ദുരിതത്തിലായി യാത്രക്കാർ

To advertise here,

വൈത്തിരി : 2018-ലെ പ്രളയത്തിൽ തകർന്ന വൈത്തിരിടൗണിലെ പഞ്ചായത്ത് ബസ് സ്റ്റാൻഡ് ഷോപ്പിങ് കോംപ്ലക്സ് പുനർനിർമിക്കാത്തത് നാട്ടുകാർക്കും യാത്രക്കാർക്കും ദുരിതമാകുന്നു. വർഷങ്ങൾ പിന്നിട്ടിട്ടും കെട്ടിടം പുനർനിർമിക്കുന്നതിനുള്ള നടപടികൾ ഉണ്ടാകാത്തത് പ്രതിസന്ധി രൂക്ഷമാക്കുകയാണ്.

2015ൽ നിർമിച്ച ബസ് സ്റ്റാൻഡ് ഷോപ്പിങ് കോംപ്ലക്സാണ് 2018 ലെ പ്രളയത്തിൽ കനത്ത മഴയെത്തുടർന്ന് മണ്ണിനടിയിലേക്ക് താഴ്ന്നുപോയത്. കെട്ടിടത്തിൽ പ്രവർത്തിച്ചിരുന്ന നാല് കടകളും എ.ടി.എം. ഉൾപ്പെടെയുള്ള സംവിധാനങ്ങളും തകർന്നു. ഇവിടെയുണ്ടായിരുന്ന സാധനസാമഗ്രികളും ഇപ്പോഴും മണ്ണിനടിയിലാണ്.

ഷോപ്പിങ് കോംപ്ലക്സ് പ്രവർത്തിച്ചിരുന്ന കാലത്ത് ബസുകൾക്ക് കൃത്യമായി കയറാനും ഇറങ്ങാനും സൗകര്യമുണ്ടായിരുന്നു. യാത്രക്കാർക്ക് വിശ്രമിക്കാനും ഇരിക്കാനുമുള്ള സംവിധാനങ്ങളും ഇവിടെ ലഭ്യമായിരുന്നു. എന്നാൽ കെട്ടിടം തകർന്നതോടെ ഇത്തരം സൗകര്യങ്ങളെല്ലാം ഇല്ലാതായി.

നിലവിൽ താത്കാലികമായി ഒരുക്കിയ ചെറിയ രണ്ട് ബസ് സ്റ്റാൻഡുകളെയാണ് യാത്രക്കാർ ആശ്രയിക്കുന്നത്. യാത്രക്കാരുടെ തിരക്ക് ഉൾക്കൊള്ളാൻ ആവശ്യമായ സൗകര്യം ഇവിടെയില്ല. ഇത് ബസ് കാത്തുനിൽക്കുന്നവർക്കും പ്രയാസം സൃഷ്ടിക്കുന്നുണ്ട്.

ദേശീയപാത നാലുവരിയാക്കുന്നതിന്റെ ഭാഗമായി ആറുമാസത്തിനുള്ളിൽ റോഡിനായി സ്ഥലം ഏറ്റെടുക്കാൻ സാധ്യതയുണ്ടെന്നാണ് പഞ്ചായത്ത് പ്രസിഡന്റ് സി.വി. രാജൻ അറിയിച്ചത്. സ്ഥലം ഏറ്റെടുക്കൽ നടപടികൾ പൂർത്തിയായതിനുശേഷമേ ബസ് സ്റ്റാൻഡ് ഷോപ്പിങ് കോംപ്ലക്സ് പുനർനിർമാണം സംബന്ധിച്ച് പഞ്ചായത്തിന് വ്യക്തമായ തീരുമാനം എടുക്കാൻ കഴിയുകയുള്ളൂവെന്നും അദ്ദേഹം പറഞ്ഞു.

പ്രളയത്തിൽ തകർന്ന ബസ് സ്റ്റാൻഡ് പുനർനിർമിക്കാനുള്ള നടപടി വൈകുന്നത് വൈത്തിരിയിലെത്തുന്ന യാത്രക്കാർക്കും നാട്ടുകാർക്കും ഒരുപോലെ ദുരിതമാകുകയാണ്. പുതിയ സുരക്ഷിതമായ സ്ഥലം കണ്ടെത്തി ഷോപ്പിങ്ങ് കോംപ്ലക്സ് പണിയാനുള്ള ശ്രമമുണ്ടാവണമെന്നാണ് നാട്ടുകാരുടെയും ആവശ്യം.