മൗണ്ട് മൗൻഗനുയി: ന്യൂസീലൻഡിനെതിരായ നാലാം ഏകദിനത്തിൽ നേരിട്ട 244 റൺസിന്റെ ഞെട്ടിക്കുന്ന തോൽവിക്കു പിന്നാലെ പിച്ചിനെ പഴിച്ച് ഇന്ത്യൻ ക്യാപ്റ്റൻ ശ്രേയസ് അയ്യർ. ബേ ഓവലിൽ നടന്ന മത്സരത്തിൽ ആദ്യം ബാറ്റ് ചെയ്ത ന്യൂസീലൻഡ് 333 റൺസ് സ്‌കോർ ചെയ്തപ്പോൾ മറുപടി ബാറ്റിങ്ങിനിറങ്ങിയ ഇന്ത്യ 26.4 ഓവറിൽ വെറും 89 റൺസിന് ഓൾഔട്ടായി.

To advertise here,

ഈ കനത്ത തോൽവിക്ക് കാരണം രണ്ട് ഇന്നിങ്‌സുകൾക്കുമിടയിൽ പിച്ചിന്റെ സ്വഭാവത്തിൽ സംഭവിച്ച അപ്രതീക്ഷിത മാറ്റമാണെന്ന് അയ്യർ പറഞ്ഞു. ആദ്യ ഇന്നിങ്‌സിൽ ബാറ്റിങ്ങിന് തികച്ചും അനുകൂലമായിരുന്ന പിച്ച്, രണ്ടാം ഇന്നിങ്‌സിൽ പേസ് ബൗളർമാർക്ക് കാര്യമായ മൂവ്മെന്റ് നൽകുന്ന രീതിയിലേക്ക് മാറിയെന്ന് അയ്യർ പറഞ്ഞു.

ന്യൂസീലൻഡ് 330-ലധികം റൺസ് അടിച്ചെടുത്തത് കണ്ടപ്പോൾ ലക്ഷ്യം എളുപ്പത്തിൽ മറികടക്കാമെന്നാണ് ഡ്രസ്സിങ് റൂമിൽ എല്ലാവരും കരുതിയതെന്നും, എന്നാൽ പന്ത് ഇരുവശത്തേക്കും സീം ചെയ്യാൻ തുടങ്ങിയതോടെ ആസൂത്രണം ചെയ്ത രീതിയിൽ കളിക്കാൻ സാധിച്ചില്ലെന്നും അദ്ദേഹം വെളിപ്പെടുത്തി. ഇന്ത്യൻ ബാറ്റർമാർ വിക്കറ്റുകൾ വലിച്ചെറിയുകയായിരുന്നില്ലെന്നും പേസർ മാറ്റ് ഹെൻ റിയുടെ മികച്ച പന്തുകളിലാണ് പുറത്തായതെന്നും അയ്യർ കൂട്ടിച്ചേർത്തു.

പരിക്കിന്റെ പിടിയിലായിരുന്ന ഹെൻ റി 27 റൺസ് വഴങ്ങി ആറു വിക്കറ്റുകളാണ് വീഴ്ത്തിയത്. ഇന്നിങ്‌സിന്റെ ആദ്യ ഓവറിൽ തന്നെ ഇന്ത്യയുടെ രോഹിത് ശർമ, വിരാട് കോലി, ശ്രേയസ് അയ്യർ എന്നിവരെ പുറത്താക്കിയ ഹെൻ റി തുടക്കത്തിൽ തന്നെ കളി കിവീസിന് അനുകൂലമാക്കിയിരുന്നു.