റായ്ബറേലി (ഉത്തര്‍പ്രദേശ്): പ്രിയങ്കാ ​​ഗാന്ധി വാരാണസിയിൽ നിന്നും ജനവിധി തേടിയിരുന്നെങ്കിൽ രണ്ട് മുതൽ മൂന്ന് ലക്ഷം വരെ ഭൂരിപക്ഷത്തിന് നരേന്ദ്രമോദിയെ തോൽപ്പിച്ചേനെയെന്ന് കോൺ​ഗ്രസ് നേതാവ് രാഹുൽ ​ഗാന്ധി. റായ്ബറേലിയിൽ പാർട്ടി പ്രവർത്തകരെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. 

To advertise here,

കോൺ​ഗ്രസുമായി സഹകരിച്ച് പ്രവർത്തിച്ച സമാജ്‌വാദി പാർട്ടി പ്രവർത്തകരോടും രാഹുൽ നന്ദി പറഞ്ഞു. നേരത്തെ, സഖ്യകക്ഷികളുമായി ചേർന്ന് പ്രവർത്തിക്കുമെങ്കിലും നിസ്സഹകരണം ചൂണ്ടിക്കാട്ടിയുള്ള പരാതികൾ ഉയർന്നുവരാറുണ്ടായിരുന്നു. എന്നാൽ, ഇത്തവണ രാജ്യത്തുടനീളം സഖ്യകക്ഷികൾ ഒരുമിച്ച് പോരാടി. 

നരേന്ദ്രമോദിയും അമിത് ഷായും ഭരണഘടനയെ തൊട്ടുകളിച്ചതോടെയാണ് ഈ രീതിയിൽ സഖ്യം പ്രവർത്തിച്ചത്. രാജ്യത്തിന്റെ പ്രധാനമന്ത്രി പരസ്യമായി വെറുപ്പിന്റേയും അക്രമത്തിന്റേയും രാഷ്ട്രീയത്തെ കൂട്ടുപിടിക്കുന്നത് ആദ്യമായി കാണുകയാണ്. ഇത് ഇന്ത്യയുടെ സംസ്കാരത്തിനെതിരാണെന്നും രാഹുൽ കൂട്ടിച്ചേർത്തു. 

2019-ലെ തിരഞ്ഞെടുപ്പില്‍ നാല് ലക്ഷത്തിലേറെ വോട്ടുകളുടെ ഭൂരിപക്ഷത്തിന് ജയിച്ച മണ്ഡലത്തില്‍ നിന്ന് ഇത്തവണ 1,52,513 വോട്ടിന്റെ ഭൂരിപക്ഷത്തിലായിരുന്നു മോദിയുടെ വിജയം. 2019-ലെ ഭൂരിപക്ഷത്തില്‍നിന്ന് മൂന്നു ലക്ഷത്തിലേറെ വോട്ടുകളാണ് കുറഞ്ഞത്.