ജിയോക്കും എയർട്ടെലിനും മേൽ മസ്കിന്റെ സർജിക്കൽ സ്ട്രൈക്ക്, ഇന്ത്യയില്‍ സ്റ്റാർലിങ്ക് വിജയിക്കുമോ?

.

സാങ്കേതികവിദ്യയുടെ കാര്യത്തിൽ ബഹുദൂരം മുന്നിലുള്ള സ്റ്റാർലിങ്കിന്റെ വരവിലാണ് ഇന്ത്യയുടെ സാങ്കേതിക ലോകം ഏറെ പ്രതീക്ഷയർപ്പിച്ചിരിക്കുന്നത്. 550 കിലോമീറ്റർമാത്രം അകലെയുള്ള സ്റ്റാർലിങ്ക് സാറ്റലൈറ്റുകളിൽനിന്നും ലേറ്റൻസി കുറഞ്ഞ അതിവേഗ ഇന്റർനെറ്റ് നിലവിൽ നിരവധി രാജ്യങ്ങളിൽ ജനങ്ങൾ ഏറ്റെടുത്തതാണ്. എന്നാൽ ബ്രോഡ്ബാൻഡ് ഇന്റർനെറ്റുമായി താരതമ്യപ്പെടുത്തുമ്പോൾ ഉപഭോക്താക്കൾക്ക് ചെലവ് വളരെ കൂടുതലാണ് ഇവയ്ക്കെന്നതാണ് പ്രധാന തിരിച്ചടി.

ഇന്ത്യയിൽ 52.4 ശതമാനം പേർ ഇന്റർനെറ്റ് ഉപയോ​ഗിക്കുന്നുവെന്നാണ് കണക്ക് (സ്റ്റാറ്റിസ്റ്റ-2024). അതായത് ബാക്കി 47.6 ശതമാനം പേർ ഇന്റർനെറ്റ് ഉപയോ​ഗിക്കുന്നില്ല, എന്നോ അവരുടെ നാട്ടിൽ ഇന്റർനെറ്റ് ലഭ്യമല്ല എന്നോ ആണ് അർത്ഥം. ഇവിടെയാണ് സ്റ്റാർലിങ്കിന് അടക്കമുള്ള സാറ്റ്കോം സേവനങ്ങളുടെ പ്രസക്തി. വിദൂര സ്ഥലങ്ങളിലെ റെയിൽവേ പദ്ധതികൾക്ക് സ്റ്റാർലിങ്ക് ഉപയോ​ഗപ്പെടുമെന്ന് ആവേശത്തിൽ പോസ്റ്റിട്ട (പിന്നീട് മുക്കിയ) കേന്ദ്ര ഐടി മന്ത്രി അശ്വിനി വൈഷ്ണവ് ഉദ്ദേശിച്ചതും അതു തന്നെയാണ്. ജിയോയുടേയും എയർടെലിന്റേയും സ്റ്റോറുകൾ വഴി സ്റ്റാർലിങ്ക് ഉപകരണങ്ങളും കണക്ഷനും വിതരണം ചെയ്യുക എന്ന കരാറാണ് ഇവർ തമ്മിലുണ്ടാക്കിയത്. വിതരണം ഉറപ്പാക്കിയാലും സറ്റാർലിങ്കിന് ഇന്ത്യയിൽ കടമ്പകൾ ഏറെയുണ്ട്. 

.

ലോകത്ത് ഏറ്റവും കുറഞ്ഞ ചിലവിൽ അതിവേ​ഗ ഇന്റർനെറ്റ് ലഭിക്കുന്ന രാജ്യങ്ങളിലൊന്നാണ് ഇന്ത്യ. മൊബൈലിൽ അതിവേ​ഗ ഇന്റർനെറ്റിന് ഏതാണ്ട് 300 ൽ താഴെയും, ഫൈബർ വഴി ലഭിക്കാൻ ഏതാണ്ട് നാനൂറ്-അഞ്ഞൂറു രൂപയും മതിയാകും. എന്നാൽ സ്റ്റാർലിങ്കിന്റെ കാര്യത്തിൽ അങ്ങനെയല്ല, നേരത്തേ പുറത്തുവന്ന റിപ്പോർട്ടുകൾ പ്രകാരം ആന്റിനയും റൂട്ടറുമടങ്ങുന്ന ഉപകരണങ്ങളടക്കം കണക്ഷന് ₹37,400 രൂപയോളം വരും. മാസാമാസം ഏതാണ്ട് 3000 മുതൽ 5000 വരെ എങ്കിലും കൊടുക്കേണ്ടി വരും. സംഖ്യയിൽ മാറ്റങ്ങൾ വന്നാലും സാധാരണ ബ്രോഡ്ബാന്റും സ്റ്റാർലിങ്കും തമ്മിലുള്ള അന്തരം വളരെ വലുതാണ്. അതുകൊണ്ടു തന്നെ ഇന്റർനെറ്റ് എത്താത്ത ഉൾനാടുകളിൽ സ്റ്റാർലിങ്കിന്റെ ഉപയോ​ഗം സാധാരണക്കാരുടെ കൈപ്പിടിയിൽ ഒതുങ്ങുന്നതല്ല. വലിയ സ്ഥാപനങ്ങളും, റെയിൽവേ പോലുള്ള സംവിധാനങ്ങളുമൊക്കെയാവും സ്റ്റാർലിങ്കിന്റെ ഉപയോക്താക്കൾ. ഇരു കൂട്ടർ പ്രഖ്യാപിച്ച ഉപ​ഗ്രഹ ഇന്റർനെറ്റ് സേവനങ്ങളേക്കാളും ഉയർന്ന വേ​ഗതയിൽ സ്റ്റാർലിങ്കിന് സേവനം നടത്താനാകും എന്ന കാര്യത്തിലാണ് സ്റ്റാർലിങ്കിന് മേൽക്കെയുള്ളത്.

