യൂറോപ്യൻ യാത്രയുടെ അടുത്ത ലക്ഷ്യസ്ഥാനം ബെൽജിയത്തിന്റെ തലസ്ഥാനമായ ബ്രസ്സൽസ് ആയിരുന്നു. ചെന്നിറങ്ങിയ ഉടൻ തന്നെ സിറ്റി വാക്കിംഗ് ടൂറിലേക്ക്. ചുറ്റുമുള്ള കണ്ണഞ്ചിക്കുന്ന കെട്ടിടങ്ങളും വീഥികളും ആദ്യ കാഴ്ചയിൽത്തന്നെ മനസ്സ് കവർന്നു.

To advertise here,

കൽപ്പാതകളിലെ അത്ഭുതങ്ങൾ

ലോകത്തിലെ ഏറ്റവും ഭംഗിയുള്ള നഗരചത്വരങ്ങളിലൊന്നായി വിശേഷിപ്പിക്കപ്പെടുന്ന 'ഗ്രാന്റ് പാലസ്' (Grote Markt) ആയിരുന്നു പ്രധാന ആകർഷണം. അതിനു ചുറ്റുമുള്ള ചരിത്രപ്രസിദ്ധമായ ഗിൽഡ് ഹൗസുകളും സിറ്റി ഹാളും കണ്ടുകഴിഞ്ഞു ഞങ്ങൾ നടന്നത് സെന്റ് മൈക്കിൾസ് & സെന്റ് ഗുഡുലാ കത്തീഡ്രലിലേക്കാണ് (St. Michael and St. Gudula Cathedral). പതിമൂന്നാം നൂറ്റാണ്ടിൽ ഗോഥിക് ശൈലിയിൽ നിർമ്മിച്ചതാണ് ഈ പ്രൗഢഗംഭീരമായ ദേവാലയം.

വാക്കിംഗ് ടൂറിനിടയിലാണ് ബ്രസ്സൽസിന്റെ 'ചിഹ്നം' എന്ന് വിളിക്കാവുന്ന ആ പ്രശസ്തമായ പ്രതിമ കണ്ടത്-'മനേകിൻ പിസ്' (Mannequin Pis) എന്ന പീയിംഗ് ബോയ്! വെറും 55.5 സെന്റീമീറ്റർ മാത്രം ഉയരമുള്ള ഈ വെങ്കല പ്രതിമയ്ക്ക് പിന്നിൽ രസകരമായ ഒരു കഥയുണ്ട്. പണ്ട് ശത്രുക്കൾ ബ്രസ്സൽസ് നഗരം വെടിമരുന്നുവെച്ച് തകർക്കാൻ ശ്രമിച്ചപ്പോൾ, ഒരു കൊച്ചുബാലൻ അതിനുമുകളിലേക്ക് മൂത്രമൊഴിച്ച് ഫ്യൂസ് അണച്ച് നഗരത്തെ രക്ഷിച്ചത്രേ! പലതവണ മോഷണം പോയതിനാൽ യഥാർത്ഥ പ്രതിമ ഇപ്പോൾ ബ്രസ്സൽസ് സിറ്റി മ്യൂസിയത്തിലാണ്.

സ്ട്രീറ്റിലൂടെ മുന്നോട്ട് നടക്കുമ്പോൾ ചാൾസ് ബുൾ സ്ട്രീറ്റിൽ എവരാർഡ് സെർക്ലേസിന്റെ (Everard t'Serclaes) ചരിഞ്ഞുകിടക്കുന്ന പ്രതിമ കണ്ടു. 1388-ൽ അന്തരിച്ച ഈ വീരന്റെ പ്രതിമയിൽ തൊട്ടുതലോടിയാൽ ആഗ്രഹങ്ങൾ സാഫല്യമാകുമെന്നാണ് വിശ്വാസം. മിനുങ്ങി തിളങ്ങുന്ന ആ പ്രതിമയിൽ ഞങ്ങളും തൊട്ട് മനസ്സിൽ പ്രാർത്ഥിച്ചു. തുടർന്ന് മാഗ്ദലൻ പള്ളിയും കണ്ട്, ബെൽജിയൻ ചോക്ലേറ്റുകളും സുവനീറുകളും വാങ്ങി ഞങ്ങൾ പാരിസിലേക്ക് യാത്ര തിരിച്ചു.

സ്വപ്നനഗരിയായ പാരിസിൽ

ഹോട്ടൽ നൊവോട്ടലിലെ സുഖകരമായ ഉറക്കത്തിനുശേഷം പ്രഭാതത്തിൽ തന്നെ പാരിസ് സിറ്റി ടൂർ ആരംഭിച്ചു. ഗൈഡിന്റെ വിവരണങ്ങൾ കേട്ട് ബസ്സിലിരുന്നാണ് പ്രധാന കാഴ്ചകളെല്ലാം കണ്ടത്. ഷാമ്പ് എലിസേ, പ്ലേസ് ഡി ലാ കോൺകോർഡ്, ആർക് ഡി ട്രയംഫ്, ലെ ഇൻവാലിഡ്, മ്യൂസി ഡി ഓർസെ, ഓപ്പറ ഹൗസ്, ലൂവ്ര് മ്യൂസിയം തുടങ്ങി പാരിസിന്റെ പ്രൗഢി വിളിച്ചോതുന്ന ചരിത്രസ്മാരകങ്ങൾ ഓരോന്നായി മുന്നിലൂടെ കടന്നുപോയി.

ലൂവ്ര് മ്യൂസിയം

ഫ്രഞ്ച് രാജാക്കന്മാരുടെ കൊട്ടാരമായിരുന്ന ലൂവ്ര് മ്യൂസിയം (Louvre Museum) കലയുടെ മഹാസമുദ്രമാണ്. ലിയോനാർഡോ ഡാവിഞ്ചി, റെംബ്രാന്റ്, റൂബൻസ്, ടിഷ്യൻ തുടങ്ങിയ മഹാരഥന്മാരുടെ യഥാർത്ഥ സൃഷ്ടികൾ ഇവിടെയുണ്ട്. ഡാവിഞ്ചിയുടെ വിശ്വവിഖ്യാത പെയിന്റിംഗായ 'മോണാലിസ', പുരാതന ഗ്രീക്ക് ശില്പങ്ങളായ 'വീനസ് ഡി മിലോ', 'വിങ്ഡ് വിക്ടറി ഓഫ് സമോത്രേസ്', വിശാലമായ ഈജിപ്ഷ്യൻ വിഭാഗം എന്നിവയെല്ലാം കണ്ടു. മുന്നിലെ ഗ്ലാസ് പിരമിഡും വിസ്മയ കാഴ്ചയായിരുന്നു. ദിവസങ്ങളെടുത്താലും കണ്ടുതീരാത്ത ഈ കലാശേഖരത്തോട് വിടപറഞ്ഞ് ഉച്ചഭക്ഷണത്തിന് ശേഷം ഞങ്ങൾ ഈഫൽ ടവറിലേക്ക് തിരിച്ചു.

 

ഈഫൽ ടവറും വിസ്മയിപ്പിച്ച സെയ്ൻ നദിയും

1889-ലെ ഫ്രഞ്ച് വിപ്ലവത്തിന്റെ നൂറാം വാർഷികത്തോട് അനുബന്ധിച്ച് വേൾഡ് എക്‌സ്‌പോയ്ക്കായി നിർമ്മിച്ചതാണ് ഈ ഇരുമ്പ് ഗോപുരം. മൂന്നാം ലെവൽ വരെയുള്ള ടിക്കറ്റാണ് ഞങ്ങൾക്ക് ലഭിച്ചിരുന്നത്. താഴെ നിന്ന് ലിഫ്റ്റിൽ കയറി രണ്ടാമത്തെ നിലയിലെത്തി, അവിടെനിന്ന് അടുത്ത എലിവേറ്ററിൽ ഏറ്റവും മുകളിലത്തെ നിലയിലേക്ക് (മൂന്നാം ലെവൽ). അവിടെനിന്ന് നോക്കിയപ്പോൾ പാരിസ് നഗരം മുഴുവൻ കൺമുന്നിൽ!

