ഹരാരെ: സിംബാബ്‌വെയ്‌ക്കെതിരായ ആദ്യ ട്വന്റി-20യിൽ ആധികാരിക വിജയം നേടി ഇന്ത്യൻ യുവനിര. 126 റൺസ് ലക്ഷ്യവുമായിറങ്ങിയ ഇന്ത്യ 40 പന്ത് ശേഷിക്കെ മൂന്ന് വിക്കറ്റ് നഷ്ടത്തിൽ വിജയതീരത്തെത്തി. അർധസെഞ്ചുറി നേടിയ വൈഭവ് സൂര്യവംശിയാണ് ഇന്ത്യയുടെ വിജയം അനായാസമാക്കിയത്. ഇതോടെ ട്വന്റി-20 ക്യാപ്റ്റനായതിന് ശേഷമുള്ള തന്റെ ആദ്യ വിജയവും ശ്രേയസ് അയ്യർ സ്വന്തമാക്കി. 

To advertise here,

സ്‌കോർ ബോർഡിൽ 23 റൺസെത്തിയപ്പോൾ തന്നെ ഇന്ത്യക്ക് ഓപ്പണർ അഭിഷേക് ശർമയെ നഷ്ടമായി. എട്ട് പന്തിൽ ഒരു റണ്ണായിരുന്നു സമ്പാദ്യം. പിന്നീട് വൈഭവ് സൂര്യവംശിയും ഇഷാൻ കിഷനും ഒത്തുചേർന്നു. ഇരുവരും 45 റൺസ് കൂട്ടുകെട്ടുണ്ടാക്കി. അർധ സെഞ്ചുറി പൂർത്തിയാക്കിയതിന്‌ പിന്നാലെ വൈഭവിനെ പുറത്താക്കി റിച്ചാർഡാണ് ഈ കൂട്ടുകെട്ട് പൊളിച്ചത്. 19 പന്തിൽ നാല് വീതം ഫോറും സിക്‌സും സഹിതമാണ് വൈഭവ് 50 റൺസ് നേടിയത്.

ശേഷം ഇഷാൻ കിഷനും ശ്രേയസ് അയ്യരുമായിരുന്നു ക്രീസിൽ. ഇരുവരുടേയും കൂട്ടുകെട്ട് 46 റൺസിലെത്തി നിൽക്കെ ഇഷാനെ ബ്ലെസ്സിങ് പുറത്താക്കി. 24 പന്തിൽ 35 റൺസായിരുന്നു ഇഷാന്റെ സംഭാവന. 24 പന്തിൽ 28 റൺസോടെ ശ്രേയസും അഞ്ച് പന്തിൽ ആറ് റൺസോടെ തിലക് വർമയും പുറത്താകാതെ നിന്നു.

നേരത്തെ ടോസ് നഷ്ടപ്പെട്ട് ബാറ്റിങ്ങിനിറങ്ങിയ ആതിഥേയർ നിശ്ചിത ഓവറിൽ ഏഴ് വിക്കറ്റ് നഷ്ടത്തിൽ 125 റൺസാണ് അടിച്ചെടുത്തത്. രണ്ട് വിക്കറ്റ് വീതം വീഴ്ത്തിയ മായങ്ക് യാദവും പ്രിൻസ് യാദവുമാണ് സിംബാബ്‌യെ ചെറിയ സ്‌കോറിലൊതുക്കിയത്. ശിവം ദുബെ, രവി ബിഷ്‌ണോയ് എന്നിവർ ഓരോ വിക്കറ്റ് വീതം വീഴ്ത്തി. 39 റൺസെടുത്ത വെസ്‌ലിയാണ് ആതിഥേയരുടെ ടോപ് സ്‌കോറർ.

സിംബാബ്‌വെയ്ക്ക് ആദ്യ പന്തിൽ തന്നെ വിക്കറ്റ് നഷ്ടമായി. മായങ്ക് യാദവിന്റെ പന്തിൽ ബ്രയാൻ ബെന്നറ്റാണ് പുറത്തായത്. പിന്നാലെ 10 റൺസെടുത്ത ബെൻ കുറാനെ പ്രിൻസ് യാദവും പുറത്താക്കി. ഡിയോൺ മയേഴ്‌സിനെ (6) മായങ്ക് യാദവും സികന്ദർ റാസയെ (4) ശിവം ദുബെയും വീഴ്ത്തി. 35 പന്തിൽ 26 റൺസെടുത്ത റയാൻ ബേലിനെ നിലയുറപ്പിക്കും മുമ്പ് രവി ബിഷ്‌ണോയിയും തിരിച്ചയച്ചു.

പിന്നീട് ആറാം വിക്കറ്റിൽ വെസ്ലിയും തടിവനഷെയും ഒത്തുചേർന്നു. ഇരുവരും 58 റൺസ് കൂട്ടുകെട്ടുണ്ടാക്കി. വെസ്ലിയെ ശിവം ദുബെ റൺഔട്ടാക്കിയതോടെയാണ് ഈ കൂട്ടുകെട്ട് പൊളിഞ്ഞത്. 34 പന്തിൽ മൂന്ന് ഫോറും ഒരു സിക്‌സും സഹിതം 39 റൺസ് വെസ്ലി സ്‌കോർ ബോർഡിൽ ചേർത്തു. പിന്നീട് ക്രീസിലെത്തിയ ബ്രാഡ് ഇവാൻസിനെ അക്കൗണ്ട് തുറക്കും മുമ്പ് പ്രിൻസ് യാദവ് തിരിച്ചയച്ചു. 20 പന്തിൽ 27 റൺസോടെ തടിവനഷെയും ഒരു പന്തിൽ ഒരു റണ്ണോടെ ന്യൂമാനും പുറത്താകാതെ നിന്നു.