ലിസ്ബൺ: പോർച്ചുഗീസ് സൂപ്പർ താരം ക്രിസ്റ്റ്യാനോ റൊണാൾഡോ തന്റെ അന്താരാഷ്ട്ര ഫുട്‌ബോളിൽ നിന്നുള്ള വിരമിക്കൽ തീരുമാനം പ്രഖ്യാപിച്ചത് പോർച്ചുഗൽ പരിശീലകൻ ഹോർഹെ ജീസസിനെ അറിയിക്കാതെ. തീരുമാനം പരിശീലകനെ മുൻകൂട്ടി അറിയിക്കാതെയായിരുന്നു റൊണാൾഡോയുടെ പ്രഖ്യാപനമെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു. സെപ്റ്റംബർ 30-ന് ശേഷം ഇരുവരും തമ്മിൽ യാതൊരുവിധ ആശയവിനിമയവും നടന്നിട്ടില്ലെന്നും റിപ്പോർട്ടിൽ പറയുന്നു.

To advertise here,

പോർച്ചുഗീസ് ഫുട്‌ബോൾ ഫെഡറേഷൻ പ്രസിഡന്റായ പെഡ്രോ പ്രോൻസയോടാണ് റൊണാൾഡോ തന്റെ വിരമിക്കൽ തീരുമാനം അറിയിച്ചത്. പരിശീലകനെ കാര്യം അറിയിച്ചില്ല. ഹോർഹെ ജീസസിനു കീഴിൽ ഇനി കളിക്കാൻ താത്പര്യമില്ലാത്തതിനാലാണ് റൊണാൾഡോ ഇത്തരമൊരു നിലപാടെടുത്തത്. വരാനിരിക്കുന്ന മത്സരങ്ങൾക്കുള്ള ടീമിലേക്ക് തിരഞ്ഞെടുക്കപ്പെടുന്നത് ഒഴിവാക്കാനായി, സ്‌ക്വാഡ് പ്രഖ്യാപനത്തിന് തൊട്ടുമുമ്പാണ് അദ്ദേഹം വിരമിക്കൽ തീരുമാനം പുറത്തുവിട്ടത്.

റൊണാൾഡോയെ വീണ്ടും ദേശീയ ടീമിലേക്ക് തിരഞ്ഞെടുക്കാൻ പദ്ധതിയിട്ടിരുന്ന ഹോർഹെ ജീസസിന് ഈ അപ്രതീക്ഷിത പ്രഖ്യാപനം വലിയ ഞെട്ടലായി. ഒരുകാലത്ത് തന്റെ പ്രിയപ്പെട്ട പരിശീലകനായി ക്രിസ്റ്റ്യാനോ റൊണാൾഡോ വിശേഷിപ്പിച്ച ഹോർഹെ ജീസസ് ഇന്ന് അദ്ദേഹത്തിന്റെ ഫുട്‌ബോൾ ജീവിതത്തിലെ ഏറ്റവും വലിയ വിവാദങ്ങളിലൊന്നിന്റെ കേന്ദ്രത്തിലാണ്. സൗദി അറേബ്യയിലെ അൽ നസറിൽ ആരംഭിച്ച സൗഹൃദം പോർച്ചുഗൽ ദേശീയ ടീമിലും തുടരുമെന്ന് കരുതിയിരിക്കെയാണ് ഇരുവരും തമ്മിലുള്ള ബന്ധം വഷളായത്. ഒരു മത്സരത്തിൽ കളിക്കാൻ അവസരം ലഭിക്കാതിരുന്നതിൽ തുടങ്ങിയ അസ്വാരസ്യം പരിശീലകൻ നൽകിയ വാക്ക് പാലിച്ചില്ലെന്ന ആരോപണത്തിലേക്കും ദേശീയ ടീമിന്റെ ക്യാമ്പിൽനിന്നുള്ള റൊണാൾഡോയുടെ ഇറങ്ങിപ്പോക്കിലേക്കും വളർന്നു. ഒടുവിൽ പോർച്ചുഗീസ് ഫുട്‌ബോൾ ഫെഡറേഷന്റെ താൽക്കാലിക സസ്‌പെൻഷനിലും വിവാദം എത്തി.

റൊണാൾഡോയും ഹോർഹെ ജീസസും തമ്മിലുള്ള ബന്ധം കേവലം ഒരു താരവും പരിശീലകനും തമ്മിലുള്ള ഔദ്യോഗിക ബന്ധമായിരുന്നില്ല. സൗദി അറേബ്യൻ ക്ലബ്ബായ അൽ നസറിൽ ഒരുമിച്ച് പ്രവർത്തിച്ച കാലത്ത് ഇരുവരും തമ്മിൽ അടുത്ത സൗഹൃദം രൂപപ്പെട്ടിരുന്നു. പരിചയസമ്പന്നനായ ജീസസിന്റെ പരിശീലനരീതികളിലും തീരുമാനങ്ങളിലുമുള്ള വിശ്വാസം റൊണാൾഡോ പരസ്യമായി പ്രകടിപ്പിച്ചിരുന്നു.

2026 ലോകകപ്പിൽ പോർച്ചുഗൽ പ്രീക്വാർട്ടറിൽ പുറത്തായതോടെ റോബർട്ടോ മാർട്ടിനെസിന് പകരക്കാരനെ കണ്ടെത്തേണ്ട സാഹചര്യമുണ്ടായി. ദേശീയ ടീമിന്റെ പരിശീലകസ്ഥാനത്തേക്ക് ജോർജ് ജീസസിന്റെ പേര് ഉയർന്നപ്പോൾ അദ്ദേഹത്തെ പിന്തുണച്ചവരിൽ റൊണാൾഡോയുമുണ്ടായിരുന്നു.

പോർച്ചുഗീസ് ഫുട്‌ബോൾ ഫെഡറേഷൻ പ്രസിഡന്റ് പെഡ്രോ പ്രോൻസ തന്നോട് അഭിപ്രായം ചോദിച്ചപ്പോൾ ജീസസായിരിക്കും ശരിയായ തിരഞ്ഞെടുപ്പെന്ന് അറിയിച്ചതായി റൊണാൾഡോ പിന്നീട് വെളിപ്പെടുത്തി. ജീസസിനെ പരിശീലകനായി നിയമിച്ചപ്പോൾ താൻ സന്തോഷവാനായിരുന്നെന്നും അദ്ദേഹം വ്യക്തമാക്കി.

2026 സെപ്റ്റംബർ 27. യുവേഫ നേഷൻസ് ലീഗിൽ നോർവേയെ നേരിടാനിറങ്ങിയ പോർച്ചുഗൽ ടീമിൽ റൊണാൾഡോ പകരക്കാരുടെ ബെഞ്ചിലായിരുന്നു. റൊണാൾഡോയുടെ പ്രായവും ശാരീരികക്ഷമതയും പരിഗണിച്ച് അദ്ദേഹത്തിന്റെ കളിസമയം നിയന്ത്രിക്കാൻ പരിശീലകൻ പ്രത്യേക പദ്ധതി തയ്യാറാക്കിയിരുന്നു. വെയ്ൽസ്, നോർവേ, ഡെൻമാർക്ക്, വീണ്ടും നോർവേ എന്നീ മത്സരങ്ങളടങ്ങിയ പരമ്പരയിൽ ആദ്യത്തെയും അവസാനത്തെയും മത്സരങ്ങളിൽ റൊണാൾഡോയെ കളിപ്പിക്കാനായിരുന്നു ആദ്യ ധാരണയെന്ന് താരം പറയുന്നു.

എന്നാൽ നോർവേക്കെതിരായ മത്സരദിവസം തീരുമാനം മാറി. രണ്ടാം പകുതിയിൽ ഏകദേശം 30 മിനിറ്റ് കളിക്കാൻ അവസരം നൽകാമെന്ന് ജീസസ് അറിയിച്ചതായാണ് റൊണാൾഡോയുടെ വാദം. ആദ്യപകുതി അവസാനിച്ചതുമുതൽ റൊണാൾഡോ വാംഅപ്പ് ആരംഭിച്ചു. എന്നാൽ മത്സരം അവസാനിക്കുന്നതുവരെ അദ്ദേഹത്തെ കളത്തിലിറക്കിയില്ല. പോർച്ചുഗൽ 2-1ന് വിജയിച്ചെങ്കിലും ബെഞ്ചിലിരുന്ന റൊണാൾഡോയുടെ നിരാശ മറച്ചുവയ്ക്കാനായില്ല.

മത്സരത്തിന്റെ സാഹചര്യങ്ങൾ മാറിയതിനാലാണ് താരത്തെ ഇറക്കാതിരുന്നതെന്നായിരുന്നു ജീസസിന്റെ വിശദീകരണം. എന്നാൽ വാഗ്ദാനം ചെയ്ത അവസരം നിഷേധിക്കപ്പെട്ടതായാണ് റൊണാൾഡോ ഇതിനെ കണ്ടത്. ഒരു കളിക്കാരനെ ബെഞ്ചിലിരുത്താനുള്ള പരിശീലകന്റെ അധികാരമല്ല, നൽകിയ വാക്ക് പാലിക്കാതിരുന്നതാണ് പ്രശ്‌നമെന്ന നിലപാടിലായിരുന്നു റൊണാൾഡോ.

നോർവേ മത്സരത്തിനുശേഷം ഇരുവരും തമ്മിലുള്ള അസ്വാരസ്യം പരിഹരിക്കാൻ ശ്രമമുണ്ടായി. ജീസസ്, റൊണാൾഡോ, അൽ നസർ സ്‌പോർട്ടിങ് ഡയറക്ടർ സിമാവോ കുട്ടീഞ്ഞോ, റൊണാൾഡോയുടെ ഉപദേഷ്ടാവ് തിയാഗോ ക്രവെയ്റോ എന്നിവർ പങ്കെടുത്ത ചർച്ചയും നടന്നു.

ചർച്ചയിൽ തർക്കം പരിഹരിക്കാനും മാധ്യമങ്ങൾക്ക് മുന്നിൽ കാര്യങ്ങൾ വ്യക്തമാക്കാനും ധാരണയായെന്നാണ് റൊണാൾഡോ പറയുന്നത്. ഇതിനായി എട്ട് കാര്യങ്ങളടങ്ങിയ രേഖ തയ്യാറാക്കിയെന്നും റൊണാൾഡോ അവകാശപ്പെട്ടു. ദേശീയ ടീമിലെ തന്റെ കളിസമയം നിശ്ചയിച്ചത് പരിശീലകനാണെന്നും താൻ ഒരിക്കലും കളിക്കാൻ അവസരം ആവശ്യപ്പെട്ടിട്ടില്ലെന്നും ജീസസിന്റെ തീരുമാനങ്ങളെ ബഹുമാനിച്ചിരുന്നെന്നും വ്യക്തമാക്കുന്നതായിരുന്നു രേഖയിലെ പ്രധാന കാര്യങ്ങൾ.

റൊണാൾഡോയെ ദീർഘനേരം വാംഅപ്പ് ചെയ്യിച്ചശേഷം കളത്തിലിറക്കാതിരുന്നത് തെറ്റായിപ്പോയെന്ന് പരിശീലകൻ സമ്മതിക്കണമെന്നും രേഖയിൽ ഉൾപ്പെട്ടിരുന്നു. എന്നാൽ ജീസസ് തന്നോട് പരസ്യമായി മാപ്പുപറയണമെന്ന് ആവശ്യപ്പെട്ടിരുന്നില്ലെന്നാണ് റൊണാൾഡോ വ്യക്തമാക്കിയത്.

ചർച്ചയുടെ അവസാനം ജീസസ് തന്നെ ആലിംഗനം ചെയ്‌തെന്നും ധാരണപ്രകാരമുള്ള വിശദീകരണം നൽകുമെന്ന് ഉറപ്പുനൽകിയെന്നും താരം പറയുന്നു. എന്നാൽ ഡെൻമാർക്കിനെതിരായ മത്സരത്തിന് മുന്നോടിയായുള്ള വാർത്താസമ്മേളനത്തിൽ ജീസസ് നടത്തിയ പരാമർശങ്ങൾ ഈ ധാരണയ്ക്ക് വിരുദ്ധമായിരുന്നെന്നാണ് റൊണാൾഡോയുടെ ആരോപണം. പരിശീലകൻ രണ്ടാം തവണയും വാക്ക് ലംഘിച്ചുവെന്ന് റൊണാൾഡോ ആരോപിച്ചു.

