ലീഗ് കപ്പിൽ ഇന്റർ മയാമിക്കായുള്ള ഗോൾ ലയണൽ മെസ്സിക്ക് സമർപ്പിച്ച് അർജന്റീനയിലെ സഹതാരം റോഡ്രിഗോ ഡി പോൾ. ഗോൾ നേടിയശേഷം ഡി പോൾ തന്റെ ജെഴ്‌സിയൂരി അതിനടിയിൽ ധരിച്ച മെസ്സിയുടെ പത്താം നമ്പർ ജെഴ്‌സി കാണിക്കുകയായിരുന്നു. മെസ്സിയുടെ പിതാവ് ഹോർഹെ മെസ്സിയുടെ മരണത്തെ തുടർന്ന് അർജന്റീനാ താരത്തിനും കുടുംബത്തിനും നൽകിയ ആദരവായിരുന്നു ഡി പോളിന്റെ ഗോളാഘോഷം.

To advertise here,

മത്സരത്തിന്റെ 31-ാം മിനിറ്റിലായിരുന്നു ഡി പോളിന്റെ ഗോൾ. പെനാൽറ്റി ബോക്‌സിന് പുറത്ത് നിന്ന് പന്ത് കൈവശപ്പെടുത്തി ഒരു ലോങ് റേഞ്ച് ഷോട്ടിലൂടെ ലക്ഷ്യം കാണുകയായിരുന്നു. ഇതിന് പിന്നാലെ ജെഴ്‌സിയൂരി ഓടിയ ഡി പോൾ അതിനടിയിൽ ധരിച്ച മെസ്സിയുടെ പത്താം നമ്പർ ജെഴ്‌സി ചൂണ്ടിക്കാണിച്ച് ആഘോഷിക്കുകയായിരുന്നു.

അർജന്റീനാ സമയം വെള്ളിയാഴ്ച രാത്രി പത്ത് മണിക്കാണ് ഹോർഹെ മെസ്സി അന്തരിച്ചത്. അസുഖത്തെ തുടർന്ന് ഏറെ നാളായി ചികിത്സയിലായിരുന്നു. ലോകകപ്പിൽ അൽജീരിയയ്‌ക്കെതിരായ മത്സരശേഷം മെസ്സി അച്ഛനെ ഓർത്ത് കരഞ്ഞിരുന്നു. ഇതിനുശേഷം ഹോർഹെ ആരോഗ്യപ്രശ്‌നം നേരിടുന്നുണ്ടെന്ന് കുടുംബം ഔദ്യോഗിക പ്രസ്താവന പുറത്തിറക്കുകയും ചെയ്തിരുന്നു.

മെക്കാനിക്കൽ ടെക്‌നീഷ്യനും സ്റ്റീൽ വർക്കറുമായിരുന്ന ഹോർഹെ ന്യൂവെൽസ് ഓൾഡ് ബോയ്‌സ് ടീമിന്റെ മിഡ്ഫീൽഡറുമായിരുന്നു. എന്നാൽ നിർബന്ധിത സൈനിക സേവനത്തിനുവേണ്ടി ഫുട്‌ബോൾ ഉപേക്ഷിക്കേണ്ടി വന്നു. മെസ്സിയെ കൂടാതെ റോഡ്രിഗോ, മാറ്റിയാസ്, മരിയ സോൾ എന്നീ മക്കളും ഹോർഹെയ്ക്കുണ്ട്.