ഒഴുകുന്ന ചോരയിൽ ആനന്ദിക്കുന്ന വരികൾ, വഴിതെറ്റുന്ന യുവത്വം; ഡ്രില്‍ റാപ്പ് പ്രതിക്കൂട്ടിലാവുമ്പോള്‍

Jimmy Fahri | Photo: Metropolitan Police

യുകെയില്‍ സൗത്ത് ലണ്ടനിലാണ് ഡ്രില്ലിന്റെ ആരംഭം. യുഎസിലെ ഡ്രില്‍ റാപ്പര്‍മാര്‍ യുകെയിലും താരങ്ങളായി. വെസ്റ്റ് ആഫ്രിക്കന്‍ അല്ലെങ്കില്‍ കരീബിയന്‍ വംശജരായ ആളുകളായിരുന്നു യുകെയിലെ ഡ്രില്‍ കലാകാരന്മാരില്‍ കൂടുതലും. അതുകൊണ്ട് തന്നെ സമ്മിശ്രമായ ബ്രിട്ടീഷ്, സൊമാലി, അറബിക്, ജമൈക്കന്‍ ഭാഷാ ശൈലിയിലായിരുന്നു യുകെയില്‍ നിന്നുള്ള ഡ്രില്‍ റാപ്പ്. ഡ്രില്‍ റാപ്പ് എത്തിയ ഇടങ്ങളിലെല്ലാം അതിന് തനത് ഭാഷാശൈലിയും രൂപപ്പെട്ടു. അധികം വൈകാതെ തന്നെ യുകെയിലെ കുറ്റകൃത്യങ്ങളുടെ വര്‍ധനവിനെ ഡ്രില്‍ റാപ്പുമായി ബന്ധിപ്പിച്ചുള്ള ചര്‍ച്ചകള്‍ ആരംഭിച്ചിരുന്നു.

ഡ്രില്ലിന് സ്വീകാര്യതയുള്ള ഇടങ്ങളിലെല്ലാം മരണനിരക്കും കുറ്റകൃത്യങ്ങളും വര്‍ധിക്കുന്നുവെന്നാണ് ആരോപണം. അതിന് പ്രധാന കാരണമായി ചൂണ്ടിക്കാണിക്കപ്പെടുന്നത് ഡ്രില്‍ റാപ്പിന്റെ വരികളുടെ പ്രമേയങ്ങളാണ്. ഡ്രില്‍ കലാകാരന്മാര്‍ പലപ്പോഴും ദാരിദ്ര്യവും കുറ്റകൃത്യങ്ങള്‍ നിറഞ്ഞതുമായ തങ്ങളുടെ ചുറ്റുപാടുകളുടെ ജീവിതങ്ങളെ കുറിച്ചാണ് റാപ്പ് ചെയ്യാറ്. ആ വരികളില്‍ പലപ്പോഴും അക്രമം, ഗുണ്ടായിസം, മയക്കുമരുന്ന് ഉപയോഗം എന്നിവയെ വര്‍ണിക്കുകയും ചെയ്യാറുണ്ട്. ഇവയെ കുറിച്ചുള്ള ജാഗ്രതയല്ല ഡ്രില്‍ ശ്രോതാക്കളില്‍ സൃഷ്ടിക്കുന്നതെന്നും ആ ജീവിതത്തോടുള്ള അഭിലാഷമാണ് അതിലെ വരികള്‍ തോന്നിപ്പിക്കുന്നതെന്നും വിമര്‍ശകര്‍ വാദിക്കുന്നു. ഒരാളെ വെടിവെച്ച് കൊല്ലുന്നതിന്റെയും മറ്റ് ക്രൂര കുറ്റകൃത്യങ്ങളുടെയും വിശദമായ വിവരണങ്ങള്‍ അഭിമാനത്തോടെയും ആവേശത്തോടെയും ഒരു റാപ്പര്‍ പാടുന്നത് ചിന്തിച്ച് നോക്കൂ.

ആദ്യം സൂചിപ്പിച്ച ജെയ്ക്ക് ഫഹ്രിയുടെ കാര്യത്തിലും ഇത് തന്നെയാണ് സംഭവിച്ചത്. കൊലപാതകക്കേസില്‍ ജയിലിലായി പിന്നീട് പരോള്‍ കിട്ട് തിരികെയെത്തിയ ജെയ്ക്ക് അതിവേഗമാണ് ഡ്രില്‍ റാപ്പര്‍ എന്ന നിലയില്‍ അത്യാവശ്യം മെച്ചപ്പെട്ട പ്രസിദ്ധി നേടിയെടുത്തത്. തന്റെ ജയില്‍ ജീവിതവും താന്‍ നടത്തിയ കുറ്റകൃത്യങ്ങളും കൊലപാതകങ്ങളുമാണ് ജെയ്ക്കിന്റെ വരികളില്‍ വര്‍ണിക്കപ്പെട്ടത്. താന്‍ നടത്തിയ കൊലപാതകം അഭിമാനത്തോടെ വരികളില്‍ വീമ്പായി പാടിയ ഫഹ്രിയുടെ മനോനിലയാണ് ഡ്രില്‍ സംഗീതം എത്രത്തോളം അപകടകാരിയാണെന്ന് നമ്മോട് വിളിച്ചു പറയുന്നത്. 

ഇരയാക്കപ്പെട്ടയാളുടെ ജീവന്‍ ശരീരം വിട്ടുപോകുന്നതിലും അയാളുടെ ചോര നിലത്തൊഴുകി പരക്കുന്നതിലും ആനന്ദം കണ്ടെത്തുന്നതായും അത് അയാള്‍ വീണ്ടും കാണാൻ ആഗ്രഹിക്കുന്നതായും ആവേശത്തോടെ പാടുന്ന വരികളായിരുന്നു ഫഹ്രിയുടേത്. ഡ്രില്ലിന്റെ ഈ അപകടമാണ് വിമര്‍ശകര്‍ നിരന്തരം ചൂണ്ടിക്കാണിക്കുന്നത്. 

ഇത് യുവാക്കളെയാണ് ഏറ്റവും അധികം പ്രതികൂലമായി ബാധിക്കുന്നതെന്ന് വിമര്‍ശകര്‍ ആശങ്കപ്പെടുന്നു. അക്രമവും കുറ്റകൃത്യങ്ങളും നിറഞ്ഞ ഉള്ളടക്കങ്ങളുമായുള്ള നിരന്തര സമ്പര്‍ക്കം അക്രമങ്ങളോടുള്ള യുവാക്കളുടെ സംവേദനക്ഷമത കുറയ്ക്കുകയാണ്. കുറ്റകൃത്യങ്ങളും അക്രമങ്ങളും അവരുടെ മനസില്‍ സാധാരണമാക്കപ്പെടുന്നു, പലപ്പോഴും പാട്ടുകളില്‍ വിവരിച്ചിരിക്കുന്ന പ്രവൃത്തികള്‍ അനുകരിക്കാന്‍ അത് ചിലരെയെങ്കിലും പ്രചോദിപ്പിക്കുന്നു. 

ടിക ടോക്ക്, യൂട്യൂബ് പോലുള്ള സോഷ്യല്‍ മീഡിയാ പ്ലാറ്റ്‌ഫോമുകളിലൂടെയുള്ള ഡ്രില്‍ സംഗീതത്തിന്റെ പ്രചാരം സമീപകാലത്ത് അതുണ്ടാക്കുന്ന സ്വാധീനത്തിന്റെ വ്യാപ്തിയും വര്‍ധിപ്പിച്ചിട്ടുണ്ട്. ആഗോളതലത്തില്‍ യുവാക്കള്‍ക്കിടയില്‍ ഇത് വിപരീത സ്വാധീനമുണ്ടാക്കുമെന്ന ആശങ്കയും ഉയരുന്നുണ്ട്. 

