കൊളംബോ: ഇന്ത്യയും ശ്രീലങ്കയും തമ്മിലുള്ള രണ്ടാം ക്രിക്കറ്റ് ടെസ്റ്റ് ഓഗസ്റ്റ് 23-ന് കൊളംബോയിലെ സിംഹളീസ് സ്‌പോർട്‌സ് ക്ലബ്ബിൽ ആരംഭിക്കാനിരിക്കെ, പിച്ചിന്റെ സ്വഭാവം എങ്ങനെയായിരിക്കുമെന്നതിനെക്കുറിച്ചുള്ള ചർച്ചകൾ സജീവം. സ്പിന്നിനെതിരെയുള്ള ഇന്ത്യൻ ബാറ്റിങ് നിരയുടെ ബലഹീനത മുതലെടുക്കാൻ പൂർണമായും സ്പിന്നിനെ തുണയ്ക്കുന്ന പിച്ച് ഒരുക്കാനാണ് ശ്രീലങ്കയ്ക്ക് താത്പര്യം. എങ്കിലും ബാറ്റിങ്ങിനും ബൗളിങ്ങിനും ഒരുപോലെ അനുകൂലമായ ഗോളിലെ പിച്ചിന് സമാനമായ പിച്ചാകും കൊളംബോയിലും ഒരുക്കുകയെന്നാണ് റിപ്പോർട്ടുകൾ.

To advertise here,

ഗോളിൽ നടന്ന ഒന്നാം ടെസ്റ്റിൽ അഞ്ചു ദിവസവും കളി നീളുകയും ഇന്ത്യ 165 റൺസിന് വിജയിക്കുകയും ചെയ്തിരുന്നു. സ്പിന്നിനെ അമിതമായി പിന്തുണയ്ക്കുന്ന പിച്ചൊരുക്കിയാൽ അത് തങ്ങൾക്ക് തന്നെ തിരിച്ചടിയായേക്കാം എന്നാണ് ശ്രീലങ്കൻ ക്രിക്കറ്റ് അധികൃതരുടെ വിലയിരുത്തൽ. ദിനേശ് ചണ്ഡിമൽ, കുശാൽ മെൻഡിസ്, പതും നിസ്സങ്ക തുടങ്ങിയ പരിചയസമ്പന്നരായ കളിക്കാരുടെ അഭാവത്തിലാണ് ലങ്കൻ നിര ഇപ്പോൾ കളിക്കുന്നത്. അതിനാൽ തങ്ങളുടെ യുവ ബാറ്റ്‌സ്മാൻമാർക്ക് മികച്ച പ്രകടനം നടത്താൻ അവസരമൊരുക്കുന്ന സാധാരണ നിലയിലുള്ള പിച്ച് ആവശ്യമാണെന്ന് ഒരു ശ്രീലങ്കൻ ക്രിക്കറ്റ് അസോസിയേഷൻ പ്രതിനിധി പിടിഐയോട് പ്രതികരിച്ചു. എങ്കിലും പരമ്പര സമനിലയിലാക്കാനും വിജയിക്കാനും ടീം മാനേജ്‌മെന്റ് ആവശ്യപ്പെടുന്നത് എന്താണോ അതിനനുസരിച്ചാകും അന്തിമ തീരുമാനം.

ഒരുകാലത്ത് സിംഹളീസ് സ്‌പോർട്‌സ് ക്ലബ്ബ് ബാറ്റർമാരുടെ പറുദീസയും ശ്രീലങ്കയുടെ ശക്തമായ കോട്ടയുമായിരുന്നു. 1999-2009 കാലഘട്ടത്തിൽ ഇവിടെ കളിച്ച 12 ടെസ്റ്റുകളിൽ ആറെണ്ണത്തിൽ ജയിച്ച ലങ്ക ശേഷിച്ചവ സമനിലയിലാക്കിയിരുന്നു. കുമാർ സംഗക്കാരയും മഹേല ജയവർധനെയും റൺസ് അടിച്ചുകൂട്ടുകയും ഇതിഹാസ സ്പിന്നർ മുത്തയ്യ മുരളീധരൻ നയിച്ച ബൗളിങ് നിര എതിരാളികളെ വരിഞ്ഞുമുറുക്കുകയും ചെയ്യുന്നതായിരുന്നു അന്നത്തെ തന്ത്രം.

എന്നാൽ ഇതിഹാസ താരങ്ങളുടെ വിരമിക്കലിന് ശേഷം ഈ പിച്ചിന്റെ സ്വഭാവത്തിൽ വലിയ മാറ്റമുണ്ടായി. പിന്നീട് ഇവിടെ കളിച്ച ഏഴ് ടെസ്റ്റുകളിൽ മൂന്നെണ്ണത്തിൽ മാത്രമാണ് ലങ്കയ്ക്ക് ജയിക്കാനായത്; നാലെണ്ണത്തിൽ പരാജയപ്പെട്ടു. ഇന്ത്യക്കും പാകിസ്താനുമെതിരേ ഒന്നാം ഇന്നിങ്‌സിൽ 400 റൺസിലധികം വലിയ ലീഡ് വഴങ്ങേണ്ടതായും ലങ്കയ്ക്ക് വന്നിട്ടുണ്ട്. ദക്ഷിണാഫ്രിക്ക (2018), ഓസ്ട്രേലിയ (2016), ബംഗ്ലാദേശ് (2025) എന്നിവർക്കെതിരേ മാത്രമാണ് അവർക്ക് പിന്നീട് ജയിക്കാനായത്.