ഇന്ത്യയുടെ ആദായനികുതി സമ്പ്രദായത്തിന്റെ ചരിത്രത്തിൽ സുപ്രധാനമായ മാറ്റങ്ങൾ കുറിച്ചുകൊണ്ട് 2026 ഏപ്രിൽ ഒന്ന്  മുതൽ പുതിയ നിയമങ്ങളും പരിഷ്കാരങ്ങളും നിലവിൽ വന്നിരിക്കുകയാണ്. 1961-ലെ ആദായനികുതി നിയമത്തിന് പകരം ലളിതമായ ഭാഷയിലും ആധുനിക രീതിയിലും തയ്യാറാക്കിയ Income Tax Act 2025 ആണ് ഇന്ന് മുതൽ പ്രാബല്യത്തിൽ വരുന്നത്. ഇതോടൊപ്പം തന്നെ പഴയ നികുതി ചട്ടങ്ങൾക്ക് പകരമായി Income Tax Rules 2026ഉം കേന്ദ്ര സർക്കാർ നടപ്പിലാക്കി. നികുതിദായകർക്ക് കൂടുതൽ ഇളവുകളും അതേസമയം കർശനമായ റിപ്പോർട്ടിംഗ് രീതികളും ഈ പുതിയ മാറ്റങ്ങളിലുണ്ട്

To advertise here,

ടാക്സ് ഇയർ എന്ന പുതിയ രീതിയും നികുതി സ്ലാബുകളും

പുതിയ നിയമത്തിന്റെ ഭാഗമായി ഇതുവരെ നിലനിന്നിരുന്ന ഫിനാൻഷ്യൽ ഇയർ, അസസ്‌മെന്റ് ഇയർ എന്നീ പദങ്ങൾ പൂർണ്ണമായും ഒഴിവാക്കി. പകരം ഇവയ്ക്ക് പൊതുവായി ടാക്സ് ഇയർ (Tax Year) എന്ന പദമാണ് ഇനി മുതൽ ഉപയോഗിക്കുക. എന്നാൽ നികുതി നിരക്കുകളിൽ ഈ വർഷം മാറ്റങ്ങൾ വരുത്തിയിട്ടില്ല. പുതിയ നികുതി വ്യവസ്ഥയിൽ നാല് ലക്ഷം രൂപ വരെയുള്ള വരുമാനത്തിന് നികുതിയില്ല. നാല് മുതൽ എട്ട് ലക്ഷം വരെ അഞ്ച് ശതമാനവും എട്ട് മുതൽ പന്ത്രണ്ട് ലക്ഷം വരെ പത്ത് ശതമാനവും പന്ത്രണ്ട് മുതൽ പതിനാറ് ലക്ഷം വരെ പതിനഞ്ച് ശതമാനവുമാണ് നികുതി. സെക്ഷൻ 87A പ്രകാരമുള്ള ഇളവുകൾ കൂടി പരിഗണിക്കുമ്പോൾ 12 ലക്ഷം രൂപ വരെ വാർഷിക വരുമാനമുള്ളവർ നികുതി നൽകേണ്ടി വരില്ല.