ആവിഷ്‌കാര സ്വാതന്ത്ര്യത്തിന്റെ പിന്‍ബലം

തീര്‍ച്ചയായായും എതൊരു വിഷയത്തിലും നിഷ്‌കളങ്കമായ വാദമുഖങ്ങള്‍ ഉയര്‍ത്തുന്നവരുണ്ട്. ഡ്രില്ലിന്റെ വരികള്‍ തീര്‍ത്തും കലാപരമായ ആവിഷ്‌കാരമാണെന്നും കലാകാരന്മാര്‍ നേരിടുന്ന കഠിനമായ ജീവിത യാഥാര്‍ഥ്യങ്ങളുടെ പ്രതിഫലനമാണതെന്നും ഈ പക്ഷം വാദിക്കുന്നു. പാര്‍ശ്വവത്കരിക്കപ്പെട്ട സമൂഹങ്ങള്‍ക്ക് ശബ്ദമാവാന്‍ അതിന് സാധിക്കുന്നുണ്ടെന്നും അസമത്വം, ദാരിദ്ര്യം, പോലീസില്‍ നിന്ന് നേരിടുന്ന ക്രൂരതകള്‍ ഉള്‍പ്പടെയുള്ള വിഷയങ്ങളില്‍ ഡ്രില്ലിന്റെ വരികള്‍ വെളിച്ചം വീശുന്നു. ഡില്ലിനെ സെന്‍സര്‍ ചെയ്യുന്നത് ശരിയല്ല. തങ്ങളുടെ ജീവിതാനുഭവങ്ങള്‍ പ്രതിഫലിക്കുന്നതിനാലും, തങ്ങളുടെ നിരാശയും അസ്വസ്ഥതയുമെല്ലാം അഭിസംബോധന ചെയ്യുന്നതിനാലുമാണ് ഡ്രില്ലിനോട് യുവാക്കള്‍ക്ക് ആകര്‍ഷണം തോന്നുന്നതെന്നും അവര്‍ വാദിക്കുന്നു. 

ദാരിദ്ര്യവും അവസരമില്ലായ്മയും ഉള്‍പ്പടെ അവര്‍ നേരിടുന്ന പ്രശ്‌നങ്ങളുടെ മൂലകാരണങ്ങള്‍ ഡ്രില്‍ റാപ്പിന് അഭിസംബോധന ചെയ്യുന്നുവെന്നും ഡ്രില്ലിന്റെ ദോഷങ്ങളിലേക്ക് മാത്രം വിരല്‍ ചൂണ്ടുന്നവര്‍, അത് കൈകാര്യം ചെയ്യുന്ന അടിസ്ഥാനപ്രശ്‌നങ്ങളില്‍ നിന്ന് ശ്രദ്ധതിരിക്കുകയാണെന്നും അനുകൂലിക്കുന്നവര്‍ പറയുന്നു. എന്നാല്‍ യഥാര്‍ത്ഥത്തില്‍ ഈ ഡ്രില്‍ റാപ്പ് അധഃസ്ഥിത ജനതയുടെ പ്രശ്‌നങ്ങളുടെ കണ്ണാടിയായി പ്രവര്‍ത്തിക്കുകയാണോ അതോ ആ പ്രശ്‌നങ്ങള്‍ക്കെല്ലാം കാരണമാവുകയാണോ എന്ന ചോദ്യവും ഉയരുന്നുണ്ട്.

ആത്യന്തികമായി കല, സമൂഹം, സാമൂഹിക ഉത്തരവാദിത്തം എന്നിവ തമ്മിലുള്ള സങ്കീര്‍ണമായ ബന്ധമാണ് ഡ്രില്‍ റാപ്പിനെക്കുറിച്ചുള്ള ചര്‍ച്ചകളുടെ ഉള്ളടക്കം. ഡ്രില്‍ റാപ്പിനെ ചുറ്റിപ്പറ്റിയുള്ള ആശങ്കകള്‍ പരിഹരിക്കുന്നതിന് അതിന്റെ കലാപരമായ മൂല്യവും അത് ആവിഷ്‌കരിക്കുന്ന സാമൂഹിക സാഹചര്യങ്ങളും ഒപ്പം അവ സൃഷ്ടിക്കുന്ന സാമൂഹിക ആഘാതവും ഒരുപോലെ പരിഗണിക്കുന്ന ഒരു സൂക്ഷ്മമായ സമീപനം ആവശ്യമാണ്.