താരങ്ങളെ തിരഞ്ഞെടുക്കാനുള്ള അധികാരം പൂർണമായും പരിശീലകനാണെന്ന നിലപാടാണ് ജീസസ് സ്വീകരിച്ചത്. റൊണാൾഡോയുടെ മഹത്വം അംഗീകരിക്കുമ്പോഴും ടീമിലെ നിയമങ്ങൾ എല്ലാവർക്കും ഒരുപോലെയാണെന്ന് അദ്ദേഹം വ്യക്തമാക്കി. നോർവേക്കെതിരായ മത്സരത്തിൽ റൊണാൾഡോയെ കളിപ്പിക്കാൻ ആലോചിച്ചിരുന്നെങ്കിലും മത്സര സാഹചര്യം മാറിയതോടെ തീരുമാനം മാറ്റേണ്ടിവന്നെന്നും ജീസസ് വിശദീകരിച്ചു.

റൊണാൾഡോയുമായി വ്യക്തിപരമായ പ്രശ്‌നങ്ങളൊന്നുമില്ലെന്നും അദ്ദേഹം ആദ്യം പറഞ്ഞിരുന്നു. എന്നാൽ റൊണാൾഡോയ്ക്ക് വാഗ്ദാനം നൽകിയെന്നും പിന്നീട് അത് ലംഘിച്ചുവെന്നുമുള്ള ആരോപണങ്ങൾ അദ്ദേഹം അംഗീകരിച്ചില്ല. ഒരു വർഷത്തെ സൗഹൃദം ഇത്തരമൊരു സംഭവത്തിന്റെ പേരിൽ അവസാനിപ്പിക്കാനാവില്ലെന്നായിരുന്നു ജീസസിന്റെ പ്രതികരണം. റൊണാൾഡോയ്ക്ക് ദേശീയ ടീമിലേക്ക് തിരിച്ചുവരാമെന്നും അദ്ദേഹം പറഞ്ഞു. എന്നാൽ പരിശീലകനെന്ന നിലയിലുള്ള തന്റെ അധികാരത്തിൽ വിട്ടുവീഴ്ച ചെയ്യാൻ തയ്യാറല്ലെന്ന സന്ദേശവും നൽകി.

ഇതിനു പിന്നാലെ സെപ്റ്റംബർ 30-ന് ഡെൻമാർക്കിലെ കോപ്പൻഹേഗനിൽ പോർച്ചുഗൽ ദേശീയ ടീമിന്റെ പരിശീലനക്യാമ്പിൽനിന്ന് റൊണാൾഡോ അപ്രതീക്ഷിതമായി മടങ്ങി. പരിശീലകന്റെ വാർത്താസമ്മേളനത്തിനുശേഷമായിരുന്നു തീരുമാനം.

ഒക്ടോബർ ആറിന് പുറത്തുവിട്ട ദീർഘമായ പ്രസ്താവനയിൽ ജീസസ് രണ്ടുതവണ വാക്ക് ലംഘിച്ചതായി റൊണാൾഡോ ആരോപിച്ചു. സഹതാരങ്ങളോടും പോർച്ചുഗീസ് ജനതയോടും ക്യാമ്പ് വിട്ടതിന് ക്ഷമ ചോദിച്ച അദ്ദേഹം തന്റെ നടപടിക്ക് അച്ചടക്കശിക്ഷ ലഭിക്കണമെന്ന നിലപാടും സ്വീകരിച്ചു.

ഒക്ടോബർ 20-ന് പോർച്ചുഗീസ് ഫുട്‌ബോൾ ഫെഡറേഷൻ റൊണാൾഡോയ്ക്ക് 30 ദിവസത്തെ സസ്‌പെൻഷനും 255 യൂറോ പിഴയും വിധിച്ചു. സെപ്റ്റംബർ 30 മുതൽ ശിക്ഷ പ്രാബല്യത്തിലായതിനാൽ നവംബറിലെ മത്സരങ്ങൾക്ക് മുമ്പ് വിലക്ക് അവസാനിക്കുമെന്നായിരുന്നു റിപ്പോർട്ടുകൾ. എന്നാൽ നവംബർ അഞ്ചിന് എല്ലാവരേയും ഞെട്ടിച്ചുകൊണ്ട് റൊണാൾഡോ വിരമിക്കൽ തീരുമാനം പ്രഖ്യാപിച്ചു.