ചെലവ് താരതമ്യേന കുറയുമെന്ന് കരുതുന്ന ജിയോസ്പേസ് ഫൈബറിന്റെ സാങ്കേതികവിദ്യ സ്റ്റാർലിങ്കിനോളം വരില്ലെന്നാണ് വിലയിരുത്തുന്നത്. ലോ എർത്ത് ഓർബിറ്റിലുള്ള ഉപഗ്രഹങ്ങളേയാണ് സ്റ്റാർലിങ്കും വൺവെബും ആശ്രയിക്കുന്നതെങ്കിൽ ജിയോ ആശ്രയിക്കുന്നത് അതിന് മുകളിലെ മീഡിയം എർത്ത് ഓർബിറ്റിലുള്ള എസ്.ഇ.എസിന്റെ 03b കോൺസ്റ്റലേഷനേയാണ്. 8,000 കിലോമീറ്ററിന് മുകളിലാണ്  ഈ ഉപഗ്രങ്ങളുടെ ഭ്രമണപഥം. സാറ്റലൈറ്റുകളുടെ എണ്ണത്തിലും എസ്.ഇ.എസ്. ബഹുദൂരം പിന്നിലാണ്. മീഡിയം എർത്ത് ഓർബിറ്റ് സാറ്റലൈറ്റ് ആയതുകൊണ്ടുതന്നെ വേഗതയുടേയും ലേറ്റൻസിയുടേയും കാര്യത്തിൽ ആശങ്ക നിലനിൽക്കുന്നുണ്ട്. വൺവെബിന്റെ ഉപഗ്രഹക്കൂട്ടം 1,200 കിലോമീറ്റർ ഉയരത്തിലും അതിന്റെ പകുതിയിലും താഴെയാണ് സ്റ്റാർലിങ്ക് ഉപഗ്രങ്ങളെന്നും ഓർക്കണം.

രാജ്യത്ത് നിലവിലുള്ള അതിവേഗ ഇന്റർനെറ്റുമായി താരതമ്യപ്പെടുത്തുമ്പോൾ ഇപ്പോൾ പ്രഖ്യാപിക്കപ്പെട്ട സാറ്റലൈറ്റ് ഇന്റർനെറ്റ്, വേഗത്തിന്റെ കാര്യത്തിൽ പിന്നിലാണ്. ചെലവിന്റെ കാര്യത്തിൽ ബഹുദൂരം മുന്നിലും. ഉപഗ്രഹ ഇന്റർനെറ്റ് സേവനം പ്രയോജനപ്പെടുക രാജ്യത്തെ പട്ടിണിപ്പാവങ്ങളുള്ള ഉൾനാടുകളിലാണ്. അതുകൊണ്ടുതന്നെ കമ്പനികൾ അവകാശപ്പെടുന്നതുപോലെ ഉള്ളവനെന്നും ഇല്ലാത്തവനെന്നുമുള്ള അന്തരം അത്ര പെട്ടെന്നൊന്നും മാറുകയില്ല. ഇവിടെയാണ് സർക്കാർ ഇടപെടലിന് പ്രസക്തി. ഇന്ത്യയുടെ കുഗ്രാമങ്ങളിലേക്ക് സർക്കാർ സൗജന്യമായോ സബ്സിഡി നൽകിയോ സാറ്റലൈറ്റ് ഇന്റർനെറ്റ് സേവനം എത്തിക്കണമെന്ന ആവശ്യത്തിന് പ്രസക്തിയും അവിടെയാണ്.

ലോകം ഇന്ന് സാറ്റലൈറ്റ് ഇന്റർനെറ്റിന് പുറകേയാണ്. ആശങ്കകളും അതോടൊപ്പം വളരുന്നത് കാണാതിരുന്നുകൂടാ. ആകാശത്ത്, ഭൂമിയിൽനിന്ന് അതിവിദൂരത്തിലല്ലാതെ ആയിരക്കണക്കിന് ഉപഗ്രഹങ്ങൾ വിക്ഷേപിക്കുമ്പോൾ അത് ആകാശത്തിന്റെ "ശുദ്ധി'യെ പ്രതികൂലമായി ബാധിക്കുമെന്ന് ബഹിരാകാശ ഗവേഷകരും പരിസ്ഥിതിവാദികളും ആശങ്കപ്പെടുന്നു. രാത്രി ആകാശത്തെ ചലനങ്ങൾ മൃഗങ്ങളുടെ ആവാസവ്യവസ്ഥയെത്തന്നെ ബാധിക്കുമെന്ന് ശാസ്ത്രലോകവും ആശങ്കപ്പെടുന്നു. പ്രകാശ മലിനീകരണവും അത് നിരീക്ഷണ പ്രവർത്തനങ്ങൾക്കുണ്ടാക്കുന്ന തടസ്സവും വേറെ. മാലപോലെ സ്റ്റാർലിങ്ക് ഉപഗ്രഹക്കൂട്ടങ്ങളുടെ സഞ്ചാരം തുടക്കത്തിൽ (പലയിടത്തും ഇപ്പോഴും) സൃഷ്ടിച്ച ആശങ്ക ചെറുതല്ല.

ഗുണദോഷങ്ങൾ

കേബിൾ ബ്രോഡ്ബാൻഡുമായും 5ജിയുമായുമൊക്കെ താരതമ്യപ്പെടുത്തി നോക്കുമ്പോൾ സാറ്റലൈറ്റ് ബ്രോഡ്ബാൻഡിന് ഒരുപാട് നേട്ടങ്ങളുണ്ട്. ലോകത്തിന്റെ ഏത് മുക്കിലും മൂലയിലും ഉയർന്ന വേഗമുള്ള ഇന്റർനെറ്റ് കിട്ടുമെന്ന് മാത്രമല്ല, ഭൂകമ്പമോ പ്രളയമോ ഏത് മഹാദുരന്തങ്ങൾ വന്നാലും ഇന്റർനെറ്റ് കണക്ഷൻ മുടങ്ങില്ല. ശത്രുരാജ്യമോ പ്രകൃതിക്ഷോഭമോ ആശയവിനിമയ അടിസ്ഥാന സൗകര്യങ്ങൾ തകർത്തെറിഞ്ഞാലും സാറ്റലൈറ്റ് ഇന്റർനെറ്റിന് ഒന്നും സംഭവിക്കില്ല. ഒന്നല്ല, അതിവേഗം സഞ്ചരിച്ചുകൊണ്ടിരിക്കുന്ന ഒരുകൂട്ടം ഉപഗ്രഹങ്ങളുടെ ശൃംഖലയായതുകൊണ്ടുതന്നെ ബഹിരാകാശയുദ്ധത്തിനും സമീപഭാവിയിൽ സാധ്യത കുറവ്. അതേസമയം, അത്യാഹിത സന്ദർഭങ്ങളിൽ അടിയന്തര സഹായമെന്ന തലത്തിൽ ഇവയ്ക്ക് പ്രവർത്തിക്കാനുമാകും. യുക്രൈൻ യുദ്ധഭൂമിയിലെ സ്റ്റാർലിങ്കിന്റെ പ്രവർത്തനം ഇവിടെയാണ് ഓർക്കേണ്ടത്. യുക്രൈനിൽ അടിസ്ഥാന സൗകര്യങ്ങളെല്ലാം തകർത്ത് റഷ്യ മുന്നേറുമ്പോൾ ഇലോൺ മസ്കിന്റെ സ്റ്റാർലിങ്ക് നൽകിയ സാറ്റലൈറ്റ് ബ്രോഡ്ബാൻഡ് സേവനമാണ് പട്ടാളക്കാർക്ക് രക്ഷയായത്. ആ സാധ്യതയുടെ വില നന്നായി അറിയാവുന്നതുകൊണ്ടാണ് മസ്ക് ആ പേരും പറഞ്ഞ് യുക്രൈനിനെ വിരട്ടിയതും. ബങ്കറുകളിലും മറ്റും ഒളിച്ചിരുന്ന പട്ടാളക്കാർക്ക് വീഡിയോ ഉൾപ്പെടെയുള്ള വിവരങ്ങൾ കൈമാറാനും അതുവഴി യുദ്ധഭൂമിയിൽ മേൽക്കൈ നേടാനും സ്റ്റാർലിങ്ക് സഹായകമായത് വലിയ വാർത്താപ്രാധാന്യം നേടിയിരുന്നു. സമീപകാലത്തെ ഈ ഉദാഹരണം മാത്രംമതി സാറ്റലൈറ്റ് ഇന്റർനെറ്റിന്റെ കരുത്തറിയാൻ.

