വെള്ളച്ചാട്ടങ്ങൾ നിറഞ്ഞ 16 തടാകങ്ങൾ, ഓരോന്നിനും ഓരോ നിറം; ഇങ്ങനേയും ഒരിടമുണ്ട് ഭൂമിയിൽ

ക്രൊയേഷ്യയിലെ പ്ലിറ്റ്‌വിസ് ലേക്‌സ്‌ നാഷണൽ പാർക്കിലെ വെലികി സ്ലാപ് വെള്ളച്ചാട്ടം ശരത്കാലഭം​ഗിയിൽ | ഫോട്ടോ: രേഷ്മ. ആർ \ മാതൃഭൂമി യാത്ര

ക്രൊയേഷ്യൻ ഉൾനാടിനെയും അഡ്രിയാറ്റിക് തീരപ്രദേശത്തെയും ബന്ധിപ്പിക്കുന്ന പ്രധാനറോഡ് ദേശീയോദ്യാനത്തിന്റെ മദ്ധ്യേ ആണ് കടന്നുപോകുന്നത്. 296.85 ചതുരശ്ര കിലോമീറ്ററിൽ ഏറെയാണ് ദേശീയോദ്യാനത്തിന്റെ സംരക്ഷിതമേഖല. 

1979 -ൽ പ്ലിറ്റ്‌വിസ് യുനെസ്കോ ലോകപൈതൃക പട്ടികയിൽ ഇടംനേടി. ഉദ്യാനത്തിലെ 16 തടാകങ്ങളിൽ പന്ത്രണ്ടെണ്ണം ഉയർന്ന തടാകങ്ങളായും നാലെണ്ണം താഴെയുള്ള തടാകങ്ങളായും തരംതിരിച്ചിക്കപ്പെട്ടിക്കുന്നു. ചങ്ങലയിലെ കണ്ണികളെന്നപോലെ എല്ലാ തടാകവും പരസ്പരം ബന്ധപ്പെട്ടിരിക്കുന്നു. എല്ലാ തടാകങ്ങളും കൂടി ഏകദേശം രണ്ടു ചതുരശ്ര കിലോമീറ്റർ പ്രദേശത്താണ് വ്യാപിച്ചു കിടക്കുന്നത്. 

ആകാശനീല, പച്ച, നീല, ചാരനിറങ്ങളിലാണ് തടാകങ്ങൾ കാണപ്പെടുന്നത്. വെള്ളത്തിൽ അടങ്ങിയ ധാതുക്കളുടെ അളവും സൂര്യപ്രകാശം പതിക്കുന്നതിന്റെ കോണുമാണ് ഈ നിറവ്യത്യാസം അനുഭവപ്പെടാൻ കാരണം. വളരെ വ്യത്യസ്തമായ സസ്യ-ജന്തുജാലങ്ങളും ഇവിടെയുണ്ട്. പത്ത് ലക്ഷം സന്ദർശകരാണ് ഓരോ വർഷവും ഇവിടെ സന്ദർശനത്തിനെത്തുന്നത്.