വെല്ലിങ്ടൺ: ന്യൂസീലൻഡിനെതിരായ ആദ്യ ക്രിക്കറ്റ് ടെസ്റ്റിൽ മികച്ച ബാറ്റിങ്ങുമായി ഇന്ത്യ. മൂന്നാം ദിനം കളി പുരോഗമിക്കുമ്പോൾ ന്യൂസീലൻഡിന്റെ ഒന്നാമിന്നിങ്‌സ് സ്‌കോർ ഇന്ത്യ മറികടന്നു. നിലവിൽ മൂന്ന് വിക്കറ്റ് നഷ്ടത്തിൽ 386 റൺസ് എന്ന നിലയിലാണ് ഇന്ത്യ.

To advertise here,

സെഞ്ചുറി നേടിയ കെ.എൽ രാഹുലിന്റെയും അർധ സെഞ്ചുറി കണ്ടെത്തിയ യശസ്വി ജയ്‌സ്വാൾ, ദേവ്ദത്ത് പടിക്കൽ, ശുഭ്മാൻ ഗിൽ എന്നിവരുടെയും ബാറ്റിങ്ങാണ് ഇന്ത്യയ്ക്ക് കരുത്തായത്. ഒരു വിക്കറ്റിന് 159 റൺസ് എന്ന നിലയിൽ മൂന്നാം ദിനം ബാറ്റിങ് തുടങ്ങിയ ഇന്ത്യക്കായി രാഹുലും ദേവ്ദത്തും മികച്ച കൂട്ടുകെട്ടുണ്ടാക്കി. ഇരുവരും 165 റൺസ് കൂട്ടിച്ചേർത്തു. 175 പന്തിൽ 80 റൺസെടുത്ത ദേവ്ദത്തിനെ ബൗൾഡാക്കി കെയ്ൽ ജമെയ്‌സണാണ് ഈ കൂട്ടുകെട്ട് പൊളിച്ചത്. പിന്നാലെ ക്രീസിലെത്തിയ ശുഭ്മാൻ ഗില്ലിനെ കൂട്ടുപിടിച്ച് രാഹുൽ ഇന്നിങ്‌സ് മുന്നോട്ടുനയിച്ചു. ഇരുവരും 91 റൺസ് കൂട്ടിച്ചേർത്തു.

290 പന്തിൽ ഒമ്പത് ഫോറും രണ്ട് സിക്‌സും സഹിതം 136 റൺസെടുത്ത രാഹുലിനെ നഥാൻ സ്മിത്ത് പുറത്താക്കുകയായിരുന്നു. നിലവിൽ ശുഭ്മാൻ ഗില്ലും ഋഷഭ് പന്തുമാണ് ക്രീസിൽ.

നേരത്തെ ന്യൂസീലൻഡ് ആദ്യ ഇന്നിങ്‌സിൽ 368 റൺസ് അടിച്ചിരുന്നു. സെഞ്ചുറി നേടിയ ഹെന്റി നിക്കോൾസും ഗ്ലെൻ ഫ്‌ലിപിസുമാണ് കിവീസിന് മികച്ച സ്‌കോർ സമ്മാനിച്ചത്. 335 പന്തിൽ 175 റൺസാണ് നിക്കോൾസ് അടിച്ചെടുത്തത്. ഇന്ത്യക്കായി ജസ്പ്രീത് ബുംറ നാലും ആകാശ് ദീപ് മൂന്നും വിക്കറ്റെടുത്തു.