വടക്കുകിഴക്കൻ മലനിരകളും തടാകങ്ങളും താഴ്വരകളും ആസ്വദിച്ച് മഞ്ഞുകാലത്ത് യാത്ര പോയാലോ? 'കിഴക്കിന്റെ സ്വിറ്റ്സർലാന്റ്' എന്നറിയുന്ന നാഗാലാന്റിൽ ഡിസംബറിൽ ഹോൺബിൽ ഫെസ്റ്റിവൽ വരികയാണ്.
17 നാഗാ ഗോത്ര വിഭാഗങ്ങൾ പുരാതനമായ സംസ്കാരത്തെയും പാരമ്പര്യത്തെയും ലോകത്തിനു മുന്നിൽ പ്രദർശിപ്പിക്കുന്ന ' ഉൽസവങ്ങളുടെ ഉൽസവം'. തലസ്ഥാനമായ കൊഹിമയിൽ നിന്ന് അൽപ്പം മാറി കിസാമ ഹെറിറ്റേജ് വില്ലേജിലാണ് ആഘോഷങ്ങൾ നടക്കുക.
തലയിൽ വേഴാമ്പലിന്റെ തൂവലുകൾ ചൂടി, പരമ്പരാഗത വേഷവിധാനങ്ങളണിഞ്ഞ് നാഗാ യുവാക്കൾ അവതരിപ്പിക്കുന്ന നൃത്തങ്ങൾ, നാടൻ പാട്ടുകൾ, അന്താരാഷ്ട്ര റോക്ക് സംഗീതമേള - ഇവയെല്ലാം ഹോൺബിൽ ഫെസ്റ്റിവലിന്റെ ആകർഷണമാണ്. 10°C മുതൽ 15°C വരെ താപനില താഴുന്ന മഞ്ഞുകാലത്ത്, തദ്ദേശീയമായി തയ്യാറാക്കുന്ന ചൂടുള്ള നാഗാരുചികളും മുളങ്കൂമ്പ് വിഭവങ്ങളും ആസ്വദിക്കാം.
മറ്റു പ്രധാന ഇടങ്ങൾ:
സൂക്കോ വാലി ( Dzukou Valley) : പച്ചപ്പുല്ലുമേഞ്ഞ കുന്നിൻനിരകളിലൂടെ ട്രെക്കിംഗ് ഇഷ്ടപ്പെടുന്നവർക്ക് പോകാവുന്ന താഴ്വര.
ഖോനോമ ഗ്രീൻ വില്ലേജ് (Khonoma): ഏഷ്യയിലെ ആദ്യത്തെ 'ഗ്രീൻ വില്ലേജ്'. ഗ്രാമീണ നാഗാ ജീവിതവും ചരിത്രവും നേരിട്ടറിയാം.
കൊഹിമ വാർ സെമട്രി (Kohima War Cemetery): രണ്ടാം ലോകമഹായുദ്ധത്തിൽ വീരമൃത്യു വരിച്ച സൈനികരുടെ ഓർമ്മകൾ ഉറങ്ങുന്ന ഇടം.
മോൺ ജില്ല (Mon District): ടാറ്റുവിന് പേരു കേട്ട കോന്യാക് (Konyak) ഗോത്രവിഭാഗക്കാരുടെ പ്രദേശം.
എങ്ങനെ പോകാം?
വിമാന മാർഗ്ഗം: കൊച്ചി, തിരുവനന്തപുരം, കോഴിക്കോട് എന്നിവിടങ്ങളിൽ നിന്ന് ഗുവാഹത്തി അല്ലെങ്കിൽ കൊൽക്കത്ത വഴി ദിമാപ്പൂരിലേക്ക് (Dimapur Airport - DMU) കണക്റ്റിംഗ് ഫ്ളൈറ്റുകൾ ലഭ്യമാണ്.
ട്രെയിൻ മാർഗ്ഗം: സിൽച്ചാർ അരോണായ് എക്സ്പ്രസ് (Trivandrum - Silchar Aronai Express), ദിബ്രൂഗഡ് വിവേക് എക്സ്പ്രസ് (Dibrugarh Vivek Express) എന്നിവ തിരഞ്ഞെടുക്കാം. മൂന്ന് ദിവസത്തോടടുത്ത് യാത്രാസമയമെടുക്കും.
ദിമാപ്പൂർ റെയിൽവേ സ്റ്റേഷൻ/ എയർപോർട്ട് എന്നിവിടങ്ങളിൽ നിന്ന് ഷെയറിംഗ് ടാക്സികളിലോ (300 - 500) പ്രൈവറ്റ് ടാക്സികളിലോ (2,000 - 3,000) മൂന്ന് മണിക്കൂർ കൊണ്ട് (74 കി.മീ) കൊഹിമയിലെത്താം.
യാത്രാവിവരങ്ങൾ
നാഗാലാന്റിൽ പ്രവേശിക്കാൻ ഇന്ത്യൻ പൗരന്മാർക്ക് ഇന്നർ ലൈൻ പെർമിറ്റ് (ILP ) നിർബന്ധമാണ്. epap.nagaland.gov.in എന്ന ഔദ്യോഗിക വെബ്സൈറ്റ് വഴി 200 രൂപ നൽകി ഓൺലൈനായി മുൻകൂട്ടി പെർമിറ്റ് എടുക്കാം.
താമസം: നാട്ടുജീവിതം അടുത്തറിയാൻ കൊഹിമയിലും ഖോനോമ, കിസാമ ഗ്രാമങ്ങളിലും ഹോംസ്റ്റേകൾ ധാരാളമുണ്ട്. ബാക്ക്പാക്കർമാർക്കായി കിസാമയിൽ ക്യാംപിംഗ് ടെന്റുകളും ലഭ്യമാണ്.
മുൻകരുതലുകൾ: കടുത്ത തണുപ്പായതിനാൽ വിന്റർ വസ്ത്രങ്ങൾ കരുതുക. സീസണായതിനാൽ താമസസൗകര്യങ്ങളും ടാക്സിയും മുൻകൂട്ടി ബുക്ക് ചെയ്യുക.
Content Highlights: Experience the Festival of Festivals showcasing 17 Naga tribes at Kisama Heritage Village., Enjoy winter temperatures between 10°C to 15°C with traditional Naga cuisine., Explore major attractions like Dzukou Valley, Khonoma Green Village, and Kohima War Cemetery., Essential travel info including flights, trains, and mandatory Inner Line Permit (ILP) details.
Published: 05 Sept 2026, 04:24 pm IST
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented