പാരീസ്: പാരീസ് ഒളിമ്പിക്‌സില്‍ നീന്തല്‍ മത്സരത്തിനു പിന്നാലെ നീന്തല്‍ക്കുളത്തിനരികില്‍ കുഴഞ്ഞുവീണ് സ്ലൊവാക്യന്‍ താരം ടമാര പൊറ്റോക്ക. ലാ ഡിഫന്‍സ് അരീനയില്‍ നടന്ന മത്സരത്തിനു പിന്നാലെയാണ് സംഭവം. വനിതകളുടെ 200 മീറ്റര്‍ വ്യക്തിഗത മെഡല്‍ യോഗ്യതാ ഹീറ്റില്‍ താരം ഏഴാമത് ഫിനിഷ് ചെയ്തിരുന്നു.
കുഴഞ്ഞുവീണ ഉടനെത്തന്നെ മെഡിക്കല്‍ സംഘം അരികിലെത്തി പ്രാഥമിക ശുശ്രൂഷകള്‍ നല്‍കി. മിനിറ്റുകള്‍ക്കുശേഷം മെച്ചപ്പെട്ട ചികിത്സയ്ക്കായി സ്‌ട്രെച്ചറില്‍ കയറ്റിക്കൊണ്ടുപോയി. വൈദ്യസഹായത്തിനായി കൊണ്ടുപോകുമ്പോള്‍ ഓക്‌സിജന്‍ മാസ്‌ക് ധരിച്ചിരുന്നു. അതേസമയം, ബോധക്ഷയം സംഭവിച്ചിരുന്നില്ലെന്നാണ് മെഡിക്കല്‍ സംഘം വ്യക്തമാക്കിയത്.
രണ്ട് മിനിറ്റ് 14.20 സെക്കന്‍ഡുകളെടുത്ത് ഏഴാമതായാണ് പൊറ്റോക്ക മത്സരം ഫിനിഷ് ചെയ്തത്. അതിനാല്‍ സെമി ഫൈനലില്‍ പ്രവേശിക്കാനായിരുന്നില്ല. തുടര്‍ന്ന് വെള്ളത്തില്‍നിന്ന് കയറിയതോടെ പൂള്‍ ഡെക്കില്‍ കുഴഞ്ഞുവീഴുകയായിരുന്നു. മത്സരം പത്ത് മിനിറ്റോളം വൈകിയാണ് പിന്നീട് തുടങ്ങിയത്.
ടമാര ആസ്ത്മ രോഗിയാണെന്നും സംഭവസമയം ഇന്‍ഹേലര്‍ ലഭ്യമാവാത്തതിനാലാണ് കുഴഞ്ഞുവീണതെന്നും സ്ലൊവേക്യന്‍ ടീം ലീഡര്‍ ഇവാന ലാങ് പ്രസ്താവനയില്‍ അറിയിച്ചതായി റിപ്പോര്‍ട്ടുണ്ട്. നിലവില്‍ അപകടകരമായ സാഹചര്യമില്ലെന്നാണ് റിപ്പോര്‍ട്ടുകള്‍.
Content Highlights: Tamara Potocká
Published: 02 Aug 2024, 08:51 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented