അന്താരാഷ്ട്ര ക്രിക്കറ്റിൽ മറ്റൊരു നാഴികക്കല്ല് കൂടി പിന്നിട്ട് വിരാട് കോലി. കരിയറിൽ ഏറ്റവും കൂടുതൽ റൺസ് നേടുന്ന രണ്ടാമത്തെ താരമാണിപ്പോൾ മുൻ ഇന്ത്യൻ നായകൻ. ശ്രീലങ്കയുടെ കുമാർ സംഗക്കാരയെയാണ് കോലി മറികടന്നത്. 28,016 റൺസായിരുന്നു സംഗയുടെ സമ്പാദ്യം. ന്യൂസീലൻഡിനെതിരായ ഒന്നാം ഏകദിനത്തിന് ഇറങ്ങുമ്പോൾ ഈ ലക്ഷ്യം മറികടക്കാൻ 42 റൺസ് മാത്രമായിരുന്നു കോലിക്ക് വേണ്ടിയിരുന്നത്. 93 റൺസ് നേടിയാണ് കോലി പുറത്തായത്. ഇതോടെ സംഗക്കാരയെ മറികടന്ന് രണ്ടാം സ്ഥാനത്തെത്തി. ഇനി സച്ചിൻ തെണ്ടുൽക്കർ മാത്രമാണ് കോലിയുടെ മുന്നിൽ. 34,357 റൺസാണ് സച്ചിന്റെ റൺ സമ്പാദ്യം.

To advertise here,

കരിയറിൽ ഏറ്റവും വേഗത്തിൽ 28000 റൺസ് പൂർത്തിയാക്കുന്ന താരം കൂടിയാണ് കോലി ഇപ്പോൾ. സച്ചിനെയാണ് കോലി മറികടന്നത്. 644 ഇന്നിങ്‌സിൽ നിന്നാണ് സച്ചിൻ 28000 റൺസ് നേടിയത്. ഈ നേട്ടം കൈവരിക്കാൻ കോലിക്ക് 624 ഇന്നിങ്‌സേ വേണ്ടിവന്നുള്ളൂ.