ദുബായ്: ഇന്ത്യയിലെ യുണൈറ്റഡ് പേയ്മെന്റ്‌സ് ഇന്റർഫേസ് (യു.പി.ഐ) ഇടപാടുകൾക്ക് ഒക്ടോബർ 15 മുതൽ പുതിയ മർച്ചന്റ് ഡിസ്‌കൗണ്ട് റേറ്റ് (എം.ഡി.ആർ) നിലവിൽ വരുന്നുണ്ടെങ്കിലും ഗൾഫ് പ്രവാസികൾ ഉൾപ്പെടെയുള്ള ഉപയോക്താക്കൾക്ക് ഇടപാടുകൾ സൗജന്യമായി തന്നെ തുടരാമെന്ന് ധനകാര്യ മന്ത്രാലയം വ്യക്തമാക്കി. 2,000 രൂപയ്ക്ക് മുകളിലുള്ള ബിസിനസ്സ് ഇടപാടുകൾക്ക് കച്ചവടക്കാരിൽ നിന്ന് ഈടാക്കുന്ന സേവന നിരക്കാണിത്.

To advertise here,

പണം നൽകുന്ന ഉപയോക്താവിൽ നിന്ന് യാതൊരുവിധ അധിക തുകയും ഈടാക്കില്ല. ഇന്ത്യയിലെത്തി സാധനങ്ങൾ വാങ്ങുന്നതിനും ബില്ലുകൾ അടയ്ക്കുന്നതിനും ബന്ധുക്കൾക്ക് പണമയക്കുന്നതിനും യു.പി.ഐ ഉപയോഗിക്കുന്ന പ്രവാസികൾക്ക് പുതിയ മാറ്റങ്ങൾ മൂലം യാതൊരുവിധ സാമ്പത്തിക ബാധ്യതയും ഉണ്ടാകില്ല.
വ്യക്തികളിൽനിന്ന് വ്യാപാരികളിലേക്കുള്ള (പി.ടു.എം) 2,000 രൂപയ്ക്ക് മുകളിലുള്ള ഇടപാടുകൾക്കാണ് 0.4 ശതമാനം എന്ന നിരക്കിൽ എം.ഡി.ആർ ചുമത്തുന്നത്. ഡിജിറ്റൽ ഇടപാടുകൾ സുഗമമാക്കുന്നതിന് ബാങ്കുകളും പേയ്മെന്റ് ആപ്പുകളും ഈടാക്കുന്ന ഈ തുക പരമാവധി 300 രൂപയായി നിജപ്പെടുത്തിയിട്ടുണ്ട്.

2,000 രൂപവരെയുള്ള കച്ചവട ഇടപാടുകൾക്ക് ഈ നിരക്ക് ബാധകമല്ല. ഉപയോക്താക്കളിൽനിന്ന് ഈ തുക ഈടാക്കാൻ കച്ചവടക്കാർക്കോ ആപ്പ് സേവനദാതാക്കൾക്കോ അനുവാദമില്ലെന്ന് കേന്ദ്ര ധനമന്ത്രി നിർമ്മല സീതാരാമൻ അറിയിച്ചിട്ടുണ്ട്. 50,000 രൂപയുടെ സാധനങ്ങൾ വാങ്ങുന്ന ഒരു ഉപയോക്താവ് കൃത്യം 50,000 രൂപ മാത്രം നൽകിയാൽ മതിയാകും, വ്യാപാരിക്ക് ലഭിക്കുന്ന തുകയിൽനിന്ന് ബാങ്കുകൾ ബാക്കി തുക കിഴിക്കുകയാണ് ചെയ്യുന്നത്.
വ്യക്തികൾ തമ്മിലുള്ള (പി ടു പി) ഇടപാടുകൾക്ക് പുതിയ നിരക്കുകൾ ബാധകമല്ല. ബന്ധുക്കൾക്കോ സുഹൃത്തുക്കൾക്കോ പണമയക്കുന്നതിനും സ്വന്തം അക്കൗണ്ടുകൾക്കിടയിൽ തുക മാറ്റുന്നതിനും തുകയുടെ പരിധിയില്ലാതെതന്നെ സേവനം തികച്ചും സൗജന്യമായിരിക്കും.

