പാരിസ്: കളിമണ് കോര്ട്ടിലെ രാജകുമാരന് സ്പെയ്നിന്റെ റാഫേല് നദാലിന് 14-ാം ഫ്രഞ്ച് ഓപ്പണ് ഫൈനല്. സെമി ഫൈനല് പോരാട്ടത്തില് ജര്മനിയുടെ അലക്സാണ്ടര് സ്വരേവ് പരിക്കേറ്റ് പിന്മാറിയതോടെ നദാല് ഫൈനലിലേക്ക് മുന്നേറുകയായിരുന്നു. 13 തവണ റോളണ്ട് ഗാരോസില് കിരീടത്തില് മുത്തമിട്ട റാഫയ്ക്ക് 14-ാം കിരീടത്തിനുള്ള അവസരമാണ് ഇതോടെ കൈവന്നിരിക്കുന്നത്.
വെള്ളിയാഴ്ച നടന്ന മത്സരത്തില് ഇഞ്ചോടിഞ്ച് പോരാട്ടത്തിനിടെ രണ്ടാം സെറ്റിലാണ് സ്വരേവിന്റെ കാല്ക്കുഴയ്ക്ക് പരിക്കേല്ക്കുന്നത്. ഇതോടെ താരം പിന്മാറുകയായിരുന്നു.
ടൈബ്രേക്കറിലേക്കുനീണ്ട ആദ്യസെറ്റ് നഡാല് നേടിയിരുന്നു 7-6 (10/8). രണ്ടാം സെറ്റില് 6-6 എന്നനിലയില്നില്ക്കെ നഡാലിന്റെ ഷോട്ട് റിട്ടേണ് ചെയ്യുന്നതിനിടെയാണ് ജര്മന്താരം പരിക്കേറ്റ് ഗ്രൗണ്ടില് വീണത്. വേദനകൊണ്ട് പുളഞ്ഞ സ്വരേവ് വീല്ച്ചെയറിലാണ് കളംവിട്ടത്. അല്പസമയത്തിനകം ഊന്നുവടികളുടെ സഹായത്തോടെ ഗ്രൗണ്ടിലെത്തിയശേഷം മത്സരത്തില്നിന്ന് പിന്മാറുന്നതായി അറിയിച്ച് മടങ്ങി.
നഡാലിന്റെ 36-ാം പിറന്നാളായിരുന്നു വെള്ളിയാഴ്ച. പിറന്നാളിന് വിജയമധുരം പകരാന് ഗ്രൗണ്ടിലെത്തിയ നഡാലും സ്വരേവും തമ്മില് ഇഞ്ചോടിഞ്ച് പോരാട്ടമായിരുന്നു.
ആദ്യസെറ്റിലെ ആദ്യ രണ്ടു ഗെയിമുകളും നേടിക്കൊണ്ട് സ്വരേവ് ഗംഭീരമായി തുടങ്ങി. പിന്നീട് 4-2 ലീഡിലേക്ക് കയറിയെങ്കിലും പിന്നില്നിന്ന് കയറിവന്ന നഡാല് 4-4 എന്നനിലയിലാക്കി. പിന്നീട് ഒപ്പത്തിനൊപ്പമായിരുന്നു. ടൈബ്രേക്കറിലും 2-6ന് പിന്നിലായശേഷം നഡാല് കയറിവന്നു. ഒടുവില് 10-8ന് ആദ്യസെറ്റ് പിടിച്ചെടുത്തു. ആദ്യസെറ്റ് 98 മിനിറ്റ് നീണ്ടുനിന്നു.
രണ്ടാം സെറ്റിലും 5-3ന് പിന്നില്നിന്നശേഷം നഡാല് തിരിച്ചുവന്നു. സ്വരേവ് 6-5ന് മുന്നിലെത്തിയെങ്കിലും വീണ്ടും നഡാല് ഒപ്പമെത്തി. ആ ഗെയിമിനൊടുവിലാണ് സ്വരേവ് വീണത്.
ക്രൊയേഷ്യയുടെ മാരിന് സിലിച്ചും നോര്വേയുടെ കാസ്പര് റൂഡും തമ്മിലുള്ള രണ്ടാം സെമിഫൈനല് വിജയിയാണു ഞായറാഴ്ച നടക്കുന്ന ഫൈനലില് നദാലിന്റെ എതിരാളി. ഫൈനലില് വിജയിച്ചാല് നഡാലിന് 22-ാം ഗ്രാന്ഡ്സ്ലാം കിരീടം സ്വന്തമാകും.
Content Highlights: French Open 2022 Alexander Zverev retires with nasty injury Rafael Nadal reaches final
Published: 04 Jun 2022, 12:19 am IST
Related Topics
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



Most Commented