ശമ്പളക്കാർക്കുള്ള വർധിപ്പിച്ച അലവൻസുകൾ

ശമ്പള വിഭാഗത്തിലുള്ളവർക്ക് വലിയ ആശ്വാസം നൽകുന്ന വിധത്തിലാണ് അലവൻസുകളിൽ മാറ്റം വരുത്തിയിരിക്കുന്നത്. കുട്ടികളുടെ വിദ്യാഭ്യാസത്തിനുള്ള അലവൻസ് പ്രതിമാസം 100 രൂപയിൽ നിന്നും 3,000 രൂപയായി വർധിപ്പിച്ചു. ഹോസ്റ്റൽ അലവൻസ് പ്രതിമാസം 300 രൂപയിൽ നിന്നും 9,000 രൂപയായി ഉയർത്തി. കൂടാതെ, ഭക്ഷണ ആനുകൂല്യങ്ങളുടെ പരിധി ഒരു നേരത്തേക്ക് 50 രൂപയായിരുന്നത് 200 രൂപയായി ഉയർത്തിയിട്ടുണ്ട്. ഇതിലൂടെ പ്രതിവർഷം 1.05 ലക്ഷം രൂപ വരെ നികുതിയിളവ് നേടാൻ ജീവനക്കാർക്ക് സാധിക്കും. നികുതിയില്ലാത്ത സമ്മാനങ്ങളുടെ (Non-cash gifts) പരിധി പ്രതിവർഷം 5,000 രൂപയിൽ നിന്നും 15,000 രൂപയായി വർധിപ്പിച്ചു. കമ്പനി കാർ ഉപയോഗിക്കുന്നവർക്ക് നിശ്ചയിച്ചിരുന്ന നികുതി മൂല്യത്തിലും വർധനവ് വരുത്തിയിട്ടുണ്ട്.

വീട്ടുവാടക ഇളവുകളിലെ മാറ്റങ്ങൾ

വീട്ടുവാടക ഇളവുകൾ (HRA) ലഭിക്കുന്ന നഗരങ്ങളുടെ പട്ടികയിൽ പ്രധാനപ്പെട്ട വിപുലീകരണം നടത്തിയിട്ടുണ്ട്. മുമ്പ് ഡൽഹി, മുംബൈ, കൊൽക്കത്ത, ചെന്നൈ എന്നീ മെട്രോ നഗരങ്ങളിൽ താമസിക്കുന്നവർക്ക് ലഭിച്ചിരുന്ന 50 ശതമാനം എച്ച്.ആർ.എ ഇളവ് ഇനി മുതൽ ബെംഗളൂരു, പുണെ, ഹൈദരാബാദ്, അഹമ്മദാബാദ് എന്നീ നഗരങ്ങളിലുള്ളവർക്കും ലഭ്യമാകും.

എച്ച്.ആർ.എ ഇളവുകൾ ക്ലെയിം ചെയ്യുമ്പോൾ ഇനി മുതൽ വീട്ടുടമയുമായുള്ള ബന്ധം വെളിപ്പെടുത്തേണ്ടത് നിർബന്ധമാണ്. വാടക ഉടമയുടെ പാൻ (PAN) വിവരങ്ങൾ നൽകുന്നതിനോടൊപ്പം തന്നെ കൃത്യമായ വാടക രസീതുകളും ഹാജരാക്കേണ്ടതുണ്ട്.

നിക്ഷേപങ്ങളും ഓഹരി വിപണിയും

ഓഹരി വിപണിയിലെ നിക്ഷേപകർക്കും ഈ നിയമമാറ്റം ബാധകമാണ്. ഓഹരികളുടെ ബൈബാക്ക് (Buyback) വഴി ലഭിക്കുന്ന തുക ഇനി മുതൽ നിക്ഷേപകരുടെ വരുമാനമായി കണക്കാക്കി ക്യാപിറ്റൽ ഗെയിൻസ് നികുതി ചുമത്തും. ഫ്യൂച്ചേഴ്സ് ആൻഡ് ഓപ്ഷൻസ് (F&O) ട്രേഡിംഗിനുള്ള സെക്യൂരിറ്റീസ് ട്രാൻസാക്ഷൻ ടാക്സ് (STT) നിരക്കുകൾ വർധിപ്പിച്ചിട്ടുണ്ട്. സോവറിൻ ഗോൾഡ് ബോണ്ടുകൾ (SGB) കാലാവധി പൂർത്തിയാകുമ്പോൾ ലഭിക്കുന്ന നികുതി ഇളവ് ഇനി മുതൽ ബോണ്ടുകൾ നേരിട്ട് വാങ്ങിയവർക്ക് മാത്രമേ ലഭിക്കൂ. സെക്കൻഡറി മാർക്കറ്റിലൂടെ ബോണ്ടുകൾ വാങ്ങിയവർ 12.5 ശതമാനം നികുതി നൽകണം. കൂടാതെ ഡിവിഡന്റ് വരുമാനത്തിനായി എടുത്ത വായ്പയുടെ പലിശയ്ക്ക് ഇനി മുതൽ ഇളവുകൾ ലഭിക്കില്ല.