മാസം ഒരു ലക്ഷം രൂപവരെ യു.പി.ഐ ക്യു.ആർ കോഡ് വഴി സ്വീകരിക്കുന്ന ചെറുകിട കച്ചവടക്കാരെ (പി.ടു.പി.എം) ഈ നിരക്കുകളിൽ നിന്ന് ഒഴിവാക്കിയിട്ടുണ്ട്. കൂടാതെ പെട്രോൾ, റെയിൽവേ, ടെലികോം, ഇൻഷുറൻസ്, കുടിവെള്ളം, വൈദ്യുതി തുടങ്ങിയ പൊതുജനസേവന മേഖലകളിൽ 2,000 രൂപയ്ക്ക് മുകളിലുള്ള ഇടപാടുകൾക്ക് ഫ്‌ലാറ്റ് നിരക്കായി 5 രൂപ മാത്രമായിരിക്കും കച്ചവടക്കാരിൽനിന്ന് ഈടാക്കുക. സിസ്റ്റമാറ്റിക് ഇൻവെസ്റ്റ്മെന്റ് പ്ലാനുകൾ (എസ്.ഐ.പി), ഒട്ടോ-ഡെബിറ്റുകൾ എന്നിവയ്ക്കും ഈ നിരക്ക് ബാധകമല്ല.
യു.എ.ഇ ഫോൺ നമ്പറുകളായ '+971' ഉപയോഗിച്ച് എൻ.ആർ.ഇ, എൻ.ആർ.ഒ അക്കൗണ്ടുകൾ വഴി യു.പി.ഐ ഉപയോഗിക്കുന്ന പ്രവാസികൾക്കും ഈ സുരക്ഷാ മാനദണ്ഡങ്ങൾ ഒരുപോലെ ബാധകമാണ്. സ്റ്റേറ്റ് ബാങ്ക് ഓഫ് ഇന്ത്യ, എച്ച്.ഡി.എഫ്.സി, ഐ.സി.ഐ.സി.ഐ, ഫെഡറൽ ബാങ്ക് തുടങ്ങിയ 16 പ്രമുഖ ബാങ്കുകൾ നിലവിൽ അന്താരാഷ്ട്ര നമ്പറുകളിൽ യു.പി.ഐ പിന്തുണ നൽകുന്നുണ്ട്. യു.എ.ഇയിലെ തിരഞ്ഞെടുക്കപ്പെട്ട വിപണികളിൽ യു.പി.ഐ വഴി ദിർഹം അടയ്ക്കുമ്പോൾ ഈടാക്കുന്ന കറൻസി മാറ്റ നിരക്കുകൾ ഇന്ത്യയിലെ ഈ എം.ഡി.ആർ നിരക്കിൽനിന്ന് വ്യത്യസ്തമായിരിക്കും.
പ്രതിവർഷം ഏകദേശം 20,000 കോടി രൂപയോളം വരുന്ന യു.പി.ഐ അടിസ്ഥാനസൗകര്യ വികസനവും സൈബർ സുരക്ഷയും മെച്ചപ്പെടുത്തുന്നതിനാണ് ഈ തുക വിനിയോഗിക്കുന്നത്. ബഹുഭൂരിപക്ഷം വ്യാപാരി ഇടപാടുകളും 2,000 രൂപയ്ക്ക് താഴെയാണെങ്കിലും മൊത്തം മൂല്യത്തിന്റെ നല്ലൊരു ഭാഗവും ഉയർന്ന ഇടപാടുകളിൽ നിന്നായതിനാൽ പുതിയ നീക്കം കച്ചവടക്കാരെ വീണ്ടും പണമിടപാടുകളിലേക്ക് തിരിയാൻ പ്രേരിപ്പിച്ചേക്കുമെന്ന വിമർശനവും ഉയരുന്നുണ്ട്.

എന്നിരുന്നാലും, സാധനങ്ങൾ വാങ്ങുമ്പോൾ ബില്ലിൽ അധികമായി യു.പി.ഐ ഫീസോ എം.ഡി.ആറോ ചേർക്കുന്നുണ്ടോ എന്ന് പ്രവാസികൾ ശ്രദ്ധിക്കണമെന്നും അത്തരം തുക നൽകേണ്ടതില്ലെന്നും അധികൃതർ വ്യക്തമാക്കുന്നു.