തുടർന്ന്, സെയ്ൻ (Seine) നദിയിലൂടെ യാത്രയായിരുന്നു. രാത്രി ഇന്ത്യൻ അത്താഴത്തിന് ശേഷം ഞങ്ങളുടെ അപേക്ഷ പരിഗണിച്ച് ടൂർ മാനേജരും ബസ് ഡ്രൈവറും ചേർന്ന് കൃത്യം 9 മണിക്ക് മിന്നിത്തിളങ്ങുന്ന ഈഫൽ ടവറിന്റെ രാത്രിദൃശ്യം ബസ്സിൽ നിന്നുതന്നെ കാണിച്ചുതന്നു.

അതിർത്തി നഗരവും ബ്ലാക്ക് ഫോറസ്റ്റും

 

അടുത്ത ലക്ഷ്യം ഫ്രാൻസിന്റെയും ജർമ്മനിയുടെയും അതിർത്തിയിലുള്ള സ്ട്രാസ്ബർഗ് (Strasbourg) ആയിരുന്നു. ഫ്രഞ്ച്-ജർമ്മൻ സംസ്‌കാരങ്ങൾ സമന്വയിച്ച ഈ നഗരത്തിലെ പ്രധാന ആകർഷണം സ്ട്രാസ്ബർഗ് നോത്രദാം കത്തീഡ്രൽ (Strasbourg Cathedral) ആണ്.

വാസ്തുവിദ്യയുടെ ഈ മാസ്റ്റർപീസ് പള്ളി കണ്ടശേഷം രാത്രിയോടെ ജർമ്മനിയിലെ സ്റ്റുട്ട്ഗാർട്ടിൽ എത്തി ഹോട്ടൽ മെർക്കൂറിൽ തങ്ങി.

പിറ്റേന്ന് സ്വിറ്റ്‌സർലൻഡിലേക്ക് തിരിക്കുംമുമ്പ് സ്റ്റുട്ട്ഗാർട്ടിലെ മെഴ്‌സിഡസ് ബെൻസ് മ്യൂസിയം സന്ദർശിച്ചു. കപ്പലിന്റെ ആകൃതിയിലുള്ള ഈ കെട്ടിടത്തിനുള്ളിൽ ബെൻസിന്റെ ആദ്യകാല മോഡലുകൾ മുതൽ ആധുനിക കാറുകൾ വരെയുണ്ട്! ('മെഴ്‌സിഡസ്' എന്നത് ഇതിന്റെ സ്ഥാപകരിലൊരാളായ എമിൽ ജെല്ലിനെക്കിന്റെ മകളുടെ പേരായിരുന്നു).

സ്വിറ്റ്‌സർലൻഡിലെ സൂറിക്കിലേക്കുള്ള യാത്ര സുപ്രസിദ്ധമായ 'ബ്ലാക്ക് ഫോറസ്റ്റ്' (Black Forest) വഴിയായിരുന്നു. ഇരുണ്ട പൈൻ/ഫിർ മരങ്ങൾ നിറഞ്ഞ കാടുകളും തടാകക്കരയിലെ കുത്തുന്ന തണുപ്പുള്ള കാറ്റും ആസ്വദിച്ച് ഞങ്ങൾ അൽപ്പം ഷോപ്പിംഗ് നടത്തി. അവിടെനിന്ന് പ്രശസ്തമായ കുക്കൂ ക്ലോക്കുകളും (Cuckoo Clocks), സ്വിസ് പശുക്കളുടെ കഴുത്തിലിടുന്ന ബെല്ലുകളുടെ മാതൃകകളും ഓർമ്മയ്ക്കായി വാങ്ങി യാത്ര തുടർന്നു.