ഐടിആർ ഫയലിംഗും വിദേശയാത്രകളും

ഐടിആർ ഫയൽ ചെയ്യുന്നതിനുള്ള സമയപരിധിയിൽ മാറ്റങ്ങൾ വരുത്തിയിട്ടുണ്ട്. ഐടിആർ-3, ഐടിആർ-4 എന്നിവ ഫയൽ ചെയ്യുന്നവർക്ക് ഓഗസ്റ്റ് 31 വരെ സമയം നീട്ടി നൽകി. റിവൈസ്ഡ് റിട്ടേണുകൾ സമർപ്പിക്കാൻ ഇനി മുതൽ നികുതി വർഷം അവസാനിച്ച ശേഷം 12 മാസത്തെ സാവകാശം ലഭിക്കും. വിദേശയാത്രകൾ പ്ലാൻ ചെയ്യുന്നവർക്ക് ടിസിഎസ് (TCS) നിരക്കുകളിൽ മാറ്റം വരുത്തിയത് ആശ്വാസമാകും. വിദേശ ടൂർ പാക്കേജുകൾക്ക് ഇനി മുതൽ പരിധികളില്ലാതെ ഫ്ലാറ്റ് 2 ശതമാനം TCS മാത്രമേ നൽകേണ്ടി വരൂ. വിദേശ വിദ്യാഭ്യാസം, ചികിത്സ എന്നിവയ്ക്കായുള്ള പണമയയ്ക്കലിനും ടിസിഎസ് അഞ്ച് ശതമാനത്തിൽ നിന്നും രണ്ട് ശതമാനമായി കുറച്ചു.

പുതിയ പാൻ നിയമങ്ങളും ഫോമുകളും

പാൻ കാർഡ് അപേക്ഷകൾക്കായി ഇനി മുതൽ ആധാർ മാത്രം ഉപയോഗിക്കാനാവില്ല. പുതിയ നിയമപ്രകാരം ഓരോ വിഭാഗത്തിനും പ്രത്യേക അപേക്ഷാ ഫോമുകൾ (Form 93-96) പുറത്തിറക്കിയിട്ടുണ്ട്. അതുപോലെ തന്നെ പ്രധാനപ്പെട്ട പല ആദായനികുതി ഫോമുകളും പുനർനാമകരണം ചെയ്തു. ഫോം 16 ഇനി മുതൽ ഫോം 130 എന്നും 26AS ഫോം ഫോം 168 എന്നും അറിയപ്പെടും. എൻആർഐകളിൽ നിന്നും വസ്തു വാങ്ങുന്നവർക്ക് ടിഡിഎസ് (TDS) അടയ്ക്കുന്ന പ്രക്രിയ പാൻ അധിഷ്ഠിതമാക്കി ലളിതമാക്കി. മോട്ടോർ ആക്സിഡന്റ് ക്ലെയിം ട്രിബ്യൂണലുകൾ നൽകുന്ന നഷ്ടപരിഹാര തുകയുടെ പലിശയ്ക്ക് ടിഡിഎസ് പിടിക്കില്ല എന്നതും പുതിയ നിയമത്തിലെ പ്രത്യേകതയാണ്. നികുതി നടപടികൾ പൂർണമായും ഡിജിറ്റൽവൽക്കരിക്കുന്നതിനും സുതാര്യമാക്കുന്നതിനുമാണ് ഈ പുതിയ മാറ്റങ്ങൾ സർക്കാർ ലക്ഷ്യമിടുന്നത്.