഇത് പൂവിടാൻ തുടങ്ങുകയും വർഷം മുഴുവൻ വിത്തുകൾ ഉത്പാദിപ്പിക്കുകയും ചെയ്യും. വിളവെടുത്ത ശേഷം മൂപ്പെത്തിയ തണ്ടുകളും വേരുകളും ഉണക്കി വിപണിയിലെത്തിച്ചാൽ കിലോയ്ക്ക് 190 രൂപ മുതൽ 240 രൂപ വരെ വില ലഭിക്കാറുണ്ട്.