ഉയർന്ന ഭ്രമണപഥങ്ങളിലുള്ള ഉപഗ്രഹങ്ങളുമായി ആശയവിനിമയം നടത്താനുള്ള അടിസ്ഥാന സൗകര്യങ്ങളുടെ അത്ര ഊർജം വേണ്ട എന്ന് മാത്രമല്ല, അത്ര കരുത്തുള്ള ട്രാൻസ്മിഷൻ ഉപകരണങ്ങളുടെ ആവശ്യവും ഇവയ്ക്കില്ല.  അതുകൊണ്ടുതന്നെ മറ്റുള്ളവയെ അപേക്ഷിച്ച് ഓപ്പറേറ്റർമാർക്ക് ചെലവും കുറവാണ്. എന്നാൽ വേ​ഗക്കുറവ്, കാലാവസ്ഥ മാറിയാലുള്ള സി​ഗ്നൽ പ്രതിസന്ധി, മൊബൈൽ/ബ്രോഡ്ബാൻഡ് നിരക്കുകളെ അപേക്ഷിച്ച് കൂടുതൽ നിരക്ക് നൽകേണ്ടി വരും തുടങ്ങിയവയാണ് ന്യൂനതകൾ. 

എന്തൊക്കെയായാലും യുദ്ധമേഖലയിൽ സ്റ്റാർലിങ്ക് സ്കോർ ചെയ്തത് ബഹിരാകാശ ഉപഗ്രഹ ആശയവിനിമയരംഗത്ത് വലിയ മത്സരത്തിന് ഇടനൽകിയിട്ടുണ്ട് എന്നത് കാണാതെപോകരുത്. ആശയ വിനിമയരംഗത്തെ പുതിയ മേഖല എന്ന നിലയിൽ സാറ്റലൈറ്റ് ഇന്റർനെറ്റ് വ്യാപകമാകുമ്പോൾ അതിനൊപ്പം പ്രതിസന്ധികളും മറുഭാഗത്ത് വളരുന്നുണ്ട്. ഈയിടെ യുക്രൈൻ യുദ്ധകാലത്ത് പരാതികളുമായി ചൈന അന്താരാഷ്ട്ര വേദികളിലെത്തിയത് ഉദാഹരണം. ലോ എർത്ത് ഓർബിറ്റിൽ 50,000 ഉപഗ്രങ്ങൾക്കുമാത്രമേ സ്ഥാനമുള്ളൂ എന്നും അതിൽ 90 ശതമാനവും സ്റ്റാർലിങ്ക് കൈയടക്കി എന്നുമായായിരുന്നു വാദം. വരുംവർഷങ്ങളിൽ 2,000 ഉപഗ്രഹങ്ങൾകൂടി വിക്ഷേപിക്കാൻ തയ്യാറെടുക്കുകയാണ് ചൈന. ആ സാങ്കേതികക്കുതിപ്പിൽ ഇന്ത്യക്ക് എന്ത് സ്ഥാനംവഹിക്കാനാവുമെന്ന ചോദ്യത്തിനും പ്രസക്തിയുണ്ട്. ബഹിരാകാശ ഗവേഷണരംഗത്ത് മുൻപന്തിയിൽ നിൽക്കുന്ന ഇന്ത്യയിൽ സേവനംനൽകാൻ തയ്യാറെടുക്കുന്ന കമ്പനികൾ ആശ്രയിക്കുന്നത് വിദേശ കമ്പനികളുടെ ഉപഗ്രഹങ്ങളെയാണ് എന്നത് ഇവിടെ പ്രസക്തമാണ്.  

In Short | Starlink India, backed by SpaceX and Elon Musk, is set to revolutionize satellite internet by partnering with Bharti Airtel and Reliance Jio, aiming to expand rural connectivity and enhance internet access in remote areas. Competing with OneWeb and Amazon Kuiper, Starlink’s LEO satellites promise faster speeds compared to traditional broadband internet but at a higher Starlink price in India. As the telecom sector in India debates 5G vs satellite internet, regulatory approvals and internet regulations in India will shape its success. Starlink’s satellite communication can bridge the digital divide, boosting Digital India initiatives and offering a new frontier for India’s internet access. With future advancements, Jio satellite internet and Starlink will redefine the future of internet in India.