സിഡ്‌നി: മുൻ ഫോർമുല വൺ ലോകചാമ്പ്യൻ അലൻ ജോൺസ് അന്തരിച്ചു. കഴിഞ്ഞ തിങ്കളാഴ്ച എൺപതാം പിറന്നാൾ ആഘോഷിച്ച അലൻ ജോൺസ് ഏറെക്കാലമായി അർബുദത്തോട് പോരാടുകയായിരുന്നു. ഓസ്‌ട്രേലിയക്കാരനായ അദ്ദേഹം ഫോർമുല വൺ ലോകചാമ്പ്യനാകുന്ന ആദ്യ വില്ല്യംസ് ഡ്രൈവർ കൂടിയാണ്. കരിയറിൽ 12 ഗ്രാൻഡ്പ്രീകൾ നേടിയിട്ടുണ്ട്. 1975 മുതൽ 1986 വരെ റേസിങ് ട്രാക്കിൽ സജീവമായിരുന്ന അദ്ദേഹം 1980-ലാണ് ലോകചാമ്പ്യനായത്.

To advertise here,

1975-ൽ സ്പാനിഷ് ഗ്രാൻഡ്പ്രീയിലാണ് അരങ്ങേറ്റം. 1977-ൽ ഷാഡോ ടീമിനായി ഓസ്ട്രിയയിലാണ് ആദ്യ വിജയം കൈവരിച്ചത്. തൊട്ടടുത്ത വർഷം വില്ല്യംസിനൊപ്പം ചേർന്നു.

1979ൽ മൂന്നാം സ്ഥാനത്തെത്തിയ അലൻ ജോൺസ് തൊട്ടടുത്ത വർഷം അഞ്ച് വിജയങ്ങൾ നേടിയാണ് ലോകകിരീടം ചൂടിയത്. ഈ നേട്ടത്തിലെത്തുന്ന രണ്ടാമത്തെ ഓസ്‌ട്രേലിയക്കാരൻ കൂടിയാണ് ജോൺസ്. അതിന് മുമ്പ് മൂന്ന് തവണ ജാക്ക് ബ്രാബം കിരീടം നേടിയിരുന്നു.