ന്യൂഡല്‍ഹി: പാരിസ് ഒളിമ്പിക്‌സില്‍ ഇന്ത്യയുടെ അഭിമാനതാരമായി മാറിയ ഷൂട്ടിങ് താരം മനു ഭാക്കറിന് ഡൽഹിയിൽ ഉജ്ജ്വല വരവേൽപ്. സ്വര്‍ണത്തിളക്കമുള്ള രണ്ട് വെങ്കലമെഡലുകള്‍ നേടിയാണ് മനു രാജ്യത്തിന്റെ അഭിമാനം വാനോളമുയര്‍ത്തിയത്. ബുധനാഴ്ച രാവിലെ 09:20-ഓടെയാണ് മനു ഭാക്കറുമായുള്ള എയര്‍ ഇന്ത്യ വിമാനം (എ.ഐ.142) ഡല്‍ഹിയിലെ ഇന്ദിരാ ഗാന്ധി അന്താരാഷ്ട്ര വിമാനത്താവളത്തില്‍ ഇറങ്ങിയത്. മുൻനിശ്ചയിച്ചതിലും ഒരു മണിക്കൂർ വൈകിയാണ് വിമാനം ലാൻഡ് ചെയ്തത്.
മനുവിന്റെ പിതാവ് രാം കൃഷ്ണന്‍, മാതാവ് സുമേധ, പരിശീലകന്‍ ജസ്പാല്‍ റാണ, സമീപ സംസ്ഥാനങ്ങളിലെ ഉദ്യോഗസ്ഥര്‍, കായികപ്രേമികള്‍ തുടങ്ങി നൂറുകണക്കിന് പേരാണ് വിമാനത്താവളത്തില്‍ മനുവിനെ സ്വീകരിക്കാനായി എത്തിയത്. വാദ്യഘോഷങ്ങള്‍ മുഴക്കിയും പാട്ടുകള്‍ പാടിയും നൃത്തം ചെയ്തുമെല്ലാമാണ് തങ്ങളുടെ പ്രിയതാരത്തെ അവര്‍ ജന്മനാട്ടിലേക്ക് സ്വീകരിച്ചത്. മനു ബാക്കറിന്റേയും പരിശീലകന്‍ ജസ്പാല്‍ റാണയുടെയും ചിത്രങ്ങളുള്ള ബാനറുകളും അവര്‍ ഉയര്‍ത്തിയിരുന്നു.
Also Read
വനിതകളുടെ 10 മീറ്റര്‍ എയര്‍ പിസ്റ്റളിൽ വ്യക്തിഗതമായും മിക്‌സഡ് ടീം എയര്‍ പിസ്റ്റള്‍ ഇനത്തില്‍ സരബ്ജോത് സിങ്ങിനൊപ്പവുമാണ് മനു ഭാക്കർ ഇന്ത്യയ്ക്കായി പാരിസ് ഒളിമ്പിക്സിൽ വെങ്കല മെഡലുകൾ നേടിയത്. ഇതോടെ സ്വതന്ത്ര ഇന്ത്യയുടെ ചരിത്രത്തില്‍ ഒരു ഒളിമ്പിക്‌സില്‍ ഇരട്ട മെഡല്‍ നേടുന്ന ആദ്യ താരമെന്ന റെക്കോഡും മനു സ്വന്തമാക്കി.
ഒളിമ്പിക് ഷൂട്ടിങ്ങില്‍ 12 വര്‍ഷം നീണ്ട ഇന്ത്യയുടെ മെഡല്‍ വരള്‍ച്ചയ്ക്ക് അറുതി വരുത്തിയായിരുന്നു മനു ആദ്യ വെങ്കലമെഡൽ കഴുത്തിലണിഞ്ഞത്. ഇതോടൊപ്പം ഒളിമ്പിക്സ് ഷൂട്ടിങ്ങില്‍ മെഡല്‍ നേടുന്ന ആദ്യ ഇന്ത്യന്‍ വനിതയെന്ന നേട്ടവും ഈ 22-കാരിയെ തേടിയെത്തി.
Also Read: ചെറായി കടപ്പുറത്തുനിന്ന് ചരിത്രത്തിലേക്ക്; അന്ന് തോക്ക് ചതിച്ച പെൺകുട്ടിയുടെ ഉയിർത്തെഴുന്നേൽപ്പ്
Content Highlights: Manu Bhaker Receives Grand Reception As She Returns Home With 2 Bronze Medals In Paris Olympics
Published: 07 Aug 2024, 11:34 am IST
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented