ദുബായ്: യുഎഇയിലേക്ക് യാത്ര ചെയ്യുന്ന ഇന്ത്യക്കാര്ക്ക് കൈയില് പണമോ ബാങ്ക് കാര്ഡുകളോ ഇല്ലാതെ മുഴുവന് ഇടപാടുകളും യുപിഐ ആപ്പ് വഴി നിര്വഹിക്കാന് സൗകര്യമൊരുങ്ങുന്നു. യുഎഇയില് ഇന്ത്യയുടെ യുപിഐ വഴിയുള്ള പേയ്മെന്റ് സംവിധാനം വ്യാപിപ്പിക്കുമെന്ന് ദുബായിലെ ഇന്ത്യന് കോണ്സല് ജനറല് സതീഷ് കുമാര് ശിവന് പറഞ്ഞു. ഇന്ത്യയുടെ തത്സമയ പേയ്മെന്റ് സംവിധാനമായ യുപിഐ യുഎഇയുടെ ഡിജിറ്റല് പേയ്മെന്റ് ശൃംഖലയുമായി കൈകോര്ക്കുന്നതോടെയാണ് ഇത് യാഥാര്ഥ്യമാവുക.
യുപിഐയുമായി ധാരണയാകുന്നതോടെ യുഎഇയിലേക്കെത്തുന്ന ഇന്ത്യന് പ്രവാസികള്ക്കും സന്ദര്ശകര്ക്കും ഇതുവരെ ഉണ്ടായിരുന്നതിനേക്കാള് മികച്ചതും വേറിട്ടതുമായ യാത്രാനുഭവമാണ് ലഭിക്കുകയെന്ന് നാഷണല് പേയ്മെന്റ്സ് കോര്പറേഷന് ഓഫ് ഇന്ത്യയുടെ (എന്പിസിഐ) അന്താരാഷ്ട്ര വിഭാഗമായ എന്പിസിഐ ഇന്റര്നാഷണല് പേയ്മെന്റ്സ് ലിമിറ്റഡ് (എന്ഐപിഎല്) സംഘടിപ്പിച്ച വാര്ത്താസമ്മേളനത്തില് കോണ്സല് ജനറല് വ്യക്തമാക്കി.
നിലവില് ദുബായ് ഡ്യൂട്ടി ഫ്രീ, ലുലു ഹൈപ്പര്മാര്ക്കറ്റ് തുടങ്ങിയ മുന്നിര ഔട്ട്ലെറ്റുകളില് ഇന്ത്യന് സന്ദര്ശകര്ക്ക് അവരുടെ ഇന്ത്യന് ബാങ്ക് അക്കൗണ്ടുകളില്നിന്നും നേരിട്ട് പണമടയ്ക്കാന് യുപിഐ ഉപയോഗിക്കാം. യുഎഇയുടെ പ്രാദേശിക പേയ്മെന്റ് സംവിധാനമായ എഎഎന്ഐയുമായി യുപിഐയെ സംയോജിപ്പിക്കാനും ലക്ഷ്യമിടുന്നുണ്ട്. നാലുമാസത്തിനകം ദുബായിലെ ടാക്സികളില് യുപിഐ ഉപയോഗിച്ച് പണം നല്കാനുള്ള സംവിധാനം ഏര്പ്പെടുത്താന് ചര്ച്ചകളും പുരോഗമിക്കുകയാണ്.
തടസ്സമില്ലാത്ത സേവനം ഇന്ത്യന് ഉപയോക്താക്കള്ക്ക് വേഗത്തില് ലഭ്യമാക്കാനായി എന്ഐപിഎല് യുഎഇയിലെ വ്യാപാരി സ്ഥാപനങ്ങള്, പേയ്മെന്റ് സൊല്യൂഷന് ദാതാക്കള്, ബാങ്കുകള് എന്നിവരുമായി ചേര്ന്ന് പ്രവര്ത്തിക്കുന്നുണ്ട്. യുഎഇയുടെ ഡിജിറ്റല് പേയ്മെന്റ് സംവിധാനത്തിലേക്ക് യുപിഐയെ പൂര്ണമായി ഉള്പ്പെടുത്തുമ്പോള് ഇന്ത്യയും യുഎഇയും തമ്മിലുള്ള സാമ്പത്തിക ഇടപാടുകളില് വിപ്ലവകരമായ മാറ്റമുണ്ടാകും. യുഎഇയില് യുപിഐയുടെ സ്വീകാര്യതയ്ക്ക് എന്പിസിഐ ഇന്റര്നാഷണല് ആക്കം കൂട്ടുകയാണെന്ന് എന്പിസിഐ ഇന്റര്നാഷണല് എംഡിയും സിഇഒയുമായ റിതേഷ് ശുക്ല പറഞ്ഞു.
Content Highlights: Indians in UAE can use UPI for all transactions soon, eliminating the need for cash or cards
Published: 10 Jul 2025, 06:32 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented